Read Nyishi 2 NWD 2 Bible Online

2 NWD 2 - Nyishi bible

2 NWD 2

¹Ho Solomon At Swg dvrwq namlongam la mwwg xinam namdangam mvdwb mwwbwq kunum.

²‍Hoo Solomon diisw gvdaho wlw baqm dvb 70,000 go hoo 80,000 go wlwngam pam dvb, hoo 3,600 go bulam kaal nyig boam xuqlinum.

³‍Hoo Solomon Taiyarg lvpw at Hiramnvn pui bilwqnum: “No ngoqg ab Debidnvn bon nyibaml hoo mwwg atwg nam doogwngam nam mvn mvdwb sidar svvtaqkam jilwq jinam hvb, ngam kam bon nyibam tvbv.

⁴‍Kaato, ngoqg Pwnbo At Sw emin gab dvrwq namlo ak ngo mvta dvn hoo sungam bo sulum mam mwwg agaho mwwm dvb, hoo lwxiam wtw huc pvvkwb, hoo Doonu de aalam ariyum-aram boyuqnam aky jikwb, hoo nit poolam hoo ngulug Pwnbo At Swg durum dvdwb xuqlinam moodam dvkwb hoo Israelam nwrba xaqb nyil doom dvb pvvb mvnam tulu ham hoqho nyigw mvdwb darxaq tayin.

⁵‍Ngoqg nam mvtanam hv vigo namtayin, hoggab ngulug Pwnbov asaq pwnbo mwlwngam koi yaadwn.

⁶‍Hvbmabde mwam hiyv nam mvla jitayin, hoggab doa aongv, ho doangam kam ao yaan bov mwam pvvla ram? Ngo mwwg gab namlo poonyi jiram, hvbmabde ngoqg namlo poota gvdwn si mwwg agaho aky jik arongam mvta gvdwn?

⁷‍Hoqgab sija hunam, rupam, tamangam, hoo yoqdwram, hoo yaj jeemo-jeelo boam mvlaq boam, lwwcw cwwmo-cwwlo boam mvlaq boam, hoo yajbo tan-tacaq mvlaq boam, hoo wlw, svvdangam pwbwb taqlaq boam ngam kanam tvbv, hoggab soq wlw, svvtaq hoo jeenbo tulu sam ngoqg ab Debid Juda lola Jerusalem lo door tvl ap jipa ku.

⁸‍Ngam sidar, saipres, hoo tai svvtaq lo Lebanon hoqgv jilwq tvb, hoggab ngo cengdo noqg nyera tulungv Lebanon ho svvtaq peedwb cengdwn. Hoo ngoqg nyera tulungv noqg nyera tulug lvgab dooba tayin,

⁹‍naleqgo ngoqgab svvtaqkam mwx-mvaq tayin, hoggab ngoqg namlo pootanam si namt bvla kangam jaqtayin.

¹⁰‍Noqg nyera tulu svvtaq peen boam wtw xumwqnam mam 20,000 kor go, tanyeqkv 20,000 kor go, roo ala twwsam 20,000 bat go, hoo kutiam 20,000 bat go jitayin.”

¹¹‍Ho Taiyarg lvpw at Hiram Solomonwg pui-pota kanamnam mam birwqnum, “At Sw mwwg nyiilungam aby ko-gab, mwv nam bulug aoho lvpw at gob mvpa ku.”

¹²‍Hiram sam kam benum, “Israelwg Pwnbo At Sw xinam jaqkv, hiyv swcw-nyodongam pwnum, hiyv Lvpw at Debidnvn pumb-rwnam ko tuup ak jitwl, At Swg dvrwq namlongam la mwwg atwg lvpw namdangam namlo poom tagdo.

¹³“Ngo sija pwbw cenglaqbo nyi ak Huram-abinvn kanam gviyin,

¹⁴‍Danwg ko nyem tulu hoqg nyem akwg ko tuupv hoo mwwg abv Taiyar hoqgv. Mwam hunam, rupam, tamangam, yoqdwram, wlwngam, hoo svvtaqkam, hoo yaj jeemo-jeelo boam mvlaq dvb, yajboam mvlaq dvb, hoo lwwcw cwwmo-cwwlo boam mvlaq dvb tan-tacaqkam, hoo topum vjam mvlaq dvb, hoo hoolu deedy wlwngam taqlaq dvb pwbw dvb tomswr kunamv, hoo ngoqg nyiit at noqg ab Debidg jem mvnbo nyi tulu lvgab mwam hoolu deedy nyiqar-aar jem mvdy sanam mam jito mwv pwbw jaqb nyitayin.

¹⁵‍Hoqgab sija wtw am mam la tanyeqkam, kutiam la roo ala twwsam ngoqg nyiit atv jitayin hvl agam gooknam ham mwwg nyerangam mwam kanam mvto.

¹⁶‍Hoo Lebanon hoqgv ngulv noqg hognvk svvtaq loqxeq mvdvb nyidwn ham ngulv noqgab peej tayin hoo ham sa-svlob swpho ham Joppa ho nam baqa jitayin, ho no ham Jerusalemb baqca tayin.

¹⁷‍Ho mwwg ab Debid nyi hwlwngam xikanam hvb, Solomon Israel gvdaho nyoodo nyi doonbo mwlwngam xikanum, hoo hoqho nyiingv 153,600 go doonum.

¹⁸‍Mwv diisw gvdaho wlw baqm dvb 70,000 go hoo 80,000 go wlwngam pam dvb, hoo 3,600 go nyiilungam bulam bonam kaal nyig boam xuqlinum.