Read Nyishi 2 NWD 20 Bible Online

2 NWD 20 - Nyishi bible

2 NWD 20

¹Soq kokw so Moab la Ammon nyi tulug lvgab Meun nyi tuugin Jehosapatnvn ceekol nyob patab haanum.

²‍Nyi meeg Jehosapatnvn haal betamnum, “Idom hoqgv, sa-svlo lvvg hoqgv nam ceeko bov koi jaqb hoodu do; hoo kaato, bulv Hajajon-tamar ho doodo” (hoqhv Engedi).

³‍Ho Jehosapat bosnum hoo mwwg nyuqmv At Swn meegaqnum, hoo Juda mwlw ho dvma-twwmab vrr rwdwb hvl puiyam baqmnum.

⁴‍Hoo Juda hoqg nyi mwlwngv At Sw hoqgv svka kodwb hookumnum; Judag bopam mwlw ho bulv At Swg svkangam meegaqtab haanum.

⁵‍Hoo At Swg namlog nit baag ho, Juda gvla Jerusalem hoqgv nyi hookumko agaho Jehosapat daqnum,

⁶‍hoo benum, “Ngulug ab tulug Pwnbo At Swa, no ao lvpw ho doonbo Pwnbo maai yv? No nyob mwlwg lvpw-haty aoho pvvb bwwl doogdvn. Noqg alaqho huqlw ngvla atorv doodwn, ho ham hiyvkam nam daqtor nyoma dvn.

⁷‍No ngulug Pwnbo maai yv, soq gvda soq doonbo nyi tulungam noqg Israelwg nyiilu aga hoqgv ruqpaq tvl, hoo ham ngoqg ajin Abraham gv hosiq tulungam nwrba xaqb jinum?

⁸‍Hoo bulv hoqho doonum hoo noqg emin gab hoqho dvrwq namlo ak mvtwl begamv,

⁹‘Ciqcaq-bviyaqkv ngulug aoso, lyoqr orioqkv, pw-hwwnamv, ho iicw-tobumv, ho dwr-kanongv haab nyiloqkam, ngulv soq namlo gvla noqg agaho daqtayin—hoggab noqg eminv soq nam so doodwn—hoo ngulug hentwr-kaas hoqgv nam ngulv sogoq baloqkam, hoo no tapa tayin hoo ywwlin tayin.’

¹⁰‍Hoo sija kaato, Ammon la Moab hoo Seir Puutug nyi tulungv nyob pata do, hwdlo Israelv Ijipt gvda hoqgv lengyikho, hiyam no Israelam nyob pam mvmanum, hoo hiyam bulv apaqnum hoo twryum maanum—

¹¹‍kaato, no ngulam otu bwwsiq mvdwb noqg gumn jinam hoqgv bulv ngulam ruqpaq tado.

¹²‍Ngulug Pwnboa, no bulug aoho pw-hwwl laqm-baqm ram yv? Hoggab ngulam ceeko taab soq sipai koi jaqb hoodu bo sam ngulv ceekonan huqlw dook ma. Ngulv cengk ma hoggv ngulv nyitayin, hvbmabde ngulug vnyiqkv nam tuugab dvn.”

¹³‍Ho Judag nyi mwlwngv At Swg agaho bulug ko hoiyin tulu lvgab, bulug nywxw tulu lvgab hoo bulug ko tulu lvgab daqnum.

¹⁴‍Hoo At Swg Yalv Jakariyag ko tuup Jahajiyel, Benaia ko tuup, Jeiel ko tuup, Mattaniya ko tuup, Asapwg ko tuup tulu Lebi nyi akwg dookumko pengko aoho haanum.

¹⁵‍Hoo mwv benum, “Juda nyi mwlwngv hoo Jerusalemho doonbo mwlwngv hoo Lvpw at Jehosapat, tagabto: Soq sib At Sw nulam bedo, ‘Bos maabv hoo soq koi jaqb sipai mvqlw ko-gab hang homabv, hoggab nyob panamv nul gvma hvbmabde Pwnbov.

¹⁶‍Aaram mam bulam ceekol nyob patab ito. Kaato, Jijngam bulv wpeq layil caatayin. Nulv Jeruyelwg deexa-rarag dou-cagag lywpa lywtwr ho bulam kaapa tayin.

¹⁷‍Nulv soq nyob panam sam pama jaqkam alv. Hwngkwb daqto, nulv biimab daqto, hoo Juda ngvla Jerusalem ma, nulug kwlib At Swg ywwlinam mam kaato.’ Bos maabv hoo hang homabv. Aaram mam bulam ceekol nyob pato, hoo At Sw nulug lvgab dooba tayin.”

¹⁸‍Ho Jehosapat mwwg nyuqm mam ked ho pvxwnum, hoo Juda ngvla Jerusalemho doonbo mwlwngv At Swg agaho pvxwl hoo At Swn xumnum.

¹⁹‍Hoo Lebi nyob dvpar hoqgv Kahot la Kora nyi tulungv vcjaqb sogoql Israelwg Pwnbo At Swnvn daqtwl paqnum.

²⁰‍Hoo bulv ar komc gorabnum hoo Tekoag deexa-rara urab wnum. Hoo hwdlo bulv lvvgwb lengyikun, Jehosapat daqtwl hoo benum, “Juda ngvla Jerusalemho doonbo nyi mwlwngv, ngam tato! Nulug Pwnbo At Swn mwwjw to, hoo nulam mvko jitayin; mwwg nyiqry benbo tulungam tvjwto, hoo nulv niqtuq lengtayin.”

²¹‍Hoo hwdlo mwv nyiilu lvgab tomswr-honynam mam taxo kokw so, mwv At Sw gab bemin benboam la dvrwq yal dwwl miqnan hoqgv mwam paqb dvb xuqlinum, ho bulv sipai tulug agaho wnv hoo benam, “At Swn paqyalinco paqto, hoggab mwwg tumab abynamv nwrba gob dooyu dvn.”

²²‍Hoo hwdlo bulv bemin bel hoo paqrab yin, hiyv Judangam nyob patab haan boam, At Sw Ammon, Moab, hoo Seir Puutug nyi tulungam ceekol tooiya mvnum, ho bulam ruqpaqnum.

²³‍Hoggab Ammon nvla Moab nyi tulungv Seir Puutu ho doonbo nyi tulungam ceekol nyob panum, bulam twryumnum, hoo hwdlo bulv Seir ho doon boam mingtwr yin, bulv akwn-akwn twryum mins dvb svkanum.

²⁴‍Hwdlo Judangv deexa-rarag rvky ko soja ho haanum, ho bulv mvqlw bo sipai tulug dook daiyab kaanum, hoo kaato, hoq deela ho svmangv geqs-geqp tvl doonum; hoo akkam keleq kumanum.

²⁵‍Hwdlo Jehosapat la mwwg nyiilungv bulug dupum-dvrab pam naareq taab haanum, bulug pengko ho bulv naleqgo dvs-twwsam, vjam, xinam dupum-dvrab pam kaapanum, ho bulv atv baqla maadwb naaknum. Hoqho naleqgo naasv doonum, hoqgab bulv aal loum go hoq dupum-dvrab tulu ham naanum.

²⁶‍Aal loopy deenho bulv Beraka Lywpa ho hookumnum, hoqho bulv At Swn paqnum. Hoqgab soolo namgub hoqg nyookam Beraka lywpa hvl emin dvn.

²⁷‍Ho Juda gvla Jerusalem hoqg nyiicwr-cwrxiv, hoo Jehosapat peelo gob nyitwl Jerusalemb hemp-hvnyir lvgab bulv wkurnum, hoggab At Sw bulug ceebio tulungam mviya tvl bulug aoho hemp-hvnyir mvnum.

²⁸‍Bulv Jerusalemho haaikukho At Swg dvrwq namlob rwwxw xwwl hoo gungga twql hoo tuuly miql haanum.

²⁹‍Hoo At Sw Israelam ceekol nyob panbo ceebio tulungam nyob panam mam hwdlo bulv tapayin, gvdag lvpw-haty mwlwngv Pwnboam bosnum.

³⁰‍Hoqgab Jehosapat lvpw-haty ho swrsongv doonum, hoggab mwwg Pwnbov mwam taqg-loosaq mwlw hoqgv swrsob doomnum.

³¹‍Soq sib Jehosapat Judaho pvvb bwwl doognum. Hwdlo mwv pvvb bwwl doorab gviyikho mwv vnyw cammum leq nywng go akam kunum, hoo mwv Jerusalemho vnyw camnyi leq nywng go pvvb bwwl doognum. Mwwg ann hoqg eminv Ajuba, Silig ko nyemv.

³²‍Mwv mwwg ab Asag nyinam-wnam hvb nyinum hoo hoq hoqgv nyixiaq maab nyinum, At Swg kaagaho hoggv jvqtw dvn ham nyinum.

³³‍Hvbsujaqkam puutu aoho xumk tulungam naapaq maanum; hoqgab nyiilungv bulug hangam bulug ab tulug Pwnbo aoho jipaq maadanum.

³⁴‍Jehosapatwg bon nyinam mwlwngam, nyirab hoqgv nyinya namgub, Hananig ko tuup Jehug nwd xeqp ko ho xeqpnum, hoq tulu ham Israelwg Lvpw at tulug Kitap ho xeqpnum.

³⁵‍Soq kokw so Judag lvpw at Jehosapat Israelwg lvpw at Ahajiya nyic-nyiangam nyinbo lvgab nyibamnum.

³⁶‍Mwv mwam Tarsisib wn dvb iss jaaj pwk ho pwmin gvnum, hoo bulv jaajam Ejion-geber ho pwnum.

³⁷‍Ho Maresag Dodabahug ko tuup Eliejer Jehosapatnvn ceekol nyiqry benum hoo begamv, “No Ahajiya lvgab nyiba ko-gab, At Sw no hoggv pwnum haam twryum tayin.” Hoo jaajv yaqpianum hoo Tarsisib wla kumanum.