Read Nyishi 2 NWD 21 Bible Online

2 NWD 21 - Nyishi bible

2 NWD 21

¹Jehosapat mwwg ab tulug sinam hvb siknum hoo mwwg ab tulu lvgab Debidg bopam ho liiknum, hoo mwwg kwlib mwwg ko tuup Jehoram pvvb bwwl doognum.

²‍Mwv bor tulug doonum, Jehosapatwg ko tuup tulungv: Ajariya, Jehiel, Jakariya, Ajariya, Maikel, hoo Sepatiya; soq tulu si Judag lvpw at Jehosapatwg ko tuup tulungv.

³‍Judag gurum nwqtumnam bopam tulu lvgab, bulug ab bulam koi jaqb rupam, hunam, hoo xinam gumnam lvqc cinum, hvbmabde lvpw-hatiam Jehoramnvn jinum, hoggab mwv ko tuup vbw cociqkv.

⁴‍Hwdlo Jehoram mwwg abwg mvp kunam pvlw ho dooda kalam, mwv mwwg bor tulungam lyoqr orioq lvgab mengnum, hoo Israelwg saab tulu gon kam mengnum.

⁵‍Hwdlo Jehoram lvpw at gob swwrab gviyikho mwv vnyw cammum leq nywnyi go akam kunum, hoo Jerusalemho mwv vnyw piin go pvvb bwwl doognum.

⁶‍Hoo mwv Israelwg lvpw at tulug Ahabwg nombu ho nyinam-wnam hvb nyinum, hoggab mwwg nywxwngv Ahabwg ko nyemv. Hoo mwv At Swg kaagaho hoggv almadwn ham nyinum.

⁷‍Hvbsujaqkam At Sw Debidg nombungam twryum dvb mwwmanum, hoggab mwv Debid lvgab birnam pvvb mvnum, hoo mwv dingrnum lemp ak mwam la mwwg ko tuup tulungam nwrba xaqb jitayin.

⁸‍Mwwg moodho Idomv Judag pvvb haqpaqnum hoo bulug at hoqgv lvpw at ak mvnum.

⁹‍Ho Jehoram mwwg saab tulug lvgab hoo mwwg ceriot tulug lvgab wnum, hoo mwam doqyum bo Idom nyi tulungam la mwwg ceriot saab tulungam, mwv ai gorab layil patabnum.

¹⁰‍Hoqgab soolo namgub Idomv Judag pvvb uraho doomab haqpaq dvn. Hoq moodho Libna kam mwwg pvvb uraho doomab haqpaqnum, hoggab mwwg ab tulug Pwnbo, At Swngam mwv haqpaq kunum.

¹¹‍Hoq aoho, Judag diisw gvdag puutu aoho mwv xumk nyookam mvpnum hoo Jerusalemho doonbo tulungam asaq pwnboam xumgnum hoo Judangv gaqxar kunum.

¹²‍Hoo pui pota taqg nyiqry benbo Ilija hoqgv haanum, hoo begamv, “Soq sib noqg ab Debidg Pwnbo, At Sw bedo, ‘Noqg ab Jehosapatwg nyinam-wnam mam hvb Judag lvpw at Asag nyinam-wnam hvb no nyikma,

¹³‍hvbmabde Israelwg lvpw at tulug nyinam-wnam hvb nyipa ku hoo Juda gvla Jerusalemho doonbo tulungam asaq pwnboam Ahabwg nombungv xumnam hvb xumdwb nyinyoq paku, hoo noqg abwg nombu ho nam alyan bo noqg bor tulungam mengpaq paku,

¹⁴‍kaato, At Sw noqg nyiilungam, noqg ko tulungam, noqg nywxw tulungam, hoo noqg gumn doognam mwlwngam swlin-momin koi ak haam tayin,

¹⁵‍hoo noqg kepo ho no atv vc loodab hentwrnam vcam citayin, aal loog ya loog no vc cigwq tayin, ho noqg vxy-aiyeqkv sumlin maady deedib no vc tayin.’”

¹⁶‍Hoo At Sw Jehoramnvn hang lengnv Palistan nyi tulungam la Itiopiya nyi tulug ogum ho doonbo Arab nyi tulungam nwqduq tvl mwam ceekol nyob pamnum.

¹⁷‍Hoo bulv Judangam ceekonum hoo ham nyob panum hoo lvpw atwg namhog hog mwlw gumn kaapanam mam bulv baql wgnum, hoo mwwg ko tuup tulungam hoo mwwg nywxwngam bool wgnum, ho mwwg ko honyia Jehoahajnvn apaq twqpel, mwlwngam bool wgnum.

¹⁸‍Hoo soq kokw so At Sw mwam mwwg mwp lama dvb vcnam hoqgv aiyeq buqcil simnum.

¹⁹‍Vnyw nywnyig vtwr-anya moodho vc cil doogam gab mwwg aiyeqkv sumlinum, hoo mwv vcjaqb hentwr henl sinum. Mwwg nyiilungv mwwg ab tulungam xinam wm mam parnam hvb mwam xinam wm mam parmanum.

²⁰‍Hwdlo mwv pvvb bwwl doorab gviyikho mwv vnyw cammum leq nywnyi gob akam kunum, hoo Jerusalemho mwv vnyw piin go pvvb bwwl doognum. Hoo mwwg sigam gab nyi akkam mwwdwq maanum. Bulv mwam Debidg bopam ho liiknum, hvbmabde lvpw at tulug nyubu ho liimanum.