Read Nyishi 2 NWD 22 Bible Online

2 NWD 22 - Nyishi bible

2 NWD 22

¹Hoo Jerusalemho doonbo nyi tulungv mwwg kwlib mwwg ko tuup honyiangam Ahajiyanvn lvpw at gob mvnum, hoggab Arab nyi acam go svmcw ho haabnv ko tuup vbw tulungam mingtwrnum. Ho Judag lvpw at Jehoramwg ko tuup Ahajiya pvvb bwwl doognum.

²‍Hwdlo Ahajiya pvvb bwwl doorab gviyikho, mwv vnyw camnyi leq nywnyi go akamnum, hoo mwv Jerusalemho vnyw nywg pvvb bwwl doognum. Mwwg ann hoqg eminv Ataliya; Omrig ko hosiq hoqg ko nyemv.

³‍Mwv kam Ahabwg nombu hoq nyinam hvb nyinum, hoggab mwwg annv mwam nyic-nyia nyim dvb tomswr-hony bov.

⁴‍Mwv Ahabwg nombu hoqg nyinam hvb, At Swg kaagaho almanam nyinum. Hoggab mwwg abv sixo kokw so mwwg soq almab nyinam mwlw sam bulv mwam tomswr-hony bo tulungv.

⁵‍Mwv bulug tomswr-hony ko jijaq bvkam nyimin gvnum hoo Israelwg lvpw at Ahabwg ko tuup Joram lvgab Siriyag lvpw at Hajaelnvn Ramot-gilead ho nyob patab wmin gvnum. Hoo Siriya nyi tulungv Joramnvn un mvgnum,

⁶‍hoo hwdlo Siriyag lvpw at Hajaelnvn Rama ho ceekol nyob paiyikho Siriya nyi tulug mwam un mvgnam mam, unnam geem dvb lvpw at Joram Jejreel ho hookurl doonum. Hoo Judag lvpw at Jehoramwg ko tuup Ahajiya, Ahabwg ko tuup Joramnvn kaatab innum, hoggab mwv vc cil doonum.

⁷‍Hvbmabde Joramnvn mwwg haal vc kaanamv, Ahajiyanvn yuupaq mvdkub Pwnbov mwbwq kunamv. Hoggab hwdlo mwv hoqho haai yikho, hiyam At Sw Ahabwg imiq dvparam twryum mvdwb xuqp kunam mam, mwv Jehoram lvgab wnv Nimsig ko tuup Jehunvn wrwqnum.

⁸‍Hoo hwdlo Jehu Ahabwg nombungam pw-hwwl mingdu yukho, mwv Judag lvpw at ko tuupam la Ahajiyag bor tulug ko tuup tulungam Ahajiyanvn kaatab haan boam kaapanum, hoo mwv bulam mengnum.

⁹‍Mwv Ahajiyanvn meegaqnum hoo mwam mwv Samariya ho kvsil doon boam nootunum, hoo mwam mwv Jehu dookub boanum hoo mengnum. Bulv mwam liinum, hoggab bulv benum, “Mwv Jehosapatwg ko tuup hosiqkv, hiyv mwwg hvvjw lvgab At Swn meegaqnum.” Hoo Ahajiyag imiq dvpar hoqgv hiyvkam lvpw-hatiam pvvb bwwl doog nyok maanum.

¹⁰‍Ahajiyag ann Ataliya hwdlo mwnwg ko tuupam mengnam mam kaapa yin, mwn gorabnum hoo Judag nombu hoqg xinam imiq dvpar mwlwngam twryumnum.

¹¹‍Hvbmabde lvpw atwg ko nyem Jehosabeat, Ahajiyag ko tuup Joasnvn lvpw atwg ko tuup tulungam mengtaq tanam pengko hoqgv joosil jool wgnum, hoo mwn mwam la mwam kaanbo nwbwngam yubk cwwrwho pvvl apnum. Ho Lvpw at Jehoramwg ko nyem, Jehosabeat nyub Jehoiadag nywxwngv, hoggab mwn Ahajiyag bwrmv, mwam Ataliya hoqgv kvsnum, hoqgab mwn mwam mengm mvmanum.

¹²‍Hoo hwdlo Ataliya gvdangam pvvb bwwl doog yukho, mwnwg lvgab mwv vnyw nywx go At Swg dvrwq namlo uraho kvsil doognum.