Read Nyishi 2 NWD 23 Bible Online

2 NWD 23 - Nyishi bible

2 NWD 23

¹Hvbmabde vnyw kvn deen yukho Jehoiada haakam alwb nyinv hoo lwwgam gaml jinbo tulug lvgab, Jerohamwg ko tuup Ajariya, Jehohanan gv ko tuup Ismaiyel, Obedwg ko tuup Ajariya, Adaiyag ko tuup Maaseiya, hoo Jikri gv ko tuup Elisapat birnam pvvb ak mvnum.

²‍Hoo bulv Juda mwlw ho wnum hoo Judag bopam mwlw hoqg Lebi nyi tulungam, hoo Israelwg nyob dvparwg imiq hoqg peelo bo tulungam goqkumnum, hoo bulv Jerusalemho haanum.

³‍Hoo hookum bo mwlwngv birnam pvvb ak Pwnbog dvrwq namlo uraho mvnum. Hoo Jehoiada bulam benum, “Kaato, lvpw atwg ko tuupam! Debidg ko tuup tulug pagoqkam At Swg bep kunam hvb, mwam pvvb bwwl doog mvto.

⁴‍Nulv soq pagoq sam nyidwb nyitayin: nyub tulu nulv la Lebi nyi tulungv hwdlo Doonu aalam bon nyitab haaikam, oum hoqgv akwn toggoq rvky bob nyitayin,

⁵‍hoo asaq oum hoqgv akwn lvpw atwg namho hoo oum hoqgv akwn Toggoqg Gwwl ho daqtayin. Hoo nyiilu mwlwngv At Swg dvrwq namlo baag haaga ho daqtayin.

⁶‍Nyub tulungv la bon nyinbo Lebi nyi tulug lvvg hoqgv At Swg dvrwq namlob nyi akkam haam mvmabv. Bulv haanyi tayin, hoggab bulv dvrwqdvn, hvbmabde nyiilu mwlwngv At Swg bekgab lvvg ho daqtayin.

⁷‍Lebi nyi vxiv mwwg alaqho nwwxo-svtam bwwtwl lvpw atam doqyum tayin. Hoo hiyv lajaqkam nammwb haan boam mengtayin. Hwdlo lvpw atv haagwi hoo lengwi nyiyikam nulv mwwg lvgab dooba to.”

⁸‍Lebi nyi tulungv la Judag nyi tulungv nyub Jehoiadag gaml jikjaqb nyinum, hoo hiyv Doonu aalho bon nyitab haanbo mwlwngam, ho Doonu aalam bon nyitab haady bo mwlwngam, bulv nyiicwr-cwrxiv mwwg nyi tulungam boanum, hoo nyub Jehoiada jvqnyi gob dvparam mvpin-mvranam mam mvpia maanum.

⁹‍Hoo Pwnbog dvrwq namlo ho Debidg nwwxo ngamla anyo bo svtam tulungam nyub Jehoiada kepten tulungam jinum.

¹⁰‍Hoo mwv nyiilu mwlwngam mwwg alaqho nyiicwr-cwrxiv mwwg nwwxo-svtam mam bwwtwl nammwg nyooko daiya hoqgv nammwg nyoodum daiya namgub, hoo yugw bviywr-bvcarho hoo nammam rvkil daqgnum.

¹¹‍Ho bulv lvpw atwg ko tuupam boolwqnum hoo mwam ywr dumtupam tulwqnum hoo mwwg swwi-swwcangam pui betamnum. Hoo bulv mwam lvpw at gob beknum hoo Jehoiada la mwwg ko tuup tulungv mwam darxaqnum, hoo bulv benum, “Lvpw at swwiyu nvka!”

¹²‍Hwdlo Ataliya nyiilungv pojuq juql hur-marab dul lvpw atam paqnam mam tapayin, mwn nyiilug dookub At Swg dvrwq namlo urab haanum.

¹³‍Hoo hwdlo mwn kaanamv, lvpw at ak ab apag nyicw jaqb mvtwl haagag swwrwho daqnum, hoo kepten tulu ngvla tuuly miqnbo tulungv lvpw atwg bviywrho daqnum, hoo gvda hoqg nyiilu mwlwngv hemp-hvnyirl hoo tuuly miqnum, hoo bemin benbo tulungv rwwxw-gungga dumdum-taal mvl soonam mam soognum. Hoo Ataliya mwnwg vjam pumwq sunum hoo sogoqnum, “Nyipin namgo! Nyipin namgo!”

¹⁴‍Ho nyub Jehoiada sipai tulug kepten tulungam lvvgwb boolinum, bulam begamv “Mwnwn saab tulug pengko ho boolin to, hoo hiyv lajaqkam mwnwn wmin gvnboam lyoqr orioq lvgab mengpaq to.” Hoggab nyubv benum, “At Swg dvrwq namlo uraso mwnwn mengmabv.”

¹⁵‍Hoqgab bulv mwnwn alaq nootu layil; hoo mwnwn svpur haaga toggoqg lvpw atwg nammwb wgnum, hoo hoqho mwnwn mengknum.

¹⁶‍Hoo Jehoiada bulam At Swg nyiilub nyim dukub, At Sw gvla lvpw at gvla nyiilug pengko ho birnam pvvb ak mvnum.

¹⁷‍Ho gvda hoqg nyiilu mwlwngv Baalwg nammwb wnum hoo Baalwg nammam mviyaqnum; mwwg yugwngam hoo mwwg guss tulungam bulv vmwq yumgub mvnum, hoo bulv yugw agaho Baalwg nyub Mattannvn mengnum.

¹⁸‍Hoo Jehoiada At Swg dvrwq namlongam rvky bo nyi tulungam Lebi nyub tulug bek jaqb apnum, hoo At Swg boyuqnam akiam jim dvb, Lebi nyi tulungam hiyam Debid At Swg dvrwq namlo ho bon nyim dvb mwbwql apnum. Mojesg Pvvb ho xeqpnam hvb hemp-hvnyirl hoo bemin lvgab bemin bel Debidg nyicw jaqb nyinum.

¹⁹‍Mwv At Swg dvrwq namlo toggoqho rvky bo tulungam apnum, ho hiyv dvrwq maanbov hoqb akkam haanyi maanum.

²⁰‍Hoo mwv kepten tulungam, xinam nyi tulungam, nyiilu nyiit rad tulungam, hoo gvda hoqg nyiilu mwlwngam naanum, hoo bulv lvpw atwg At Swg dvrwq namlo hoqgv odum toggoq hoqgv lvpw atwg nam namgub soolwl bool ignum. Hoo bulv lvpw atam xinam pvlw ho doomnum.

²¹‍Hoqgab gvda hoqg nyiilu mwlwngv hemp-hvnyirnum, hoo lyoqr orioq lvgab Ataliyanvn mengxo kokw so bopamv cooikab doonum.