Read Nyishi 2 NWD 25 Bible Online

2 NWD 25 - Nyishi bible

2 NWD 25

¹Amajiya hwdlo mwv pvvb bwwl doorab gviyikho, mwv vnyw camnyi leq nywng go akamnum, hoo mwv Jerusalemho vnyw camnyi leq kiya go pvvb bwwl doognum. Mwwg annwg eminv Jehoaddan, Jerusalem hoqgv.

²‍Hoo mwv At Swg vnyiq kaagaho hoggv aldvn ham nyinum, hvbsujaqkam mwwg hvvjw hoqgv nyimanum.

³‍Hoo mwwg alaqho xinam huqlwngv haaxy kalam twqda, mwwg abam mengn bo mwwg nyera tulungam mwv mengnum.

⁴‍Hvbmabde mengn bog ko tulungam mwv mengmanum, hoggab soq sib At Swg gamlv Mojesg Pvvb Kitap lo bel appan, “Ko tulug nyigo gab ab tulungam mengmabv, ho ab tulug nyigo gab ko tulungam mengmabv, hvbmabde nyiicwr-cwrxiv mwwg atwg nyic nyigam gab sitayin.”

⁵‍Ho Amajiya Juda nyi mwlwngam goqkumnum hoo bulam bulug ab tulug nombu dvparwg pengko ho lwwyw pengko ho hoo lwwg pengko Juda gvla Benjamin nyob dvpar gab saab tulungam nyig mvdwb xuqnum. Mwv vnyw camnyi boam la hoq odum mam goqkumnum, hoo hoqho nyob palaq deen bov, nwwxongam la svtam mam bwwlaqbo nyi daalinamv 300,000 go doonum.

⁶‍Mwv Israel hoqgv atorb haakaml nyob pan boam rup 100 telent go jitwl 100,000 go ree goqanum.

⁷‍Hvbmabde Pwnbog nyi akv mwwg dookub haanum hoo mwam benum, “Lvpw ata, Israelwg sipai tulungam noqg lvgab wmin gvm mvmabv, hoggab At Sw Israel la Iprayim nyi tulu lvgab doomin gvma dvn.

⁸‍Hvbmabde wn, nyobam haakam gvdwl pato. Pwnbov nam ceebio agaho joopaq tayin hvl hoggub no hvb mwwsaml mwwdwn i? Hoggab Pwnbov svka dvb la joopaq dvb huqlwngv doodwn.”

⁹‍Hoo Amajiya Pwnbog nyi akam benum, “Hvbmabde hoggub ngulv mvta yukun ngo sipai gab rup lwwg telent go jiknam ham?” Pwnbog nyi akv birwqnum, “At Sw nam soq sam koi yaadwb jinyi dvn.”

¹⁰‍Ho Amajiya mwwg dookub Iprayim hoqgv sipai haanbo tulungam nammwb wkur mvdkub rooknum. Hoo bulv vcjaqb Judangam hang lengnum hoo hang lengjol nammwb wkur kunum.

¹¹‍Hvbmabde Amajiya haakamnum hoo mwwg nyiilungam Al Lywpab wnum hoo Seir nyi tulungam 10,000 go mengnum.

¹²‍Ho Juda nyi tulungv 10,000 go torndwb nyiingam nootunum hoo bulam wlw bwdw dwwtam ho boocanum hoo bwdw dwwtam hoqgv bulam joogeq loonum, hoo bulv vmwq-akaq gob nyiknum.

¹³‍Hvbmabde Amajiyag nyob pam mvmab wkur mvnam sipai tuluhv Judag bopam tulungam Samariya hoqgv Bet-horon namgub paiyaq-pacaqnum, hoo 3,000 go nyiilungam mengnum hoo dupum-dvrab pam naleqgo naal wgnum.

¹⁴‍Amajiya Idom nyi tulungam mengpe kul haaxo kokw so, mwv Seir nyi tulug pwnbo murtiam baqanum hoo ham mwwg pwnbo tulu gob mvpnum hoo hoq tulu ham xumnum, hoo hoq tulu ham aky jinum.

¹⁵‍Hoqgab At Sw Amajiyanvn vcjaqb hang lengnum hoo mwwg dookub nyiqry benbo ak kanamnum, ho mwam benum, “Hoggub no nyiilug pwnam pwnbo tulu ham xumdwn hiyv bulug at nyiilungam noqg alaq hoqgv naalin nyomanum?”

¹⁶‍Hvbmabde hoqhvb mwv agam doodu yukho, lvpw atv mwam benum, “Ngulv nam xinam tomswr-hony bo gob mvn mvi yv? Bekmab! Hoggub nam mengk tayin i?” Hoqgab nyiqry benbov bekmanum, hvbmabde benum, “Ngo cengdo Pwnbov nam twrdkub mwwr pakun, hoggab no soq sam nyipa ku hoo ngoqg tomswr-honynam mam tak ma.”

¹⁷‍Ho Judag lvpw at Amajiya tomswr-honyam naanum hoo Israelwg lvpw at Jehu ko tuup hosiq hoqg Jehoahajwg ko tuup Jehoasnvn pui bilwql begamv, “Haato, ngunyiv akwn-akwn nyuqm mam kvvrwq mins tuj.”

¹⁸‍Hoo Israelwg lvpw at Joas Judag lvpw at Amajiyanvn gomcwr bilwql kanamnum, “Lebanon aoho doonbo taa soog Lebanon aoho doonbo sidar svvnam pui bilwql begamv, ‘Noqg ko nyem mam ngoqg ko tuup nywxw gab jila bv hvl benum,’ hoo Lebanonwg nyoro svdin ak hoqb sool wpeq banv hoo taa-ngam caajabnum.

¹⁹‍No bedo, ‘Kaato, ngo Idom mam mengnum,’ hoo noqg hangv nam lordu busu mvgdo. Hvbmabde namho dooto. Hoggub no atv la Judangam noqg lvgab yoql mvdwb vs-axaqkam hoqpup sudwn i?”

²⁰‍Hvbmabde Amajiya tamanum, hvbmabde hoqhv Pwnbo galoqkv haanum, ho mwv bulam bulug ceebio tulug alaqho jilwq dvb nyinum, hoggab bulv Idomg pwnbo tulungam xumnum.

²¹‍Hoqgab Israelwg lvpw at Joas wnum, hoo mwv la Judag lvpw at Amajiya, Juda gvdag Bet-semes ho wrwql nyob pamin sunum.

²²‍Hoo Judangam Israelv mviyanum, hoo nyiicwr-cwrxiv mwwg nammwb keknum.

²³‍Hoo Israelwg lvpw at Joas Judag lvpw at Ahajiyag ko tuup hosiq, Joas gv ko tuup Amajiyanvn Bet-semes hoqgv nootul nyumwb boonum, hoo mwam Jerusalemb boanum hoo Iprayim Toggoq hoqgv Cuukiq Toggoq namgub Jerusalem bvliam 400 kiubit go mvpianum.

²⁴‍Hoo mwv Pwnbog dvrwq namlo uraho, Obed-edomwg rvkil doognam, gumn hog mwlw hunam hoo rupam, hoo dupum-dvrab kaapanam hog mwlwngam naanum. Hoo mwv lvpw atwg nam uraho gumn doon boam, nyumwb doon boam naareq layil Samariyab wkurnum.

²⁵‍Judag lvpw at Joas gv ko tuup Amajiya, Israelwg lvpw at Jehoahajwg ko tuup Joas gv sixo kokw so vnyw camleq nywng go swwl doonum.

²⁶‍Amajiyag asaq nyinam mwlwngam, Judag Lvpw at tulug Kitap xeqp ko ho xeqp maap nvi yv?

²⁷‍Hwdlo mwv At Sw galoqkv aado yukho bulv mwam Jerusalemho ceekol hima bwwrab yin, hoo mwv Lakiswb keleqnum. Hvbmabde bulv mwwg kokwb Lakis namgub nyi kanam tvl hoo mwam hoqho mengmnum.

²⁸‍Hoo bulv mwam svpur tuluho baqanum; hoo mwwg ab tulug lvgab Debidg bopam ho mwam svma liiknum.