Read Nyishi 2 NWD 28 Bible Online

2 NWD 28 - Nyishi bible

2 NWD 28

¹Hwdlo Ahaj pvvb bwwl doorab gviyikho, mwv vnyw camnyi go akamnum, hoo mwv Jerusalemho vnyw camleq nywx go pvvb bwwl doognum. Hoo mwv At Swg vnyiq kaagaho hoggv aldvn, mwwg ab Debidg nyinam hvb nyimanum,

²‍hvbmabde mwv Israelwg lvpw at tulu nyinam wnam hvb nyinum. Mwv lyoqdwr hoqgv Baal gab guss tulungam mvnum,

³‍hoo Hinnomwg ko tuupwg Lywpa ho hiyvg nyob tulungam At Sw Israelwg nyiilu aga hoqgv ruqpaqnam nyob tulug bulum-kac dvb nyinam hvb mwv mwwg atwg ko tuupam wm parl aky jinum.

⁴‍Hoo mwv puutu aog xumk nam tuluho hoo yorn yorxho hoo jeenbo svvn nywxwg niikum ho pwram la akiam jinum.

⁵‍Hoqgab mwwg Pwnbo At Swg alaqkv mwam Siriyag lvpw at urab jilwqnum, ho mwv mwam mviyanum hoo mwwg nyiilungam naleqgo nootul nyumwb booknv bulam Damaskas ho boanum. Mwam Israelwg lvpw atwg alaq hookam jilwqnum, ho mwam vcjaqb nyob panum.

⁶‍Remaliyag ko tuup Peka Juda hoqgv aal lookin ho 120,000 go mengnum, hoq nyi mwlw hv atorl haakamb nyob paky bov, hoggab bulug ab tulug Pwnbo At Swn bulv ludum paku.

⁷‍Hoo Iprayim hoqg atorbo nyi Jikri, lvpw atwg ko tuup Maaseiya nvla lvpw namlongam gaml jinbo Ajrikam nvla lvpw atam dvqsinl gaml-ator doogbo Elkananvn mengnum.

⁸‍Israel nyi tulungv bulug lvqry-laqsongam, nyem tulungam, ko tuup tulungam, la ko nyem tulungam 200,000 go nyumwb booknum. Bul galoqkv bulv naleqgo dupum-dvrab nvkam naareqnum hoo ham Samariyab baqnum.

⁹‍Hvbmabde At Swg nyiqry benbo ak doonum, mwwg eminv Oded, hoo mwv Samariya ho haanbo sipaiyam kvvrwqtab wnum hoo bulam benum, “Kaato, nulug ab tulug Pwnbo At Sw Judangam hang lengnum, ho mwv bulam nulug alaqho jilwqnum, hvbmabde bulam nulv doa aoho svmangv cvvc daqdwb mengpa ku.

¹⁰‍Hoo nulv sija Juda la Jerusalem nyiilungam, nyegangam la nyem mam nulug raasur-nvsur gob bwwdwb mwwdo. Nulug Pwnbo At Swn nulv ceekol nyic nyima sui yv?

¹¹‍Ho sija ngam tato, hoo nulug lvqry-laqsongam hiyam nulv nyumwb booknam tulu ham wkur mvtku, hoggab At Swg hang lingtwrnamv nulug aoho haata do.”

¹²‍Johanan gv ko tuup Ajariya, Mesillemot gv ko tuup Berekiya, Sallum gv ko tuup Jehijkiya, hoo Hadlai gv ko tuup Amasa, Iprayim hoqg peelo bo nyi tulungv nyob pak hoqgv hoodu boam daqrab ceekonum

¹³‍hoo bulam benum, “Nulv nyuum tulungam soqb boa maabv, hoggab ngulug nyic nyidul nyixiaql doodunam aoho nulv At Swg ceekonam mam ngulug ao lo vbw tagdo. Hoggab ngulug nyixiaqnamv vcjaqb koi lvvxo tvl doodo, hoo Israelwg ao lo vcjaqb hang lingtwrl ceekonamv doodo.”

¹⁴‍Hoqgab sipai tulungv nyuum tulungam la naareql baqnam mam lvpw atwg ko tuup gvla hookum bo agaho apaqnum.

¹⁵‍Hoo emin mingpa kunum nyi tuluhv daqrabnum hoo nyuum tulungam naanum, hoo bulug pengko ho talo bo mwlwngam bulug naareql baqnam vj hoqgv koomnum. Bulam bulv vj koomnum, bulam samtaqnan tulu ham jinum, ho bulam dvs-twwsam jinum, hoo bulam kuty neenum, hoo bulug pengko ho laanyi maanboam svdam ho baqmnum, ho bulug imiq dvpar dookwg Jeriko, pvng svvn dookwg bopam ho bulam baqanum. Ho bulv Samariyab wkur kunum.

¹⁶‍Hoq moodho Lvpw at Ahaj Assiriyag lvpw atam svka gab pui kanamnum.

¹⁷‍Hoggab Idom nyi tulungv lokta nyob pvlwqnum hoo Judangam mviyanum hoo nyuum tulungam bool wgnum.

¹⁸‍Hoo Palistan nyi tulungv Judag Sepela la Negeb bopam tulungam nyob panum, hoo Bet-semes, Aijalon, Gederot, Soko la hoqg nampam tulungam, hoo Gimjo la hoqg nampam tulungam naaknum. Hoo bulv hoqho nvmcw dooknum.

¹⁹‍Israelwg lvpw at Ahaj gab At Sw Judangam yan dvb mvnum, hoggab mwv Judangam nyic nyim dvb la At Swn mwwjw mvma dvb nyignum.

²⁰‍Hoqgab Assiriyag lvpw at Tiglat-pileser mwam ator svka taab haamanum hvbmabde mwam hentwr hem dvb ceeko taab haanum.

²¹‍Hoggab Ahaj At Swg dvrwq namlo hoqgv hoo lvpw atwg nombu hoqgv hoo saab tulu hoqgv gumnam naanum, hoo Assiriyag lvpw atam aky jinum, hvbmabde hoqhv mwam svka kumanum.

²²‍Soq Lvpw at Ahaj akin si—mwwg vs-axaq moodho vi yaiya go At Swn mwwjw maanum.

²³‍Mwam mviya mvgbo Damaskaswg pwnbo tulungam mwv pwr jinum hoo benum, “Siriyag lvpw at tulungam pwnbov bulam svkanum, ngo bulam pwr jitayin ho bulv ngam svka yin pv.” Hvbmabde hoq tuluhv mwam la Israel mwlwngam yuupaq gvnum.

²⁴‍Hoo Ahaj Pwnbog dvrwq namlog dupum-dvrab mwlwngam nookumnum hoo Pwnbog dvrwq namlog dupum-dvrab tulungam vmwq yumgub pvmwqnum, hoo mwv At Swg dvrwq namlog viyap pam mutumnum, hoo Jerusalem cuukiq-bvvrw mwlwho mwv atv yugw tulungam mvnum.

²⁵‍Mwwg ab tulug Pwnbo, At Swn hang nyiluq dvb, Judag bopam pvmx ho mwv asaq pwnbo tulungam aky jil xumk nyookam mvpnum.

²⁶‍Mwwg asaq hog mwlw nyinam mam hoo mwwg nyirab hoqgv nyinya namgub hoolu deedy nyinam mam, kaato, hoq tulu ham Juda gvla Israelwg Lvpw at tulug Kitapho xeqp pakun.

²⁷‍Hoo Ahaj mwwg ab tulug sinam hvb siknum, hoo mwam Jerusalem bopam ho bulv liiknum, hoggab bulv mwam Israelwg lvpw at tulug nyubu uraho bvqlwq kumanum. Hoo mwwg kwlib mwwg ko tuup Hejekiya pvvb bwwl doognum.