Read Nyishi 2 NWD 29 Bible Online

2 NWD 29 - Nyishi bible

2 NWD 29

¹Hwdlo Hejekiya pvvb bwwl doorab gviyikho, mwv vnyw camnyi leq nywng go akamnum, hoo mwv Jerusalemho vnyw camnyi leq kiya go pvvb bwwl doognum. Mwwg ann hoqg eminv Abija, Jakariyag ko nyemv.

²‍Hoo mwv At Swg vnyiq kaagaho hoggv aldvn, mwwg ab Debidg nyinam ham nyinum.

³‍Mwwg otuq vnywg pvvb bwwl doog yukho otuq pool ho, mwv At Swg dvrwq namlog viyap tulungam mvkonum hoo hoq tulu ham mvdarnum.

⁴‍Mwv nyub tulungam la Lebi nyi tulungam bulam hookum mvnum dou-cagag baag daiya ho

⁵‍hoo bulam benum, “Lebi nyi tulungv ngam tato! Nulv atv garxaqto, hoo nulug ab tulug Pwnbo At Swg dvrwq namlongam garxaqto, Dvrwq dook hoqg kac-kanyiaqkam lvvgwb baqlin xaato.

⁶‍Ngulug ab tulungv dengkib nyik maanum hoo ngulug Pwnbo At Swg kaagaho hoggv almadwn ham nyinum. Bulv mwam apaq paku hoo bulug nyuqm mam At Swg dook hoqgv moiyeq paku hoo langkwb pwrkur paku.

⁷‍Bulv dvrwq namlog viyap pam tulungam ciqtumnum hoo lemp tulungam naapaq paku hoo Israelwg Pwnbo Dvrwq Dook ho sulum mam mwwk ma hoo boyuqnam akiam jik ma.

⁸‍Hoqgab At Swg hang lingtwrnamv Juda gvla Jerusalemho haanum, hoo mwv bulam koor-kaaraq dvb la lomngaq dvb, hoo nyirjnam dupum-dvrab gob mvpa ku, noqg atwg vnyiqkv no kaas gvdo.

⁹‍Hoggab kaato, ngulug ab tulungam lyoqr orioq hoqgv mengnum, hoo ngulug ko tuup tulungam hoo ngulug ko nyem tulungam hoo ngulug nywxw tulungam nyumwb boog nukba.

¹⁰‍Ho sija ngoqg hangv Israelwg Pwnbo, At Sw lvgab birnam pvvb ak mvtayin, ho mwwg vc loodab hang lengnamv ngulug soqgv wpaq tayin.

¹¹‍Ngoqg ko tuup tulu nga anam-acam maabv, hoggab At Sw nulam mwwg agaho daqtwl bon nyim dvb xuqpa kun hoo mwwg bon nyinbo tulu gob la mwam aky jinbo tulu gob daalin paku.”

¹²‍Ho Lebi nyi tulungv gorabnum, Kohat gv nyob dvpar hoqg ko tuup tulungv, Amasai gv ko tuup Mahat, hoo Ajariya gv ko tuup Joyel; hoo Merari gv ko tuup tulungv, Abdi gv ko tuup Kis, hoo Jehallelel gv ko tuup Ajariya; Geronwg nyob dvpar hoqg ko tuupv, Jimma gv ko tuup Joa, hoo Joa gv ko tuup Iden;

¹³‍hoo Elijapan gv ko tuup tulungv, Simri la Jeuyel; hoo Asap gv ko tuup tulungv, Jakariya la Mattaniya;

¹⁴‍hoo Heman gv ko tuup tulungv, Jehuel la Simei; hoo Jedutun gv ko tuup tulungv,, Semaiya la Ujjiyel.

¹⁵‍Bulv bulug vbw-bor tulungam goqkumnum hoo bulv atv atam garxaqnum hoo At Swg gomcwr hoqgv lvpw atv gaml jinam hvb bulv At Swg dvrwq namlongam wnv mvxaqnum.

¹⁶‍Ho Nyub tulungv At Swg dvrwq namlo ura jaqb haanv ham mvxaqnum, hoo At Swg dvrwq namlog baagho dvrwq namlo uraho kac-kanyiaq kaapanam mwlwngam bulv lvvgwb baqlinum. Hoo ham Lebi nyi tulungv baqlayil Kidron kucwb baqpaqnum.

¹⁷‍Bulv otuq poolwg otuq aalho garxaqnum, hoo poolwg piin aalho bulv At Swg dvrwq namlog baagho haanum. Ho piin aalho bulv At Swg dvrwq namlongam garxaqnum, hoo bulv otuq poolwg camleq loox aalho mvnyanum.

¹⁸‍Ho bulv lvpw at Hejekiya dookub wnv hoo benum, “Ngulv At Swg dvrwq namlongam, boyuql aky jik yugwngam hoo hoqg dupum-dvrab tulungam, hoo wtw huc joopko tebolam hoo hoqg dupum-dvrab mwlwngam mvxaq pakun.

¹⁹‍Lvpw at Ahaj mwwg pvvb bwwl doog yukho mwv dengkib nyimab dupum-dvrab mwlwngam kacdvb mvknam tulungam, ngulv mwx-mvaql hoo garxaq pakun, hoo kaato, hoq tuluhv At Swg yugw agaho doodkun.

²⁰‍Ho lvpw at Hejekiya ar komc gorabnum hoo bopamg saab tulungam goqkumnum hoo At Swg dvrwq namlob caanum.

²¹‍Hoo bulv lvpw-haty hoo dvrwq namlo gab hoo Judag nyic gab aky jitab hvvb kvn go, yaap tvmwr kvn go, sviya kvn go, hoo sibin bimp kvn go boanum. Hoo mwv nyub Aaron gv ko tuup tulungam At Swg yugw ho aky jim dvb gaml jinum.

²²‍Hoqgab bulv hvvb tulungam patabnum, hoo nyub tulungv uiyam nvvrwqnum hoo ham yugwngam pwqyaqnum. Hoo bulv yaap tvmwram tulungam patabnum hoo bulug uiyam yugw ho pwqyaqnum. Hoo bulv sviya tulungam patabnum hoo bulug uiyam yugw ho pwqyaqnum.

²³‍Ho sibin tulungam nyic aky gab lvpw at gvla hookumbo dookho boanum, hoo bulug alaqkam bulug aoho idaqnum,

²⁴‍hoo Israel mwlwngam darxaq dvb nyub tulungv hoq tulu ham patabnum hoo nyic akiam hoqg ui lvgab yugw ho jinum. Hoggab boyuqnam akiam la nyic akiam Israel mwlw gab jim dvb lvpw atv gaml jinum.

²⁵‍Hoo Debidg gaml jik jaqb, hoo lvpw atwg nyiqry benbo Gadwg benam hvb hoo nyiqry benbo Natanwg benam hvb, mwv Lebi nyi tulungam At Swg dvrwq namlo ho ludum pup tubn nanam, rwwxwngam hoo gunggangam jitwl bulam pvvnum, hoggab At Sw mwwg gamlam nyiqry benbo tulug lvgab jinum.

²⁶‍Lebi nyi tulungv Debidg yaldwwl miqnan tulungam hoo nyub tulungv tuuliam bwwtwl daqnum.

²⁷‍Ho Hejekiya boyuqnam akiam yugw ho jim dvb gaml jinum. Hoo hwdlo boyuqnam akiam jirab yin, At Swg beminam kam, hoo tuuliam la Israelwg lvpw at Debidg yaldwwl miqnan tulu lvgab bemin benum.

²⁸‍Hookum bo mwlwngv xumnum, hoo bemin benbo tulungv beminam benum hoo tuuly miqn bo tulungv tuuliam miqnum. Boyuqnam akiam guiyum maady deedib hoq tulu ham nyil doonum.

²⁹‍Hwdlo akiam jiyum yin, lvpw atv la mwwg lvgab dooba bo tulungv bulv atv dumpo pvxwl hoo xumnum.

³⁰‍Hoo lvpw at Hejekiya la saab tulungv Lebi nyi tulungam At Swn paqnam beminam Debid gvla nyiqry benbo Asapwg gomcwram bemnum. Hoo bulv paqnam beminam hemp-hvnyir lvgab benum, hoo bulv dumpo pvxwl hoo xumnum.

³¹‍Ho Hejekiya benum, “Nulv atv sija At Sw gab garxaq pakun, Ogumb hvvnwqto; At Swg dvrwq namlob pwr akiam la paqyalinco paqnam akiam bwa to.” Hoo hookumbo mwlwngv pwr akiam la paqyalinco paqnam akiam bwanum, hoo hiyvg hangv mwwlwq bov boyuqnam akiam bwanum.

³²‍Hookumbo tulug boyuqnam aky bwanamv hvvbv 70 go, yaap tvmwrv 100 go, hoo sviyangv 200 go, soq mwlw sam At Swg boyuq aky gab bwanum.

³³‍Hoo garxaqnam akiv hvvb 600 go hoo sviyangv 3,000 go nyinum.

³⁴‍Hvbmabde nyub tulungv vigo anyonum hoo boyuqnam aky mwlwngam vpin diinyi kumanum, hoqgab asaq nyub tulungv bulv atv garxaqnum, hwdlo bonam nyinya maady deedib, bulug vbw-bor Lebi nyi tulungv bulam svkanum—hoggab atv atam nyub gob garxaqbo tulu ham, Lebi nyi tulug hangv pwbwb dvrwq yaanum.

³⁵‍Soq naleqgo boyuqnam aky jinam lvvg ho, hoqho swrso aky gab ox jinamv vigo doonum, hoo boyuqnam aky jinam lvgab hoqho twws akiv kam doonum. Soq sib nyil At Swg dvrwq namlog bon nyinam mam lokta mvdarl nyirabnum.

³⁶‍Hoo Hejekiya la nyiilu mwlwngv hemp-hvnyirnum, hoggab Pwnbov nyiilungam soq mwlw sam nyebia jaqb mwx-mvaq mvdwb svkanum.