Read Nyishi 2 NWD 3 Bible Online

2 NWD 3 - Nyishi bible

2 NWD 3

¹Ho Solomon Moriya Puutu ho At Swg dvrwq namlongam mvrabnum, hogloq ho At Sw mwwg ab Debidnvn daqlinl kaakinum, ho Jebus nyi akwg Ornanwg jurpy deela nyookho Debidnvn xuqlinum.

²‍Mwwg vnyw nywpy go pvvb bwwl doog yuk pool bvrnyi deen ho mwv nammam mvrabnum.

³‍Solomon soq sib xika layil Pwnbog dvrwq namlongam mvrabnum: Aasongv, kolwg kiubit xicwb, camx kiubit go, hoo taqtv camnyi kiubit go.

⁴‍Nam haaga hoqg baag lvpangv camnyi kiubit aasonum, nammv hwdgo taqt dvn hwdkalam go taqt dvb mvnum, hoo hoqg aongv 120 kiubitnum. Mwv nam urangam loodwrbo hun lvgab pioqlubnum.

⁵‍Baag toggoqkam mwv saipres svvda lvgab mvnum hoo ham albo hun lvgab pioqlubnum hoo hoq aoho pvng svvnam tvqyw-taqcnv gai hvb tvqsiq-taqmeq tvlwqnum.

⁶‍Mwv nammam xinam wlw tulu lvgab oj mwlwqnum. Hoq oj mwlwqnam hun hv Parbaim hunam mwlwqnum.

⁷‍Hoqgab mwv nammam hun lvgab pioqlubnum—hoqg xaapo tulungam, hoqg baag haagangam, hoqg cwqc tulungam, hoo hoqg viyap tulungam—hoo mwv cwqc tuluho cerubim mam tvqyw-taqcil tvqlwqnum.

⁸‍Hoo mwv Dvrwq Kwrwq Dookam mvnum. Hoqg aasongv nam taqt hwdkalamnam, hv camnyi kiubit go, hoo hoqg taqtv camnyi kiubit go. Mwv albo hun 600 telent go hoqham pioqlubnum.

⁹‍Hun xublo sookin hoqg vgwngv camng sikilnum. Hoo mwv odum daiya pwqlw tulungam hun lvgab pioqlubnum.

¹⁰‍Dvrwq Kwrwq Dook ho svvda lvgab cerubim vnyi go mwiyw-mvcnum hoo ham hun lvgab pioqlubnum.

¹¹‍Cerubimwg lvkin gob alap labdanam tulungv camnyi kiubitnum: akin alapv nam cwqc ho labdaqnamv ang kiubitnum, hoo hoqg alap labgwn hv asaq cerubim alapho labdaqnamv ang kiubitnum;

¹²‍hoo soq cerubg alap labgwn nam cwqc ho labdaqnamv ang kiubitnum, hoo alap labgwn hvvkam ang kiubitnum, ho hoqhv otuq cerubg alapam labdaqnum.

¹³‍Soq cerubimwg alap tulungv labdanamv camnyi kiubitnum. Cerubim mam bulug lvpia hoqgv baag lvpa raab nywwrwq tvl daqmnum.

¹⁴‍Hoo mwv yajbo, yaj jeemo-jeemlo hoo lwwcw cwwmo-cwwlo hoo topum tan-tacaqkam pulubnanam mvnum, hoo mwv cerubim aoho bon nyinum.

¹⁵‍Nam haagaho mwv rwwda dvvnyi go cammum leq ang kiubit ao dvb mvnum, dvvnyi-dvvnyig niqtuq aoho dumtup purlwqnam hv ang-ang kiubitnum.

¹⁶‍Mwv gaiyam tvsw hvb nyidwb mvtwl hoo hoq tulu ham rwwda tulug niqtuq ho tvlwqnum, hoo mwv annar aaxiam lwwgwb mvtwl hoq tulu ham gai aoho apnum.

¹⁷‍Mwv rwwda tulungam dvrwq namlog haaga ho diipnum, daagwn nyooko daiya ho, daagwn nyoodum daiya ho diipnum; ho nyooko daiya gam mwv Jakin hvl eminum, hoo nyoodum daiya gam Boaj hvl eminum.