Read Nyishi 2 NWD 30 Bible Online

2 NWD 30 - Nyishi bible

2 NWD 30

¹Israelwg Pwnbo, At Sw gab Dvtv Durum dvnam mam At Swg dvrwq namlo Jerusalemho haal soom dvb, Hejekiya Israel la Judag mwlwngam pui kanamnum, hoo Iprayim la Manasse ngamkam pui pota tulungam xeqnum.

²‍Hoggab lvpw at la mwwg lvpw atwg ko tuup tulungv hoo Jerusalemho hookumbo mwlwngv tomswr-hony kunv pool bvrnyi deenam Dvtv Durum mam dvdwb pvvb mvknum—

³‍bulv hoq moodho ham nyig dvb nyila kumanum hoggab atv atam garxaqbo nyub tulungv anyonum, ho nyiilu ngvkam Jerusalemho hookum maanum—

⁴‍hoo hoqhvb hwwbwqnam mam lvpw atv la hookum bo mwlwngv kvtaqdo hvl loonum.

⁵‍Israelwg Pwnbo, At Sw gab Dvtv Durum dvnam mam Jerusalemho nyiilungam haal soom dvb, bulv Beerseba hoqgv Dan namgub, Israel mwlw ho pui baqm dvb kanamnum, hoggab bulv xeqpko jaqb lwxiam ham nyila maanum.

⁶‍Hoqgab Israel gvla Juda mwlw ho lvpw at gvla mwwg lvpw atwg ko tuup hoqg pui pota xeqnam mam pui baqmnum, ho lvpw atv gaml jil begamv, “Israelwg nyiilunga, Abraham, Aisak, hoo Israelwg Pwnbo At Sw dookub hookur tuku, ho Assiriya lvpw atwg alaq hoqgv keleql ho boumnam tulu dookub mwv lokta tobkur tayin.

⁷‍Nulug ab tulu ngvla nulug vbw-bor tulungv bulug ab tulug Pwnbo At Swnvn mwwjw maab nyinam hvb nyimabv, mwv bulam laqm-baqmnam mam nulv atv kaas do.

⁸‍Nulug ab tulug tamynam hvb tamy maabv, hvbmabde nulv atv At Swn bugil swwto hoo nwrba xaqb doom dvb mwwg garxaqnam dvrwq namlo ho haato, hoo nulug Pwnbo At Swn bon nyijto, ho mwwg hang lingtwrnamv nul galoqkv aadob wleq tayin.

⁹‍Hoggab nulv At Sw dookub hookur baloqkam, nulug vbw-bor tulungam hoo nulug ko tulungam nyumwb boonbo tuluhv hang biil aya mwwpa tayin hoo soq gvda so hookur mvtayin. Hoggab nulv mwwg dookub hookur baloqkam, nulug Pwnbo At Sw anya bvla aya mwwpa bov hoo mwwg nyuqm mam nulug daiyab pwrj tayin.”

¹⁰‍Hoqgab bopam-bopamb Iprayim la Manasse gvdaho puiyam baqmnum, hoo puiyam Jebulun namgub baqmnum, hvbmabde bulam bulv nyirjnv hoo benyi-beyal hoo bej-beparnum.

¹¹‍Hvbmabde Aser, Manasse, hoo Jebulun nyob tulu hoqg nyi tuugin atv atam yannum hoo Jerusalemho haanum.

¹²‍Hoggv lvpw atv la lvpw atwg ko tuup tulungv At Swg gomcwr hoqgv gaml jiknam mam, Pwnbog alaqkv Judangam hang pwkin gob nyim dvb ator jinum.

¹³‍Hoo Jerusalem Opap kiilwq maanam Durum Wtwngam dvdwb nyiilungv naleqgo pool bvrnyi deenho hookumnum, koi jaqb hookumnum.

¹⁴‍Bulv Jerusalemho yugw tulungam naapaq dvb bonam nyinum, hoo sulum mwwk yugw tulungam bulv naapaq layil ham Kidron lywpa uraho joopaqnum.

¹⁵‍Hoo pool bvrnyig camleq loopy aalho bulv Dvtv Durum gab sviya tulungam patabnum. Hoo nyub tulu ngvla Lebi nyi tulungv hvnywnum hoqgab bulv atv atam garxaqnum hoo At Swg dvrwq namlo urab boyuqnam akiam bwanum

¹⁶‍Pwnbog nyiig Mojesg Pvvb bekjaqb bulv bulug dookho doonum. Lebi nyi tulug alaq hoqgv nvvrwqnam uiyam nyub tulungv hurnum.

¹⁷‍Hoggab hookumbo pengko ho atv atam garxaq maata bov naleqgo doonum. Hoqgab dvrwq maanbo nyiicwr-cwrx gab Lebi nyi tulungv Dvtv Durum sviyangam, At Swg eminho garxaq mvdwb patab nyinum.

¹⁸‍Nyiilu mvqlw yaagwn, Iprayim, Manasse, Issakar hoo Jebulun nyob tulu hoqgv bulv atv dvrwq dvb mvs maanum, hvbsujaqkam bulv bepko jaqb Dvtv Durum mam nyima sujaqkam hvraqb durum mam dvnum. Hoggab Hejekiya bul gab swgw jil hoo begamv, “Albo At Sw nyiicwr-cwrxiam paqnyi jignvka

¹⁹‍ho dvrwq namlog pvvb tulug nyicwb bulv dvrwq kuma jaqkam, hiyvg hangv mwwg ab tulug Pwnbo, At Swn, Pwnboam meegaq dvn.”

²⁰‍Hoo At Sw Hejekiyanvn tapanum hoo nyiilungam mwpnum.

²¹‍Hoo Israel nyiilungv hiyv Jerusalemho Opap Kiilwq maanam Wtw Durum mam dvdwb doonbo mwlwngv ham hemp-hvnyirl aal kvn go nyil doonum, hoo Lebi nyi tulu ngvla nyub tulungv At Swn bulug hog mwlw ator hoqgv At Swn aal looxiam bemin bel paql doonum.

²²‍Hoo Hejekiya Lebi nyi tulug pwbw aljaqb At Sw gab bon nyinam mam paql haakam bepanum. Ho swrso pwr akiam jil hoo bulug ab tulug Pwnbo At Swn paqyalinco paql, bulv durum dvl soominam mam aal kvn go dvl doonum.

²³‍Ho hookum bo mwlwngv lvkin gob aal kvn gota durum mam dvdwb hvl loobwqnum. Hoqgab bulv ham aal kvn gota hemp-hvnyir lvgab nyil doonum

²⁴‍Hoggab Judag lvpw at Hejekiya hookum boam hvvb 1,000 go hoo sviya 7,000 go aky gab jinum, hoo lvpw atwg ko tuup tulungv hookum boam hvvb 1,000 go hoo sviya 10,000 go jinum. Hoo nyub tulungv naleqgo bulv atv atam garxaqnum.

²⁵‍Judaho hookum bo mwlwngv, nyub tulu ngvla Lebi nyi tulungv, hoo Israel hoqgv hookum bo mwlwngv, hoo Israel gvda hoqgv hookum bo nyoodo nyi tulungv, hoo Juda gvdaho doonbo nyoodo nyi tulungv lvkin gob hemp-hvnyirnum.

²⁶‍Hoqgab Jerusalemho koi jaqb hempnum, hoggab soq sib Israelwg lvpw at Debidg ko tuup Solomonwg moodho lokam nyika maanum.

²⁷‍Ho nyub tulu ngvla Lebi nyi tulungv gorabnum hoo nyiilungam lvqc cinum, hoo bulug agam yalam tapanum, hoo bulug swgwnamv mwwg dvrwqbo ao lvpw ho hvvcnum.