Read Nyishi 2 NWD 31 Bible Online

2 NWD 31 - Nyishi bible

2 NWD 31

¹Ho hwdlo soq mwlw sam nyinya yukho, Israel nyi mwlwngv Juda bopam tuluho doon bov lvvgwb wnum hoo pwlw soogw diilwqnam tulungam vmwq gob mvnum hoo Aserim murtiam pageqnum hoo puutu aoho xumk nam tulungam mvpianum hoo Juda gvla Benjamin mwlw ho, hoo Iprayim la Manasse mwlw ho yugw doonbo tulungam mvpaqnum, bulv hoq tulu ham twryum maady deedib mvnum. Ho Israelwg nyiilungv bulug bopam tulub nyiicwr-cwrxiv atwg gumn dookub wkur kunum.

²‍Hoo Hejekiya nyub tulu ngamla Lebi nyi tulungam dvpar-dvparb xuqlinl mwbwqnum, nyiicwr-cwrxiam mwwg bonam mwbwqnum, nyub tulu ngamla Lebi nyi tulungam boyuqnam akiam la swrso akiam nyim dvb jinum, ho At Swg svmcwg toggoq tuluho bon nyim dvb hoo paqyalinco hvl paqm dvb dvpar-dvparb mwbwql apnum.

³‍Lvpw atv mwwg gumn hoqgv jikumnamv boyuqnam aky gab jinum: aram la ariyum mam boyuqnam akiam, hoo Doonu aal gab la nit pool gab boyuqnam akiam, hoo At Swg Pvvb ho xeqp kunam durum dwd moodam akiam jikumnum.

⁴‍Hoo mwv Jerusalemho doonbo nyiilungam nyub tulu gab la Lebi nyi tulu gab jibwql jidy sanam mam jim dvb gaml jinum, ho bulv At Swg Pvvb ho atv atam jipaq tayin.

⁵‍Hwdlo gamlam pui bvqpw kalam, Israel nyiilungv otuqb lengco bo aaxiam, am mam, roo alangam, kutiam, ngolangam, hoo rongo hoqg mvlinam hog mwlwngam naleqgo jinum. Hoo bulv jibwqnam akiam naleqgo baqa jinum.

⁶‍Hoo Israelwg nyiilu ngvla Judag bopam tuluho doon bov bulug jibwq deenam sibin svv-ngam hoo sviyangam, hoo bulug Pwnbo At Sw gab darxaqnam tulungam boqkum jinum, hoo hoq tulu ham pamco dvb jool apnum.

⁷‍Pool borum deen hoqgv pamco dvb bulv paarab layil pool kvn deen ho hoq tulu ham paanya kunum.

⁸‍Hwdlo Hejekiya la lvpw atwg ko tuup tulungv boqkumnam mam kaatwl, bulv At Sw nvla mwwg Israelwg nyiilungam paqnum.

⁹‍Hoo Hejekiya nyub tulu ngamla Lebi nyi tulungam boqkumnam mam toxnum.

¹⁰‍Nyub peelo bo Ajariya, hiyv Jadok namho doon bov birwqnum, “Hwdlo bulv jikumnam mam At Swg dvrwq namlo uraho jirab yuk hoqgv jaq ngulv dvnum hoo naleqgo doogdvn ho naleqgo hvraqb dooxiq dvn, hoggab At Sw mwwg nyiilungam lvqc cinum, hoqgab ngulug dvleqkv sija godab naleqgo doodwn.”

¹¹‍Ho Hejekiya nyiilungam At Swg dvrwq namlo ho noosungam mwx-mvaq mvdwb gaml jinum, hoo bulv hoq tulu ham mwx-mvaqnum.

¹²‍Hoo bulv dengky jaqb jikum deenam mam, jibwq deenam mam, hoo darxaqnam tulu ham baqa jinum. Lebi nyi Konaniya hoqg tulu gab peelo gob nyil kaayanum, hoo mwwg bor Simei mwwg dvqsinv,

¹³‍ho Jehiel, Ajajiya, Nahat, Asael Jerimot, Jojabad, Eliel, Ismakia, Mahat, hoo Benaia, lvpw atv la Pwnbog dvrwq namlo gab peelob xuqlinam saab Ajariya lvgab peelo bo Konaniya nvla mwwg bor Simeinvn bulv svka mingnum.

¹⁴‍Hoo Imnag ko tuup Kore, Lebi nyi akam, dou-cagag toggoqkam rvky bob xuqnam ak ham Pwnboam at mwwlwqb aky jinam mam, ho At Sw gab jikumnam mam la dvrwq kwrwqb aky jinam tulu ham kaaya mvdwb xuqnum.

¹⁵‍Iden, Miniamin, Jesua, Semaiya, Amariya, hoo Sekaniya bulv mwam nyub tulug bopam tuluho bulug vbw-bor tulungam, akam ge hoo anyo ge homyin dvb dvpar mwlwngam dvsam hormin gvl svkanum,

¹⁶‍nwdho xiqlwqnam tulu ham apaq peel, nyega tulungam vnyw nywum bo hoqgv naarab layil —At Swg dvrwq namlo ho aal looxiam bon nyitab haanbo mwlwngam —hoggab bulug bonam bulug oppis ho bulug dvpar-dvpar dengky jaqb nyim dvb svkanum.

¹⁷‍Nyub tulungam bulug ab tulug nombu-nombub xiqlwqnam; ho Lebi nyi tulungam vnyw camnyi gob akam kunboam la hoq odum mam bulug oppis-oppis ho bulug dvpar uraho nyim dvb xiqlwqnum.

¹⁸‍Bulug ko tulu lvgab, bulug nywxw tulu lvgab, bulug ko tuup tulu lvgab, hoo bulug ko nyem tulu lvgab hookum bo mwlwngv bulv xiqlwqnum, hoggab atv atam dvrwqb pvvdwb dengkib nyil doonum.

¹⁹‍Hoo Aaron gv ko tuup tulu, nyub tulungam, hiyv goiya gvdag bulug bopam tuluho doon boam, asaq-asaq bopam tulu hoqgv emin mingl nyi acam go nyega ko nyub tulungam la emin xiqlwqnam Lebi nyi tulug nyiicwr-cwrxiam dvs hormb dvb jinum.

²⁰‍Soq sib Hejekiya Juda mwlwho nyinum, hoo hoggv aldvn hoo jvqtw dvn ham mwwg Pwnbo At Swg agaho mwv dengky jaqb nyinum.

²¹‍Hoo mwv hoolu luuxiam Pwnbog dvrwq namlo ho bonam nyidwb mwwnam mam mwwg Pwnbog mwwlwqkam la pvvb gaml tulug bekjaqb meegaqnum, mwwg nyinam mwlwngam mwv hvvcwr baql nyinum hoo hv niqtuq lengnum.