Read Nyishi 2 NWD 32 Bible Online

2 NWD 32 - Nyishi bible

2 NWD 32

¹Soq pagoq tulu sam la soq dengky nyinam tulu sam nyixo kokw so, Assiriyag lvpw at Sennakerib haanv hoo Judangam naareqnum hoo gurum nwqtumnam bopam tulungam ceekol svmcw mvl doonum, ho mwv mwwgamv mwwg atgab mwv mviya tayin mwwnum.

²‍Hoo hwdlo Hejekiya Sennakerib Jerusalem mam nyob patab tuugabl haanam mam kaapa yin,

³‍mwv la mwwg saab tulu ngvla atorbo nyi tulungv bopam lvvg hoqg iss buqlinko tulungam mutum dvb mwwnum; hoo mwam bulv svkanum.

⁴‍Nyiilungv mvqlw jaqgo hookumnum, hoo bulv iss buqlinko tulungam hoo gvdag pobu kucw tulungam mutuml begamv, “Hoggab Assiriyag lvpw atv iss twwmin sutayin?”

⁵‍Mwv bonam tuuka-kvlal nyidkub pvvb mvnum hoo bvly yaqpia bo tulu ham mvdarnum hoo hoq aoho soja tulungam mvpnum, hoo bvly lvvg ho hvraqb bvly asaq akta mvnum, hoo mwv Debid bopamg Millongam hwngkw dvb mvnum. Mwv naleqgo nyob panan nwwxo-svtam illy-uppuqkam kam mvol apnum.

⁶‍Hoo mwv nyob pvrwq deenbo gaml jinbo tulungam nyiilug aoho mvpnum hoo bulam lvkin gob bopam toggoqho doomnum hoo bulam haakam dvb agam goonv begamv,

⁷“Atorto hoo haakam to. Lvpw at Assiriyag agaho hoo mwwg lvgab sipai mvqlwngam kaatwl bos maabv hoo hang homabv, hoggab mwwg lvgab doonbo tulu ham koi yaab ngulug lvgab doodwn.

⁸‍Mwwg lvgab vdin atorv doodwn, hvbmabde ngulug lvgab ngulug Pwnbo At Sw doodwn, ngulam svka dvn hoo ngulam nyob pvjtayin. Hoo Judag lvpw at Hejekiyag gomcwr tulu hoqgv nyiilungv haakamnum.

⁹‍Soq kokw so, Assiriyag lvpw at Sennakerib, mwwg sipai tulu lvgab Lakis gvdangam naareqnum, ho mwwg nyera tulungam Jerusalemb Judag lvpw at Hejekiya dookub bvla Judag nyiilu dookub kanamnum begamv,

¹⁰“Soq sib Assiriyag lvpw at Sennakerib bedo, ‘Naareq kunam Jerusalem uraho, nulv hog nvkam mwwgw gwwl doodwn?

¹¹‍Soq Hejekiya si nulam xaalyo maai yv, ho mwv nulam kano hvngwrb sim dvb jita do, ho mwv nulam bedo, “Ngulug Pwnbo At Sw ngulam Assiriyag lvpw at alaq hoqgv ywwlin tayin”?

¹²‍Soq Hejekiya nyi akin siima yv mwwg puutu aoho xumk nam tulungam hoo mwwg yugw tulungam Juda la Jerusalem hoqgv mvpaq mvdwb gaml jin bov hoo benum, “Nulv yugw gwwkin ho xumtayin, hoo hoq aoho nulug pwr jinam tulungam nulv jitayin”?

¹³‍Asaq gvdag nyiilu mwlwngam ngo la ngoqg ab tulungv hoggv nyinum ham nulv cengma dvn yv? Gvdag pwnbo tulungv bulam gvdangam ngoqg alaq soqgv naalin nyod nvi yv?

¹⁴‍Hiyvg gvdag pwnbo tulug pengko hoqgv ngoqg abwg twryum tanam nyiilungam ngoqg alaq soqgv naalinum, ho nulug Pwnbov nulam ngoqg alaq soqgv naalin nyotayin yv?

¹⁵‍Hoqgab sija, nulv Hejekiyanvn xaalyo kumabv ho nulam booxar kumabv, hoo mwam mwwjw maabv, hoggab hiyvg gvdag pwnbo tulungv mwwg nyiilungam ngoqg la ngoqg abwg alaq hoqgv naalin nyoma dvn. Nulug Pwnbov nulam ngoqg alaq soqgv naalin dvb hwdgo anyo do!’”

¹⁶‍Hoo mwwg nyera tulungv Pwnbo At Swn ceekol vigo benyi-beyanum hoo mwwg nyera Hejekiyanvn kam benyi-beyanum.

¹⁷‍Hoo mwv Israelwg Pwnbo At Swn benyi-beyal pui pota tulungam xeqnum hoo mwam ceekol agam gool begamv, “Gvda asaqg nyob tulug pwnbo tulungv bulug nyiilungam ngoqg alaq soqgv naalin nyomanum, hoqgab Hejekiyag Pwnbov mwwg nyiilungam ngoqg alaq soqgv naalin nyoram.”

¹⁸‍Hoo Jerusalem bvly aoho doonbo nyiilungam Juda agam goab bulv vcjaqb sogoql goqr rol bulv bopam mam naareql naata tanam hvb bulam bos dvb la tvmdwr dvb goqlamnum.

¹⁹‍Hoo bulv Jerusalemwg Pwnboam swcw soqg pwnbo tulungam nyiilug alaq pwnam murty tulu hvb bulv agam goonum.

²⁰‍Ho lvpw at Hejekiya la nyiqry benbo Amojwg ko tuup Aijaya soq pagoq gab ao lvpwngam xabl svka gab konum.

²¹‍Hoo At Sw gumtwngam kanam tvl lvpw at Assiriyag svmcw hoqg atorb nyob panbo tulungam hoo gaml jinbo tulungam hoo saab tulungam mengpaq mvnum. Hoqgab mwwg atwg gvdab mwv hvnyw moolw tukul wkurnum. Hoo hwdlo mwwg pwnbo nam urab mwv haaikam, mwwg atwg ko tuup tulungv mwam lyoqr orioq hoqgv patabnum.

²²‍Hoqgab At Sw Hejekiya nvla Jerusalemho doonbo tulungam Assiriyag lvpw at alaq hoqgv la mwwg ceebio tulug alaq hoqgv ywwlinum, hoo bul gab hog mwlwngam jinum.

²³‍Hoo Jerusalem hoqgv At Swn naleqgo akiam baqa jinum hoo Judag lvpw at Hejekiyanvn xinam dupum-dvrab pam jinum, ho hoq mood hoqgv mwam nyob asaqg kaagaho vcjaqb yuunum.

²⁴‍Ho hoq moodho Hejekiya vcnum hoo sisv twqb nyinum, hoo mwv At Swn swgwnum, hoo mwam mwv birwqnum hoo mwam kaacin dvb hog ak jinum.

²⁵‍Hvbmabde Hejekiya mwam hoggv nyij kunam hvb mwv niqtuq lengdwb mwam nyilwq jimanum, hoggab mwwg hangv larnum. Hoqgab hang lingtwrnamv mwam la Judangam hoo Jerusalem aoho haanum.

²⁶‍Hvbmabde Hejekiya mwwg hang larnam hoqgv mwv atv atam yan sunum, ho mwv la Jerusalemho doonbo mwlwngv yan kunum, hoqgab Hejekiyag moodho At Swg hang lingtwrnamv bulug aoho haamanum.

²⁷‍Hoo Hejekiya vc loodab nyet bvla xinam gob nyinum, hoo mwv mwwg gab atv rupam, hunam, xinam wlwngam, sungam bo kutiam, svtam mam, hoo hog mwlw vcjaqb xinam dupum-dvrab pam gumn pvvnum;

²⁸‍am noosungam, roo alangam, hoo kutiam; hoo sibin-svv gab la sviya tulu gab nam dookam mvnum.

²⁹‍Hoq hvbkalam mwv mwwg gab bopam tulungam mvnum, hoo sviya ngvla sibin-svv tulungv naleqnum, hoggab Pwnbov mwam koi jaqb gumn bwwm dvb jinum.

³⁰‍Soq Hejekiya nyi akin si Gihonwg pobu sugungam hingtum tvl hoo ham silam boonv Debidg bopam dou-haaga daiyab boolnum. Hoo Hejekiya mwwg nyis tulungam nyinam mwlw ho niqtuq lengnum.

³¹‍Hoo Bebilonwg kanamnum lvpw atwg ko tuup tulungv gvda hoqg koox dvb bon nyinam-wnam mam kaatab haai yikho, mwam pooka dvb hoo mwwg hang urangam cengdwb, Pwnbov mwam atam apaq jinum.

³²‍Hejekiyag hog mwlw bon nyinam mam hoo mwwg albo bon nyinam tulungam, kaato, hoq tulu ham nyiqry benbo Amojwg ko tuup Aijayag nyiqry kaanam Juda gvla Israelwg Lvpw at tulug Kitap ho xeqp pakun.

³³‍Hoo Hejekiya mwwg ab tulug sinam hvb siknum, hoo bulv mwam Debidg ko tuup tulug odum daiyag nyubu ho liinum, hoo Juda gvla Jerusalemho doonbo nyi mwlwngv mwwg sinam mam xid-paqdwb nyilwqnum. Hoo mwwg kwlib mwwg ko tuup Manasse pvvb bwwl doognum.