Read Nyishi 2 NWD 33 Bible Online

2 NWD 33 - Nyishi bible

2 NWD 33

¹Hwdlo Manasse pvvb bwwl doorab gviyikho, mwv camleq nywnyi go akamnum, hoo mwv Jerusalemho vnyw camng leq nywng go pvvb bwwl doognum.

²‍Hoo mwv At Swg kaagaho hoggv almadwn ham nyinum, ho hiyam At Sw Israelwg nyiilu aga hoqgv ruqpaqnum nyob tulug bulum-kac dvb nyinam tulu nyikjaqb nyinum.

³‍Hoggab mwwg ab Hejekiya puutu aoho mvpia kunam xumk nam tulungam mwv mvdarnum, hoo Baal la Aserag murtiam mwv lokta diilwqnum, hoo doonyi-pool takar mwlwngam xumnum hoo bul gab bon nyijnum.

⁴‍Hoo At Swg dvrwq namlo ho mwv yugw tulungam mvpnum, hogloq ham At Sw benum, “Ngoqg eminam Jerusalemho nwrba gob ngo pvvtayin.”

⁵‍Hoo At Swg dvrwq namlo urag haaga vnyi gon ho mwv doonyi-pool takarg yugwngam mvpnum.

⁶‍Hoo mwwg ko tuupam boyuqnam aky pwr gob Hinnomwg Ko tuup Lywpa ho mwv jinum, hoo sootu tul hoo pwp-pocu ciil-koql hoo nyioky nyub lvgab gwwlyw jaqb nyinum. Mwv At Swg kaagaho koi jaqb almanam nyil mwam haaxaq dvb hang nyiluqnum.

⁷‍Hoo mwwg murty guss sam mvnam tulungam mwv Pwnbog dvrwq namlo ho pvvnum, hogloq ham At Sw Debid la mwwg ko tuup Solomonnvn benum, “Soq nam so, hoo Jerusalem mam ngo Israelwg nyob tulug pengko hoqgv xuqlin pakun, ho nwrba gob ngoqg eminam ngo pvvtayin,

⁸‍hoo bulv ngoqg gaml jinam tulu ham la, hoo ngoqg nyera Mojesg bulam Pvvb jinam tulu ham hengab jaqb nyib nyiloqkam, bulug ab tulungam ngo gvda jiknam hoqgv ngo Israelam asaq gvdaho gaqkarl yvm kuram.”

⁹‍At Sw Israel nyiilug agaho hiyam twryumnam nyob tulungam laabo yaab almab nyignv, Manasse Judangam la Jerusalemho doonbo nyi mwlwngam gaqxar gvnum.

¹⁰‍At Sw Manasse nvla mwwg nyiilungam agam goonum, hvbmabde bulv ruucw kwrgab maanum.

¹¹‍Hoqgab At Sw Assiriyag lvpw atwg sipai tulungam gaml jinbo tulungam bulug aoho boanum, ho hiyv Manassenvn tooky lvgab hoqtul hoo nootul tama gai lvgab kargab tvl hoo mwam Bebilon ho boanum

¹²‍Hoo hwdlo mwv hentwr-kaas gob nyiyikho, mwv mwwg Pwnbo At Swg mwwswnam mam konum hoo mwwg ab tulug Pwnbo agaho mwv atv atam koi jaqb yan sunum.

¹³‍Mwv mwam swgwnum, hoo mwwg xumnamv Pwnboam hang biimnum hoo mwwg xumnam mam tapanum hoo mwam lokta mwwg lvpw-haty Jerusalemho bookur kunum. Ho Manasse At Sw Pwnbov hvl cengknum.

¹⁴‍Soq kokw so Gihonwg dou-haaga daiyag lywpa ho mwv Debidg bopamg lvvgwg bvliam, hoo Ngui Toggoq haagag urangam mvdarnum, hoo hoqhvb Opel namgub hoqg tulu ham aongam mvca nv mvdarnum. Mwv Judag gurum nwqtumnam bopam mwlw ho sipai tulungam gaml jinbo tulungam pvvl apnum.

¹⁵‍Hoo mwv nyoodo pwnbo tulu ngamla At Swg dvrwq namlo ho murty doonbo tulungam naapaqnum, hoo At Swg dvrwq namlo dook puutu aoho hoola Jerusalemho mwwg yugw mvnam tulungam naapaq layil, hoo mwv hoq tulu ham bopam lvvgwb joopaqnum.

¹⁶‍Mwv At Swg yugwngam mvdar kunum hoo hoq aoho swrso pwram la paqyalinco paqnam akiam jim dvb gaml jinum, hoo mwv Israelwg Pwnbo, At Swn bon nyij mvdwb Judangam gaml jinum.

¹⁷‍Hvbsujaqkam, nyiilungv hvraqb puutu aoho pwr jil doonum, hvbmabde bulug pwr jiknamv Pwnbo At Sw aronvn.

¹⁸‍Manasseg asaq nyinam mwlwngam, hoo mwwg Pwnboam mwwg swgwnam mam, hoo Israelwg Pwnbo, At Swg emin ho nyiqry benbo tulungv mwam gomcwr gooknam tulungam, kaato, hoq tulu ham, Israelwg Lvpw at tulug Nwdho doodwn.

¹⁹‍Hoo mwwg swgwnamv mam, hoo hoggub mwwg xumnam mam Pwnbov hang biinum, hoo mwwg nyic nyinam mwlwngam hoo mwwg dengkib nyimanam tulungam, hoo mwwg puutu aoho xumk nam tulungam hoo Aserim mvmla guss tulungam mwv atv atam yan maata yukho mvnam mam, kaato, hoq tulu ham Nyiqry benbo tulug Nwdho xeqpan.

²⁰‍Hoqgab Manasse mwwg ab tulug sinam hvb siknum hoo mwwg namho mwam bulv liinum, mwwg kwlib mwwg ko tuup Amon pvvb bwwl doognum.

²¹‍Hwdlo Amon pvvb bwwl doorab gviyikho, mwv camnyi leq nywnyi go akamnum, hoo mwv Jerusalemho vnyw nywnyi go pvvb bwwl doognum.

²²‍Hoo mwv At Swg kaagaho hoggv almadwn, mwwg ab Manasseg nyinam hvb nyinum. Amon mwwg ab Manasseg guss mvnam mwlwngam mwv pwr jinum hoo hoq tulu gab bon nyijnum.

²³‍Hoo mwwg ab Manasseg atv atam yan maanam hvb mwv At Swg agaho atv atam yan maanum, hvbmabde Amon koi-koi yaab nyimurnam mam nyinum.

²⁴‍Hoo mwwg nyera tulungv mwam ceekol hima bwwrabnum hoo mwwg namho mwam mengnum.

²⁵‍Hvbmabde Lvpw at Amonnvn hima bwwl mengn bo nyi tulu ham gvda hoqg nyiilungv bulam mengpaqnum. Hoo gvdag nyiilungv mwwg ko tuup Josiyanvn mwwg kwlib lvpw atwb mvknum.