Read Nyishi 2 NWD 34 Bible Online

2 NWD 34 - Nyishi bible

2 NWD 34

¹Hwdlo Josiya pvvb bwwl doorab gviyikho, mwv vnyw piin go akamnum, hoo mwv Jerusalemho vnyw cammum leq nywg pvvb bwwl doognum.

²‍Hoo mwv At Swg vnyiq kaagaho hoggv aldvn mwwg ab Debidg nyinam wnam hvb nyinum; hoo mwv laqc-lvqbwqb wkar maanum.

³‍Hoggab mwv yaapa anyo sujaqkam, mwv vnyw piin go pvvb bwwl doog yukho, mwv mwwg ab Debidg Pwnboam meegaqnum, hoo vnyw camleq nywnyi yukho mwv Juda gvla Jerusalemho puutu aoho xumk nam tulungam, Aserim gv murtiam, hoo svvda taql hoo yoqdwr guss tulungam mvpaq xaanum.

⁴‍Hoo bulv mwwg kaaga hoqgv Baal tulug yugwngam sapianum, hoo bulug aoho daqn bo sulum mwwk yugw tulungam patabnum. Hoo mwv Aserim murtiam la svvda taql hoo yoqdwr guss tulungam vmwq gob mvnum, hoo hoq tulu ham diimwrb hvb mvnum hoo hoq tulu ham bulam pwr jinbo nyubu tulu aoho cwrsaq-bvraqb taakarnum.

⁵‍Mwv nyub tulug alongam kam bulug yugw tulu aoho wm parnum hoo Judangam la Jerusalem mam dvrwq dvb mvnum.

⁶‍Hoo Manasseg, Iprayimg, hoo Simeonwg, hoo Naptali aado namgub bopam tulungam bulug taqg-loosaqb yuupaq mvnum,

⁷‍mwv yugw tulungam hoo Aserim murtiam hoo guss tulungam mub cinjum gob mvnum hoo Israelwg gvda mwlw ho sulum mwwk yugw tulungam patabl papaqnum. Ho mwv Jerusalemb wkurnum.

⁸‍Mwv vnyw camleq piin go pvvb bwwl doog yukho, hwdlo mwv gvdangam la nammam mvxaq yukho, mwv Ajaliyag ko tuup Sapan, hoo bopamg nyiit rad Maaseiyanvn, hoo Joahaj gv ko tuup Joa xiqtu yaan bov mwwg Pwnbo At Swg dvrwq namlongam mvdar mvdwb kanamnum.

⁹‍Bulv nyub but Hilkiya dookub haanum hoo Pwnbog dvrwq namlog haaga toggoqho rvky bo Lebi nyi tulug Manasse la Iprayim hoqgv hoo Israelwg boumnam nyi tulu hoqgv hoo Juda la Benjamin hoo Jerusalemho doonbo nyi tulu hoqgv twngkam jikumnam mam mwam jimnum.

¹⁰‍Hoo bulv hoq tulu ham At Swg dvrwq namlongam kaal nyig boam jinum. Hoo At Swg dvrwq namlongam mvdarl bonam nyinbo nyi tulungam jitwl nammam mvdar mvnum.

¹¹‍Bulv hoqham svvtaq bon nyinbo tulungam la nam mvnbo tulungam wlw rvn mvdwb, hoo svvtaq rvn mvdwb hoo xaapo tulungam rvn mvdwb, Judag lvpw atv yaapaq dvb nam mvnam tulu ham mvn mvdwb jinum.

¹²‍Hoo bonam nyinbo nyi tuluhv dengky jaqb nyinum. Bulug aoho Lebi nyi tulug Merarig nyob dvpar hoqgv Jahat la Obadiya, hoo Kohat gv nyob dvpar hoqgv Jakariya la Mesullamnvn bonam kaol nyig mvdwb xuqlinum. Lebi nyiv hiyv rwwxw-gungga mvlaq jaqn bo tuluhv,

¹³‍dupum-dvrab pam baqn bo tulungam hoo hog mwlw bon nyinam tulu ham kaal nyig bob nyinum hoo Lebi nyi tuugin xeqn bob hoo saab gob hoo toggoqkam rvky bo tulu gob nyinum.

¹⁴‍Hwdlo bulv At Swg dvrwq namlo ho twngk jikumnam mam baqlin lingdu yukho nyub Hilkiya At Swg Pvvbam Mojesnvn jinam mam Kitap pam kaapanum.

¹⁵‍Ho Hilkiya birwql hoo svkretvri Sapannvn benum, “At Swg dvrwq namlo ura lo ngo Pvvb Kitap pam kaapa paku.” Hoo Hilkiya kitap pam Sapannvn jinum.

¹⁶‍Ho Sapan kitap pam lvpw atwg dookho bwanum, hoo lvpw atam puiyam betamnum, “Noqg nyera tulungam hog mwlwngam gvqlwqnam mam bulv nyidu do.

¹⁷‍Bulv At Swg dvrwq namlo ho twngk doon boam noojur layil hoo ham bonam kaal nyigbo nyi tulug alaqho jilwq peekun.”

¹⁸‍Ho svkretvri Sapan lvpw atam betamnum, “Nyub Hilkiya ngam kitap ak jinum.” Hoo Sapan ham lvpw atwg agaho poory jinum.

¹⁹‍Hoo hwdlo lvpw atv Pvvb gomcwram tapa yin, mwwg vjam mwv pumwq sunum.

²⁰‍Hoo lvpw atv nyub Hilkiya nvla Sapanwg ko tuup Ahikam, nvla Mikag ko tuup Abdonnvn, la svkretvri Sapannvn, hoo lvpw atwg nyera Asaiyanvn gaml jil begamv,

²¹“Wn, ngoqgab, hoo Israel hoola Judaho boum tvl doonyu bo mwlwngam kaapanum kitap hoqg gomcwr tulungam, At Swn tox kaata. Hoggab At Swg hang lingtwrnamv ngulam koijaqb ceeko twqto, hoggab ngulug ab tulungv soq kitap so ngulam nyim dvb pagoq xeql apnam hvbjaq soqg kitap soqg gomcwr tulungam tvjw maanum.”

²²‍Hoqgab Hilkiya la hiyam lvpw atv kanamnum bulv Hasrag ko hosiq, Tokat gv ko tuup Sallum, nyob panan dupum-dvrab pam rvky yaanbo nywxw nyiqry benbo Hulda dookub wnum (mwn Jerusalemwg Vnyi deen Namho doonum) hoo bulv mwnwg lvgab goonum.

²³‍Hoo mwn bulam benum, “Soq sib Israelwg Pwnbo, At Sw bedo: ‘Nam ngoqg dookub kanam bo nyiam betam to,

²⁴‍Soq sib At Sw bedo, kaato, Judag lvpw at agaho kitap hoqgv poory kunam beenam pagoq mwlw ham, ngo soq nyook so hoo soq so doonbo nyi mwlwg aoho ciqcaq-bviyaqkam haam tayin.

²⁵‍Hoggab bulv ngam ludum paku hoo asaq pwnbo tulungam aky jil, ho bulv ngam haaxaq dvb bulug alaq hoqg bon tulungam nyinamv hang nyiluq paku, hoqgab ngoqg hang lingtwrnamv soq nyook sam ceeko tayin hoo hoq ham mwmiq laram.

²⁶‍Hvbmabde At Swn tox mvdwb kanam bo Judag lvpw atam, no soq sib mwam betayin, soq sib Israelwg Pwnbo, At Sw bedo: noqg gomcwr tapanam tulug pagoqkam bedo,

²⁷‍hoggab ngo soq nyook gab hoo hoqho doonbo nyi tulu gab ceeko yukam hoo bulv dooxa bo nyook gob hoo beenam gob nyitayin hvnam agam goonam mam hwdlo no tapayin, noqg hangv yannum, hoo no atv atam At Swg agaho yannum hoo noqg vjam no atv pumwq sunum hoo ngoqg agaho xabnum, ngo kam noqg xabnam mam tapa paku, At Sw bibwqdo.

²⁸‍Kaato, noqg ab tulug dookho ngo nam bookum tayin, hoo noqg nyubu ho no swrsob hookum tayin, hoo soq nyook so ngoqg ciqcaq-bviyaq haam tanam mam noqg vnyiqkv kaapa ram.’” Hoo lvpw atam bulv gomcwram boqkur baqa jinum.

²⁹‍Ho lvpw atv pui kanamnum hoo Juda la Jerusalemwg nyiixa tulungam goqkumnum.

³⁰‍Hoo lvpw atv At Swg dvrwq namlob wnum, hoo mwwg lvgab Judag nyi mwlwngv hoo Jerusalemho doonbo nyi mwlwngv hoo nyub tulungv hoo Lebi nyi tulungv, nyiilu mwlwngv anyo ge hoo akam ge wnum. At Swg dvrwq namlo hoqgv Pvvb Birnam Kitap pam kaapanam hoqgv bulug tapa dvb mwv gomcwr tulungam poory jinum.

³¹‍Hoo lvpw atv swwrw lwkw ho daqnum hoo At Swg kokwb wdwb hoo mwwg gaml tulungam pvvdwb hoo mwwg nyij-mujam nyidwb hoo mwwg pvvbam mwwg hvvjw-haara hoqgv hoo mwwg yvj-yal hoqgv soq pvvb birnam kitap so xeqp kunam mam nyidwb, mwv At Swg agaho pvvb birnam mam mvnum.

³²‍Ho mwv Jerusalem gvla Benjamin nyi mwlwngam hoqho daqba mvnum. Hoo Jerusalemho doonbo nyi mwlwngv bulug ab tulug Pwnbog birnam pvvb birko jaqb hog mwlwngam nyinum.

³³‍Hoo Israel nyiilug dwrbu-dwrya gvdaho hog mwlw bulum-kac dvb nyil doognam mam Josiya naapaqnum hoo Israel ho doonbo nyi mwlwngam bulug Pwnbo At Sw swn xum dvb mvnum. Mwwg moodho bulug ab tulug Pwnbo, At Swn wmin gvnam mam bulv wk-wiya maanum.