Read Nyishi 2 NWD 35 Bible Online

2 NWD 35 - Nyishi bible

2 NWD 35

¹Josiya At Swg Dvtv Durum dvnam mam Jerusalemho nyil doonum. Hoo bulv Dvtv Durum gab sviyangam naleqgo otuq poolwg camleq loopy aalho patabnum.

²‍Mwv nyub tulungam bulug bonam nyim dvb xuqlinum hoo bulam At Swg dvrwq namlo ho bon nyim dvb haakam bepanum.

³‍Hoo mwv Israel nyi mwlwngam tomswrbo hoo At Sw gab dvrwqb swwn bo Lebi nyi tulungam benum, “Israelwg lvpw at Debidg ko tuup Solomonwg dvrwq namlo mvnam ho dvrwqbo pvvb uddum mam apto. Nulv ham nulug gorbw ho jook maabv. Sija nulug Pwnbo At Sw gab hoo mwwg Israelwg nyiilu gab bon nyito.

⁴‍Israelwg lvpw Debid la mwwg ko tuup Solomonwg xeqpnam hvb nulug ab tulug nyob-nyob dvparv nulv atv mwx-mvaqto.

⁵‍Hoo Dvrwqbo Dookho nulug ab tulug vbw-bor dvpar-dvparv, hoo Lebi nyi tulungv nyiisam nyiilug ab tulug imiq-imiqkam mwbwq jinam hvb daqto.

⁶‍Hoo Dvtv Durum gab sviyangam patabto, hoo nulv atv atam garxaq suto, hoo At Swg gomcwram Mojesg bepko jaqb nulug vbw-bor tulungam mwx-mvaq mvto.”

⁷‍Ho Josiya hoqho doonbo nyiicwr-cwrx nyiisam nyiilu gab Dvtv Durum gab sviya tulungam hoo sibin bindo tulungam 30,000 go, hoo svv hvvbam 3,000 go aky jinum; soq tulu si lvpw atwg gumn hoqgv jilinum.

⁸‍Hoo mwwg saab tulungv nyiilu gab, nyub tulu gab, hoo Lebi nyi tulu gab atv mwwswl jinum. Hilkiya, Jakariya, hoo Jehiel Pwnbog dvrwq namlog saab peelo bo tuluhv Dvtv Durum gab sviya 2,600 go hoo Dvtv Durum gab hvvb 300 go akiam nyub tulungam jinum.

⁹‍Konaniya kam, hoo mwwg bor Semaiya hoo Netanel, hoo Hasabiya la Jeiel hoo Jojabad, Lebi nyi tulug peelo bo tulu hvvkam Dvtv Durum gab sviyangam la sibin bindongam 5,000 go hoo hvvbam 500 go aky jinum.

¹⁰‍Hwdlo hog mwlwngam mwx-mvaql mvnya yukho, nyub tulungv bulug dookho doonum hoo lvpw atwg gaml jikjaqb Lebi nyi tulungv bulug dvparho doonum.

¹¹‍Hoo bulv Dvtv Durum sviyangam patabnum, hoo nyub tulungv bulug ui nvvrwqnam mam yugw ho pwqyaqnum, ho Lebi nyi tulungv pwr jinam tulu ham vpin diidunum.

¹²‍Hoo bulv boyuqnam akiam vpwb apnum, ho bulv hoq tulu ham ab nyob dvpar-dvparam jipin-jira tvl, nombug nyiilungam aptvl, Mojesg Kitap ho xeqpnam hvb, At Swn aky jim dvb pvvnum. Hoo bulv hvvb tulungam kam hvb nyinum.

¹³‍Hoo pvvb ho bepnam hvb bulv Dvtv Durumg sviya vdinam wm lvgab ramsinum; hoo dvrwqbo aky tulungam pwcw ho, cwwro gaapo ho, hoo loora ho xwwn tvl, hoo ham nyebia jaqb nyiisam nyiilungam horpin-horanum.

¹⁴‍Hoo kokw so bulv bul gab la nyub tulu gab mwx-mvaqnum, hoggab Aaron gv ko tuup nyub tulungv boyuqnam akiam la oxam ai namgub jil doonum; hoqgab Lebi nyi tulungv bul gab la Aaron gv ko tuup nyub tulu gab mwx-mvaqnum.

¹⁵‍Asapwg ko tuup tulungv bemin benbo tuluhv Debidg gaml jinam hvb bulv bulug dookho doonum, hoo Asap, hoo Heman, hoo Jedutun lvpw atwg nyiqry benbov; hoo toggoqkam rvkybo tulungv toggoq goqxy ho daqnum. Bulv bulug bon nyik hoqgv wleq maanum, hoggab bulug vbw-bor Lebi nyi tulungv bul gab mwx-mvaq jinum.

¹⁶‍Hoqgab Lvpw at Josiyag gaml jik jaqb Dvtv Durum dwcwngam hoo boyuqnam akiam At Swg yugw aoho jidwb hoq aalho At Sw gab hog mwlw bonam mwx-mvaq kunum.

¹⁷‍Hoo hoqho doonbo Israelwg nyiilu mwlwngv hoq moodho Dvtv Durum dwcwngam nyil doonum, hoo Opap Kiilwq maab Wtw dvnam mam aal kvn go dvnum.

¹⁸‍Nyiqry benbo Samuyelg aal hoqgv jaq hoqhvb Dvtv Durum dwcwngam nyika kumanum. Josiyag Dvtv Durum dwcwngam nyinam hvb Israelwg lvpw at tulungv akkam nyika maanum, hoo nyub tulungv hoo Lebi nyi tulungv, hoo Juda la Israel mwlwngv, hoo Jerusalem do doonbo mwlwngv Wleq dvb Durum dwcwngam sool doonum.

¹⁹‍Josiyag vnyw camleq piin go pvvb bwwl doog yukho Dvtv Durum dwcwngam nyil doonum.

²⁰‍Soq mwlw si nyixo kokw so, hwdlo Josiya dvrwq namlongam mwx-mvaqnum, Ijipt gv lvpw at Neko Iuprataswg Karkemis ho nyob patab caanum hoo Josiya mwam kvvrwqtab wnum.

²¹‍Hvbmabde mwv mwam pui bilwql begamv, “Judag lvpw ata, ngulug pengko lo ngunyiv akwn-akwn hoggv nyisv doodwn? Soq aal so ngo nam ceekol nyob patab haama, hvbmabde ngoqg ceebio nombungam ceekol nyob patayin. Hoo Pwnbov ngam nyebia jaqb nyim dvb gaml jipa ku. Ngoqg lvgab dooba bo Pwnboam ceeko maabv, hvbmaba lo mwv nam twryum tayin.”

²²‍Hvbmabde Josiya mwwg hoqgv wleq maanum, hvbmabde mwv atv mwam nyob pvrwq tanbo hvb nyinum. Pwnbog gomcwram Nekog agam hoqgv goonam mam mwv tamanum, hvbmabde Megiddo haapa ho nyob patab haanum.

²³‍Hoo Lvpw at Josiyanvn uppuq abn bo tulungv ablwqnum. Hoo lvpw atv mwwg nyera tulungam benum, “Ngam wggin gvtbv, hoggab ngam vc loodab un mvg paku.”

²⁴‍Hoo mwwg nyera tulungv mwam ceriot akwn hoqgv joolin layil hoo mwam vnyi deen ceriot ho baql wgnv hoo mwam Jerusalemb baqanum. Hoo mwv siknum hoo mwwg ab tulug nyubu ho mwam liiknum. Hoo Juda gvla Jerusalemv Josiya gab nyix-riinum.

²⁵‍Jerimiya kam Josiya gab nyix-riinum; hoo soolo godab bemin benbo nyem nyega tulungv Josiya gab nyix-riinam beminam bedwn. Bulv soq sam Israel ho pvvb gob mvnum; kaato, hoq tulu ham Nyix riinam ho xeqp pakun.

²⁶‍Josiyag asaq nyinam mwlwngam, hoo At Swg Pvvb ho xeqk jaqb mwwg hog mwlw alwb bon nyinam mam,

²⁷‍hoo mwwg nyirab hoqgv nyinya namgub bon nyinam mam, kaato, hoq tulu ham Israel gvla Judag Lvpw at tulug Kitapho xeqp pakun.