Read Nyishi 2 NWD 36 Bible Online

2 NWD 36 - Nyishi bible

2 NWD 36

¹Hoo gvdag nyiilungv Josiyag ko tuup Jehoahajnvn naanum hoo mwwg abwg kwlib mwam lvpw at gob mvknum.

²‍Hwdlo Jehoahaj pvvb bwwl doorab gviyikho, mwv vnyw camnyi leq nywum go akamnum, hoo mwv Jerusalemho pool borum go pvvb bwwl doognum.

³‍Ho Ijipt gv lvpw atv mwam Jerusalemho pvtwq tuml apnum hoo rup lwwg telent go hoo hun ak telent go gvda nyoogangam jim dvb bepnum.

⁴‍Hoo Ijipt gv lvpw atv mwwg bor Eliyakimnvn Juda hoola Jerusalemho lvpw at gob mvpnum, hoo mwwg eminam Jehoiakim hvl kwlynum. Hvbmabde mwwg vbw Jehoahajnvn Neko bool wgnum, hoo mwam Ijipt ho boanum.

⁵‍Hwdlo Jehoiakim pvvb bwwl doorab gviyikho mwv vnyw camnyi leq nywng go akamnum, hoo mwv Jerusalemho vnyw camleq nywg pvvb bwwl doognum. Mwv mwwg Pwnbo At Swg kaagaho hoggv almadwn ham nyinum.

⁶‍Ho mwam Bebilonwg lvpw at Nebukadnejjar ceekol nyob panum hoo mwam tag lvgab korcup tvl Bebilonwb bool wgnum.

⁷‍Nebukadnejjar At Swg dvrwq namlo hoqg dupum-dvrab tuugin Bebilonwb baqnum hoo hoq tulu ham mwwg namlo Bebilon ho pvvnum.

⁸‍Jehoiakimwg asaq bon nyinam mwlwngam, hoo mwwg bulum-kac dvb nyinam tulu ham, hoo hoggv mwam ceekonum, kaato, hoq tulu ham Israel gvla Judag Lvpw at tulug Kitap xeqp ko ho xeqp pakun. Hoo mwwg kwlib mwwg ko tuup Jehoiakin pvvb bwwl doognum.

⁹‍Hwdlo Jehoiakin pvvb bwwl doorab gviyikho, mwv vnyw camleq piin go akamnum, hoo mwv Jerusalemho pool borum gola aal looyw go pvvb bwwl doognum. Mwv At Swg kaagaho hoggv almadwn ham nyinum.

¹⁰‍Ho vnywg dug pool ho lvpw at Nebukadnejjar mwam la At Swg dvrwq namlo hoqg xinam dupum-dvrab pam Bebilonwb kanamnum, hoo mwwg bor Jedekiyanvn Juda gvla Jerusalemb lvpw at gob mvnum.

¹¹‍Hwdlo Jedekiya pvvb bwwl doorab gviyikho mwv vnyw camnyi leq nywg akamnum, hoo mwv Jerusalemho vnyw camleq nywg pvvb bwwl doognum.

¹²‍Mwv mwwg Pwnbo At Swg kaagaho hoggv almadwn ham nyinum. Mwv At Swg agam mam goonbo nyiqry benbo Jerimiyag agaho atv atam yan maanum.

¹³‍Hiyv mwam Pwnbog emin ho dingm boam, mwv Lvpw at Nebukadnejjarnvn ceekol taleqnum. Mwv Israelwg Pwnbo At Swnvn mwwkur maanum hoo mwwg hangv vdwl mwwjw maanum.

¹⁴‍Hoq lvgab saab la nyub tulungv hoo nyiilungv nyob asaq tulug bulum-kac dvb nyinam hvb bulv dengky looda maadwb nyinum. Hoo Jerusalemho dvrwq dvb mvnam nammam, bulv At Swg dvrwq namlongam kacdvb mvnum.

¹⁵‍Bulug ab tulug Pwnbo, At Sw, mwwg pui baqn boam bul gab kanam namtin-namtinl kanamnum, hoggab mwv mwwg nyiilungam la mwwg doogw ko nyookam hang sibynum.

¹⁶‍Hvbmabde hwdlo At Swg hang lingtwrnamv mwwg nyiilu aoho haanam xaqb, hwdlo hoqho pvlywnanv dooma daqnam gob, bulv Pwnbog pui baqn bo tulungam bej-beparnum, mwwg gomcwram tanam-tacamnum hoo mwwg nyiqry benbo tulungam nyirj-nyirparnum.

¹⁷‍Hoqgab mwv Bebilonwg lvpw atam bulam ceekol nyob pam dvb boolwqnum, hoqgab bulug dvrwq namlo ho bulug yaapa tulungam mengnum hoo yaapa ge nyijwr ge, akam ge ho nyekam-xox ge bulv anya mwwpal hang siby maanum. Mwwg alaqho bul mwlwngam mwv jilwqnum.

¹⁸‍Hoo Pwnbog dvrwq namlog dupum-dvrab koi ge hoo anyo ge hog mwlwngam, At Swg dvrwq namlog gumn mwlwngam, hoo lvpw atwg gumnam hoo lvpw atwg ko tuup tulug gumn mwlwngam, soq tulu sam Bebilonwb baql wgnum.

¹⁹‍Hoo bulv Pwnbog dvrwq namlongam wm ramlwqnum hoo Jerusalemwg bvliam sapianum hoo lvpw-hatig hog mwlwngam twrkub wm ramlwqnum hoo hoqg xinam dupum-dvrab mwlwngam twryumnum.

²⁰‍Lyoqr orioq hoqgv keleqbo tulungam Bebilonwb nyumwb bool wgnum, hoo bulv mwwg nyera-paqn gob nyiknum hoo Parsiyag lvpw-hativ mvko namgub, bulv mwwg ko tuup tulu gab nyera-paqn gob swwl doonum,

²¹‍At Swg gomcwram Jerimiyag agam ho gooknamv niqtuq lengmdvb, gvdangv hoqg Doonu aal tulungam hemp-hvnyirnum. Cam kvn vnywngam niqtuq lengm dvb, hoq dooxa bo aal tuluhv Doonu de aalam pvvnum.

²²‍Parsiyag lvpw at Sairaswg otuq vnyw ho, At Sw gomcwram Jerimiyag agam hoqgv beknamv niqtuq lengnum, At Sw Parsiyag lvpw at Sairaswg yalam huurab mvnum, ho mwwg lvpw-haty mwlwho mwv puiyam baqmnum hoo ham xeqtwl jinum:

²³“Soq sib Parsiyag lvpw at Sairas bedo: ‘Ao lvpwg Pwnbo, At Sw ngam swcw nvg lvpw-hatiam jipa ku, hoo mwv ngam Judaho mwwg gab Jerusalemho nam namg mvm dvb ator jipa ku. Hiyv lajaqkam nulug pengko ho mwwg nyiilu gob nyin boam, mwwg Pwnbov At Sw mwwg lvgab dooba nvka. Mwam swwm to.’”