Read Nyishi 2 NWD 4 Bible Online

2 NWD 4 - Nyishi bible

2 NWD 4

¹Mwv tama yugw ak camnyi kiubit aaso dvb camnyi kiubit taqt dvb hoo camg kiubit ao dvb mvnum

²‍Ho mwv iss hingkum nannam yoqdwr hoqgv mvnum. Hoqham gooywr dvb mvnum, gamb hoqgv gamb namgub camg kiubit go, aongv ang kiubit go, hoqg rootongv xikanamv cammum kiubit go poot dvb mvnum.

³‍Hoq uraho uppum tulungam, camg kiubit go, iss hingkum ko mwlwngam tvqywrl tvqlwqnum. Uppum tulungam tvmnyi go tvqlwqnum, hwdlo hoqham joolwq yikho hoq lvgab jootaq lwqnum.

⁴‍Hoqho hvvb camleq dornyig tvqlwqnum, dorum gon nyoodum daiyab tuurwq dvb, dorum gon duo-haaga daiyab tuurwq dvb, dorum gon nyooko daiyab tuurwq dvb, hoo dorum gon dou-caga daiyab tuurwq dvb mvnum. Iss hingkum koam hoq aoho joopnum, hoo bulug koop tulungv urab doonum.

⁵‍Hoqhv lvqcw gabgwb jwwkamnum. Hoo hoqg gambam pvtaq gamb hvb mvnum, lili opu puulin bo ak hvb mvnum. Hoqhv 3,000 bat gob issam hingkum lanum.

⁶‍Mwv losuq ko pagam mamkam wyw go mvnum, hoo ang gon ham nyooko daiya ho, hoo ang gon ham nyoodum daiya ho apnum. Hoq tuluho boyuqnam akiam hwrxaqnanv pvvnum, hoo iss hingkum ko hv nyub tulu hwrxaq koob mvpnum.

⁷‍Hoo mwv xeqp kojaqb hun lemp twgwnanam camgwb mvnum, hoo hoq tulu ham dvrwq namlo uraho apnum, ang gon nyooko daiya ho hoo ang gon nyoodum daiya ho.

⁸‍Mwv tebol tulungam kam mvnum hoo hoq tulu ham dvrwq namlo uraho apnum, ang gon nyooko daiya ho hoo ang gon nyoodum daiya ho. Hoo mwv hunwg pagam mam lwwg mvpnum.

⁹‍Mwv nyub tulug baagam mvnum hoo koi baagam hoo baagwg viyap tulungam hoo hoq tulug viyap tulungam tama lvgab pioqlupnum.

¹⁰‍Hoo mwv iss hingkum koam nammwg nyooko daiya dou-cagaho apnum.

¹¹‍Hiram pwcw tulungam, tuqn nan tulungam, hoo pukaq tulungam kam mvnum. Hoqgab Hiram Lvpw at Solomon gab Pwnbog namho bon nyinam tulungam mwv nyinya jiknum:

¹²‍rwwda dvvnyi go, pukaq tulungam, hoo dumtup purlwqnam vnyi go rwwda tulug niqtuqho mwlwqnum; hoo rwwda tulug niqtuqho dumtup purlwqnam tulug pukaq kvqnyi ham gaiyam hvmsiq-hameq tvl siilupl apnum;

¹³‍hoo 400 go annar aaxiam hvmsiq-hameqnum, annar aaxy tulungam hib biinyi gogab vx-cwrho hvmsiq-hameqnum, hoqhv rwwda tuluho dumtup purlwqnam tulu pukaq kvqnyiam siilupl apnum;

¹⁴‍Mwv twgwnan tulu ngamkam mvnum, hoo pukaq tulungv twgwnan ho doonum,

¹⁵‍hoo iss hingkum ko akwn niikum ho hvvb camleq dornyi go mwlwqnum

¹⁶‍Pwcw tulungam, twqn nan tulungam, xwqgab nan tulungam, hoo dupum-dvrab mwlwngam Huram-abi kwlwq-kvlaqbo tama hoqgv Lvpw at Solomon gab At Swg namlo gab mwj kunum.

¹⁷‍Sukkot gvla Jareda pengkog deekam deelag Jordon haapa ho lvpw atv hoq tulu ham joopnum.

¹⁸‍Solomon soq mwlw sam naleqgo koi dvb mvnum, hoggab tama hoqgv vgwngam jaaka kumanum.

¹⁹‍Hoqgab Solomon Pwnbo dvrwq namlog dupum-dvrab mwlwngam mvnum: hun yugwngam, Wtw huc joopko tebol tulungam mvnum,

²⁰‍xeqp kojaqb lemp twgwnan tulungam hoo loodwrbo hun hoqgv lemp tulungam dvrwq namlog ura jaqg agaho parn dvb;

²¹‍opu tulungam, lemp tulungam, hoo sabku tulungam, loodwrbo hunam;

²²‍suunan tulungam, pukaq tulungam, sulum mwwnan pukaq tulungam, hoo cvvkaq tulungam, loodwrbo hunam, hoo Dvrwq Kwrwq Dook ura jaqg viyap tulungam mwgwnan tulungam hoo baag lvpa raag viyap tulungam hun hoqgv mvnum.