Read Nyishi 2 NWD 5 Bible Online

2 NWD 5 - Nyishi bible

2 NWD 5

¹Soq sib Solomon At Swg dvrwq namlo hoqg bon mwlwngam nyiyum kunum. Hoo Solomon mwwg ab Debidg darxaq kunam dupum-dvrab tulungam, hoo noosu ho dook bo rupam, hunam, hoo dupum-dvrab mwlwngam Pwnbog dvrwq namlog gumn uddum uraho bvqlwq kunum.

²‍Ho Solomon Israelwg nyiixa tulungam hoo nyob hoolug peelo bo tulungam, ab tulug nyigbo tulungam, Israel nyiilug nombu tulu Jerusalemho doon boam, At Swg pvvb uddum mam Debidg bopam, Jaiyon hoqgam baqlin mvdwb goqkumnum.

³‍Hoo Israelwg nyi mwlwngam Lvpw atwg durum dvk agaho hookumnum hoqhv pool kvn deenho nyinum.

⁴‍Hoo Israelwg nyiixa mwlwngv haanum, hoo Lebi nyi tulungv pvvb uddum mam joorabnum.

⁵‍Hoo bulv pvvb uddum mam, kvvrwq minsko tombu hoqgv joorabnum, hoo dvrwqbo dupum-dvrab mwlwngam tombu hoqgam Lebi nyi tulu nyub tulungv baqrabl wgnum.

⁶‍Hoo Lvpw at Solomon la Israelwg nyiilu mwlwngv mwwg agaho hookum bov, pvvb uddum agaho doonum, naleqgo sviyangam la hvvbam bulv xinya lama dvb pwr jinum.

⁷‍Ho nyub tulungv At Swg pvvb uddum mam hoq dookho joopnum, dvrwq namlog ura jaqho, Dvrwq Kwrwq Dookho, cerubimwg alap tulug lobyum ko uraho.

⁸‍Ho cerubim alap tulungv pvvb uddum dookam lobyumnum, hoqgab cerubimv pvvb uddum ao ngamla hoqg lyvxar tulungam lobyumnum.

⁹‍Hoo lyvxar tulungv aaso ko-gab Dvrwq Kwrwq Dook dvrwq namlog ura jaqg haaga ho lyvxar niqtuq akwn kaapanum; hvbmabde lvvg hoqgv hoq tulu ham kaapa maanum. Hoo hoq tuluhv sool namgub doodwn.

¹⁰‍Pvvb uddum uraho Mojesg Horeb ho wlw tvqnyig xeqtwl jinam aro hv doonum, hwdlo bulv Ijipt gvda hoqgv leng yikho, hogloq ham At Sw Israelwg nyiilu lvgab pvvb birkunum.

¹¹‍Hoo hwdlo nyub tulungv Dvrwq Kwrwq Dook hoqgv lengyikam (hoggab nyub mwlwngv bulv atv atam dvpar xipin-xira maab garxaq sudwn,

¹²‍hoo Lebi nyi tulug bemin benbov, Asap, Heman, hoo Jedutun, bulug ko tuup tulungv hoo imiq lwkw nyi mwlwngv topum vjam kootwl, ludum pup tubnam tulungam, rwwxw tulungam, hoo gungga tulungam bwwtwl yugwg dou-cagag ho tuuly miqnbo nyub tulungv 120 go bulug lvgab daqnum;

¹³‍hoo soq sam tuuly miqn bo tulu ngvla bemin benbo tulungv bulv atv lvkin gob At Swn xuml-paql hoo paqyalinco paqdwb nyiky dvb nyinum), hoo hwdlo bemin berabyin tuuly miqnan tulu ngvla ludum pup tubn nan tulu ngvla luusaq-luusaq rwwxw-gungga, dumdum-taal lvgab At Swn paqnum, “Hoggab mwv aldvn, hoggab mwwg abynamv nwrba gob dooyu dvn,” nam hv, At Swg namlo ho haapamv bwwrnum,

¹⁴‍hoqgab nyub tulungv haapam hwrgam gab bon nyinyi kumanum, hoggab At Swg yuu- namv Pwnbog namlo ho bwwr tvl doonum.