Read Nyishi 2 NWD 6 Bible Online

2 NWD 6 - Nyishi bible

2 NWD 6

¹Ho Solomon benum, “At Sw benum mwv doomwq kan twdwqko ho doogw dvn.

²‍Hvbmabde ngo noqgab yuunam dvrwq namlongam pooj pakun, noqgab nwrba gob doogw dook ak mvp pakun.”

³‍Ho hwdlo hookumbo Israel nyiilungv daqrab yin, lvpw at tobkur banv hookumbo Israel nyiilu mwlwngam lvqc cinum.

⁴‍Hoo mwv benum, “Israelwg Pwnbo At Sw xinam jaqkv, hoggv mwwg agam hoqgv ngoqg ab Debidnvn mwv dingrwl benam mam mwwg alaqkv niqtuq lengm paku, hoo begamv,

⁵‘Ngoqg nyiilungam ngo hwdlo aalho Ijipt hoqgv boolin yukho, Israelwg nyob hoolu mwlwngv bopam uraho ngoqg nam namg mvm dvb daalin maanum, hoqho ngoqg eminam doom dvb xuqmanum, hoo ngoqg Israel nyiilug aoho lvpw at ko tuup gob ngo xuqmanum;

⁶‍hvbmabde ngoqg eminam doom dvb ngo Jerusalem mam daalin pakun, hoo ngoqg Israel nyiilu aoho Debidnvn ngo daalin pakun.’

⁷‍Hoq moodho ngoqg ab Debidg hang ura lo Israelwg Pwnbo At Swg emin gab dvrwq namlo ak mvdwb mwwnum.

⁸‍Hvbmabde At Sw ngoqg ab Debidnvn benum, ‘Noqg hang ura lo ngoqg emin ho dvrwq namlo ak mvdwb mwwdo, noqg hang ura lo mwwnam hv, no aljaqb nyipa ku.

⁹‍Hvbsujaqkam, no hoq dvrwq namlo ham mvnyiram, hvbmabde nam ko tuup bwwj deenam noqg ko tuupv ngoqg emin ho dvrwq namlongam mvtayin.’

¹⁰‍Sija At Sw mwwg dingr kunam mam mwv niqtuq nyilin paku. Hoggab ngoqg ab Debidg kwlib ngo swwpa kun hoo At Swg dingrnam hvb Israelwg pvlw ao si dood kun, hoo Israelwg Pwnbo At Swg emin ho ngo dvrwq namlongam mvpa kun.

¹¹‍Hoo hogloq ham At Sw Israel nyiilungam birnam pvvbam jiknam mam, hoq pvvb uddum mam ngo hoqho mvp pakun.”

¹²‍Ho Solomon Israel nyi mwlwg hookumbo kaagaho At Swg yugw agaho daqtwl hoo mwwg alaqkam yvmjinum,

¹³‍Solomon tama daqtam nan ak ang kiubit aaso dvb, ang kiubit taqt dvb, hoo oum kiubit ao dvb mvtwl, hoo ham baag ho apnum, hoo mwv hoqho daqnum. Ho mwwg lwbwngv mwv Israel nyi mwlwg hookumbo kaagaho kump tvl, hoo mwwg alaqkam doa aob yvmjinum,

¹⁴‍hoo benum, “Israelwg Pwnbo At Swa, swcw nyodo so noq hvb nyinbo Pwnbo dooma dvn, pvvb birnam mam pvvdwn hoo hiyv noqg agaho bulug hvvjw lvgab mwwjwl wnbo noqg nyera tulungam noqg tumanam abiam kaakin dvn,

¹⁵‍ho noqg nyera ngoqg ab Debidnvn hoggv no bibwq kunam ham pvvl ap jipa ku. Noqg agam hoqgv goonam mam noqg alaqkv soq aal so niqtuq nyilin paku.

¹⁶‍Hoqgab sija, Israelwg Pwnbo At Swa, noqg nyera ngoqg ab Debidnvn hoggv no dingr kunum ham no pvvj paku, begamv, ‘Noqg ko tuup tulungv bulug nyij-mujam hengabl nyib nyiloqkam, ngoqg agaho noqg nyinam wnam hvb bulv nyib wb nyiloqkam, ngoqg agaho Israelwg pvlw ho doody bo nyiingv nywywngam xooram.’

¹⁷‍Hoqgab sija, Israelwg Pwnbo At Swa, noqg nyera ngoqg ab Debidnvn noqg gomcwr gooknam ham pwbw niqtuq lengm tuku.

¹⁸“Hvbmabde Pwnbov jvqtw jaqb nyi akwg lvgab swcw so doota yin yv? Kaato, doa aongv hoo ao nyookv kam nam dook doog dvb jila maadwn; ngoqg soq namlo mvnam si vcjaqb anyo dvn!

¹⁹‍Hvbsujaqkam noqg nyerag swgwl hoo mwwg xumnam sam, ngoqg Pwnbo At Swa mwwka tvbv, soq aal so noqg nyerangv noqg agaho xabnam mam la swgwnam mam tatbv,

²⁰‍ho ngoqg eminam doom dvb noqg dingr kunam nyook so, noqg vnyiqkv ai-aalwb soq namlo daiyab tuury tuuiya tvbv, ho soq nyook daiyab noqg nyerangv tuurwq tvl nam swgw baloqkam no tatayin.

²¹‍Hoo hwdlo noqg nyerangv la noqg Israel nyiilungv soq nyook daiyab swgw yikam no tatayin. Hoo noqg doogw ko ao nyookho tapa dvn, hoo hwdlo no tapayin, ngulam paqnyi tvbv.

²²“Nyi ak mwwg door-doopwngam ceekol nyic nyipel hoo soqg namlog noqg yugw agaho mwwg dingnam mam dingb nyiloqkam,

²³‍ho ao nyookv tapa dvn hoo noqg nyera tulungam pw-hwwdwn, mwwg nyixiaqkam mwwg atwg dumpo ho haam dvn, hoo mwwg nyedar nyiib nyigam gab mwwg lootwngv mwam lvqc cidwn.

²⁴“Noqg Israel nyiilungam ceebio tulug agaho mviyanum hoggab bulv nam ceekol nyic nyinum hoo bulv noqg dookub lokta tobkurl noqg eminam bepa yin hoo soq namlo soqgv swgwl noqg lvgab xuml koikam,

²⁵‍ho ao nyookho tapa dvn hoo noqg Israel nyiilug nyicam paqnyi jidwn hoo bulug ab tulungam gvda jinam ho bulam lokta boa dvn.

²⁶“Hwdlo doangam mutum yin hoo nyodo homa dvn hoggab bulv nam ceekol nyic nyipa ku, ho bulv soq nyook daiyab pwrarl swgw baloqkam hoo noqg eminam bepal hoo bulug nyic hoqgv wkur baloqkam, hwdlo bulam no hentwr hem yin,

²⁷‍ho ao nyookv tapa dvn hoo noqg Israelwg nyiilu, noqg nyera tulug nyicam no paqnyi jidwn, hwdlo no bulam albo lamtangam bulam wwm dvb tomswr dvn, hoo hogloq ham noqg nyiilungam otu gob jiknam, noqg gvda aoho nyodongam hom jidwn.

²⁸“Gvda ho dwr-kano wikam, iicw-tobum dooiyv nyiyikam, ho vly-aaxeqkv yaaikam, ho takam-yorup pv wikam, ho liilungv piiyikam, bulug ceebiongv bulam bulug gvda toggoq tulu namgub naareq yin, hoolu luuxy swlin-mominv nyiyikam, ho hoqho hoolu luuxy vc-apiv ciyikam,

²⁹‍noqg Israel nyiilungv la nyiicwr-cwrxiv, at atwg hentwr-kaasam mwwg atwg hang ho mwwgab tvl hoo mwwg alaqkam soq namlo daiyab ijin tvl, hoggv xeq swgw dvn, hoggv xeq kodwn,

³⁰‍ho noqg doogw ko ao nyookv tapa dvn hoo paqnyi dvn hoo hiyvg hangam no cengdwn, mwwg nyicw-wcwb jaqb nyiicwr-cwrxiam nyij to, hoggab no, no aro twq nyia ko mwlwg hangam cengdwn,

³¹‍ho ngulug ab tulungam noqg gvda jinam ho bulv doody deedib bulam nam bos mvm to.

³²“Hoq hvbkalam, hwdlo nyoodo nyiingv, hiyv Israelwg nyiilu maanbov, noqg koibo emin gab hoo noqg atorbo alaqkam, hoo noqg laqpo laqtornam mam tapa peel aado gvda hoqgv haalayil, hwdlo mwv soq namlo daiyab swgw yin,

³³‍noqg doogw ko ao nyookho tapa dvn hoo nyoodo nyi ak hv nam kok jaqb nyij dvn, ho noqg Israel nyiilungam nyinam hvb, noqg eminam swcw soqg nyiilu mwlwngv cengtayin hoo nam bos tayin, hoo soq namlo sam ngoqg mvnam si noqg eminam goqnamv hvl bulv cengtayin.

³⁴“Noqg nyiilungv bulug ceebiongam ceekol nyob patab lengyi nyiloqkam, no bulam hogloq lamta bvxeq kanam jaqkam, hoo bulv noqg xuqlin ko bopam daiya bvla noqg emin gab ngoqg namlo mvpko daiyab tuurwq tvl swgw baloqkam,

³⁵‍ho ao nyookho bulug swgwnam mam la bulug konam mam tapa dvn hoo bulug pagoq gab svka dvn.

³⁶“Bulv nam ceekol nyic nyiyi nyiloqkam—hoggab nyic nyima bo nyi akkam dooma—hoo no bulam hang lengnum hoo bulam ceebio alaqb jinam, ho bulam ogum bvla aadob ceebio tulug gvdab nyumwb boomnum,

³⁷‍hvbsujaqkam bulam nyumwb book gvda hoqgv bulug hangv mwwdil hoo mwwkurl hoo bulam nyumwb boop ko gvda hoqgv nam xuml begamv, ‘Ngulv nyic nyipa ku hoo nyic-nyia looda nyixiaq tukba hvl beikam,’

³⁸‍bulug mwwnam lvgab hoo bulug hang lvgab bulam nyumwb boop ko ceebio tulug gvda hoqgv bulv mwwkurl, bulug ab tulungam noqg xuqlin layil bopam jinam ho, hoo noqg emin gab ngoqg namlo mvnam daiyab gvdab bulv swgw baloqkam,

³⁹‍ho noqg doogw ko ao nyook hoqgv bulug swgwnam mam la bulug konam mam tapa dvn, hoo bulug pagoq gab svka dvn.

⁴⁰‍Hoqgab sija, ngoqg Pwnboa, noqg vnyiqkv nyiqbio tvl hoo noqg nyurungv ruucw kwrgab tvb soqg nyook soqgv nam swgwnam mam.

⁴¹Hoo sija gorabto, Pwnbo At Swa, no la noqg atorbo pvvb uddumv, hoo noqg doonu ko nyookub wto. Pwnbo At Swa, noqg nyub tulungam ywwlinam vjam koom to, hoo noqg alnam ho noqg xuqlinam tulungam hemp-hvnyir mvto.

⁴²Pwnbo At Swa, noqg nyuqm mam noqg xuqlinam ak hoqgv moiyeq maabv! Noqg nyera Debidnvn noqg tumab abynam mam mwwpa labka.”