Read Nyishi 2 NWD 7 Bible Online

2 NWD 7 - Nyishi bible

2 NWD 7

¹Solomon mwwg swgwnam mam mvnya kalam twqda, ao gvda hoqgv wmv guanum hoo pwr aky jinam tulu ham guiyumnum, hoo dvrwq namlongam At Swg yuunamv bwwr tvl doonum.

²‍Hoo nyub tulungv At Swg dvrwq namlo ho haanyi maanum, hoggab At Swg dvrwq namlo uraho At Swg yuunamv bwwr tvl doonum.

³‍Hwdlo Israel nyiilungv wm guanam mam la At Swg dvrwq namlo ho At Swg yuunam kaapa yin, bulug nyuqm mam lamta haagag kedho pvxwl tvl bulv xumnum hoo At Swn paqyalinco paql begamv, “Hoggab mwwg aldvn, hoggab mwwg tumab abynamv nwrba xaqb dooyu dvn.”

⁴‍Ho lvpw atv la mwwg lvgab dooba bo nyiilu mwlwngv At Swg agaho pwr jinum.

⁵‍Lvpw at Solomon pwr aky gob hvvbam 22,000 go hoo sviyangam 120,000 go aky jinum. Hoqgab lvpw atv la nyiilu mwlwngv Pwnbog dvrwq namlongam darxaqnum.

⁶‍Nyub tulungv bulug dook ho doonum; At Swn paqn mvdwb Lvpw at Debidg jinam yaldwwl miqnnan rwwxw-gungga lvgab Lebi nyi tulu ngvkam At Swn paqyalinco paqnum—hoggab mwwg tumab abynamv nwrba xaqb dooyu dvn—hwdlo Debid paqnam akiam bulv bon nyiyikam; taqcgon ho nyub tulungv tuuliam miqnum, hoo Israel bumpwngv daqrabnum.

⁷‍Hoo Solomon At Swg dvrwq namlog lvpa ra dookum ko baagam garxaqnum, hoggab mwv boyuqnam akiam hoo swrso gab ox akiam hoqho jinum, hoggab Solomonwg tama yugw mvnam hv boyuqnam akiam la dvs-twws akiam hoo swrso gab ox akiam jiknv anyonum.

⁸‍Hoq moodho Lebo-hamat hoqgv Ijipt gv kucw namgub, aal kvn mood go, Solomon la mwwg lvgab nyi mvqlw jaqb hookum layil durum dvnum.

⁹‍Hoo aal piin deenho mwv bulam piwr jwr-jwr dvb dookum ak doognum, hoggab bulv yugwngam darxaqnam mam aal kvn go hoo durum dvnam mam aal kvn go nyidwb pvvknum.

¹⁰‍At Swg Debidnvn la Solomonnvn hoo mwwg Israel nyiilungam swwm-geem dvb jiknam lvgab mwv nyiilungam pool kvnwg camnyi leq loum aalho bulug nammwb hemp-hvnyirl hoo mwwngaml bulam wwm kunum.

¹¹‍Soq sib Solomon At Swg namlongam la lvpw atwg dook nammam mvnya kunum. Solomon mwwg mwo koob jaqb At Swg namlongam la mwwg atwg nammam mvnya kunum.

¹²‍Ho At Sw Solomonnvn ai daqlinv hoo mwam benum: “Noqg swgwnam mam ngo tapa paku hoo soq nyook sam ngo atv pwr jik nam gob daalin pakun.

¹³‍Hwdlo ngo doa aongam nyodo hom mvmab mutum yin, ho komar takamv gvdangam dvxin yin, ho dwr-kanongam ngoqg nyiilu pengko ho kanam yin,

¹⁴‍ngoqg eminam naanbo ngoqg nyiilungv bulv atv atam yan baloqkam, hoo swgwl ngoqg nyuqm mam meegaq baloqkam hoo bulug nyic-nyia lamta hoqgv wkur baloqkam, ho ngo ao lvpw hoqgv tapa tayin hoo bulug nyicam paqnyi jitayin hoo bulug gvdangam mwptayin.

¹⁵‍Hoqgab sija ngoqg vnyiqkv nyiqbio tvl hoo soq nyook soqgv swgwnam mam ngoqg ruucw kwrgab tayin.

¹⁶‍Hoggab ngo sija soq nam sam ngoqg eminam nwrba xaqb doom dvb xuqbwql garxaq gvi kun. Ngoqg vnyiq kvla ngoqg hangv hoqho lwxiam dootayin.

¹⁷‍Hoo noqgab, noqg ab Debidg nyinam hvb no ngoqg agaho wb nyiloqkam, ho ngoqg gaml jinam mwlwngam hoo ngoqg nyij-mujam la ngoqg pvvb tulungam pvvl nyib nyiloqkam,

¹⁸‍ho ngo noqg ab xinam pvlwngam mvko jitayin, ngo hoggub noqg ab Debidnvn lvgab pvvb birnum, begamv, ‘Israelam pvvb bwwl doog deenbov nyi akkam dooma nyiram.’

¹⁹“Hvbmabde no lamtangam wxaq baloqkam hoo ngoqg nyij-mujam hoo ngoqg gaml tulungam nam jinam mam pvvmab hoo asaq pwnboam bon nyijil hoo bulam xumb nyiloqkam,

²⁰‍ho ngo nulam gvda jinam hoqgv nulam mvpaq tayin, hoo ngoqg emin gab ngoqg soq darxaqnam namlo sam apaq tayin, ngoqg kaaga soqgv mvpaq tayin hoo ngo sam dootin tingnam gob la nyiilug gomcu pui gob mvtayin.

²¹‍Hoo soq yuunam nam sam wpeql kaanbo nyiicwr-cwrxiv ham lomtayin hoo bulv betayin, ‘Hoggub yu soq gvda sam la soq nam sam At Sw mvpa kun?’

²²‍Ho bulv betayin, ‘Hiyv bulug ab tulungam Ijipt gvda hoqgv boolin bo bulug Pwnbo At Swn bulv apaq ko-gab hoo asaq pwnboam mwwgwl hoo hoq tulu ham xuml hoo hoq tulu ham bon nyijnum. Hoqgab soqg ciqcaq-bviyaq sam bulug aoho mwv haam pakun.’”