Read Nyishi 2 NWD 8 Bible Online

2 NWD 8 - Nyishi bible

2 NWD 8

¹At Swg namlongam la mwwg atwg lvpw namlongam, Solomon vnyw camnyi vtwr-anya ho muiyum kunum,

²‍Solomon mwam Hiramwg bopam jinam tulu ham mvdarnum, hoo hoq tuluho Israel nyiilungam nvmcw doomnum

³‍Hoo Solomon Hamat-joba wnv hoo ham naanum.

⁴‍Mwv Tadmorngam deexa-raraho mvnum hoo mwv mwlw noosu bopam tulungam Hamat ho mvnum.

⁵‍Mwv Odum Bet-horon ngamla Ako Bet-horon ngam, gurum nwqtumnam bopam tulu lvgab bvliv, toggoq tulungv, hoo yoqdwr viyap tulungv mvnum,

⁶‍hoo Baalat, la Solomonwg doognam noosu bopam tulungam hoo mwwg ceriot tulug bopam mam hoo mwwg svpur xargbo tulug bopam mam, hoo Jerusalemho, Lebanon ho, hoo mwwg pvvb bwwl doog ko gvda mwlw ho Solomon mwwg mwwlwq kojaqb mvnum.

⁷‍Hittait nyi tulungam, Amor nyi tulungam, Perijj nyi tulungam, Hibitait nyi tulungam, hoo Jebus nyi tulu hoqgv nyiilu pengko hoqgv nyi doonyu boam, hiyv Israelwg nyiilu maanboam,

⁸‍bulug hotam hoqgv gvdaho apaq peel wleqnam mam, ho hiyam Israel nyiilungv twryum maanum—hoq nyi tulu ham Solomon nyera-paqn hvb bon nyim dvb gaml jiknum, hoo soq aal xaqb bulv hvb nyil doodwn.

⁹‍Hvbmabde Solomon Israel nyiilungam mwwg bonam nyim dvb raasur tulu gob mvmanum; bulv sipai tulungv, hoo mwwg saab tulu gob, mwwg ceriot tulungam gaml jinbo tulu gob, hoo mwwg svpur xarg bo nyi tulu gob mvnum.

¹⁰‍Hoo soq tulu si Lvpw at Solomonwg peelo bo saab tulungv, 250 go, hiyv nyiilu gaml ator jinum.

¹¹‍Solomon Parog nyem kongam Debidg bopam ho mwn gab mwwg nam mwjnam hoqgv boolinv mwv begamv, “Ngoqg nywxw si Israelwg lvpw at Debidg nam mvnam so dooram, hoggab At Swg pvvb uddum mam baqa tak nyook si dvrwqdvn.”

¹²‍Ho Solomon At Swg namlog haaga ho mwwg At Sw gab yugw mvnam aoho boyuqnam akiam jinum,

¹³‍aal looxiam jicwngam jidwb nyinam mam, Doonu aal gab, nit pool gab, hoo vnywngam luum go durum dvnam gab—Opap kiilwq maab durum dvnam gab, Aal kvn go Durum dvnam gab, hoo Doogw durum gab Mojesg gaml bekjaqb jidul doonum.

¹⁴‍Mwwg ab Debidg pvvb mvnam hvb, mwv nyub tulungam bulug bonam hib-hibib mwbwq jinum hoo aal looxiam nyub tulug agaho Lebi nyi tulungv bulug xumg-paqg deenam mam mwbwq jinum, hoo toggoqkam rvky bo tulungam toggoq vxy ho mwbwq jinum, soq tulu sam Pwnbog nyi Debidg gaml jinam hvb nyiknum.

¹⁵‍Hoo hoggv lvpw atv nyub tulungam la Lebi nyi tulungam pagoq mwlwngam la gumn uddum tulu gab gaml jiknam ham bulv nyik-nyiya maab nyinum.

¹⁶‍Soq sib nyil Solomon At Swg namlo gwwlam mvrab yuk aal hoqgv mvrab layil hoqg bonam mvnya namgub mvnum. Hoqgab At Swg namlongam mvnya kunum.

¹⁷‍Ho Solomon sa-svlog soiyoqg Ejion-geber la Elotwg Idom gvdab wnum.

¹⁸‍Hoo Hiram mwwg nyera tulungam hiyv sa-svlongam pwbwb cengn boam mwam kanam jinum, hoo bulv Solomonwg nyera tulu lvgab lvkin gob Opir gvdab wnum hoo hoq hoqgv hunam 450 telent go baqanum hoo hoqham Lvpw at Solomonnvn baqa jinum.