Read Nyishi 2 NWD 9 Bible Online

2 NWD 9 - Nyishi bible

2 NWD 9

¹Hwdlo Sebag vi-kooriv Solomonwg yuunam mam tapa yin, mwn Jerusalemho mwam vc loodab vs-axaqbo toxnam mam pooiyeql tox taab haanum, ho koi jaqb nyera-paqnam, hoo duiyub-dvgabnan tulungam la hunam hoo xinam wlwngam svjin tulu lvgab baqlayil haanum. Hoo hwdlo mwn Solomon dook ho haanum, mwn mwam mwnwg hog mwlwngam mwwnam mam betamnum.

²‍Hoo Solomon mwnwg toxnam mwlwngam birwqnum; Solomon hog akkam biyum doomab mwnwn hog mwlwngam pvvs maab betamnum.

³‍Hoo hwdlo Sebag vi-kooriv Solomonwg pumb-rwnam mam, mwwg nam mvnam mam kaapa yin,

⁴‍mwwg tebol ho dvs-twws doonam mam, mwwg saab tulug doonam mam, hoo mwwg nyera-paqn tulungam, bulug vjam, mwwg dvs-twws bwiya jinbo tulungam, hoo bulug vjam, hoo At Swg namlo ho mwwg boyuqnam aky jinam tulungam kaatwl, mwn saqmab doonum.

⁵‍Hoo mwn lvpw atam benum, “Ngoqg atwg gvda lo noqg gomcwr tulungam hoo noqg pumb-rwnam mam ngo jvqtw pui gob tapanum,

⁶‍hvbmabde ngo puiyam mwwjw maanum hwdgo ngo so haanum hoo ngoqg atwg vnyiq hoqgv ham kaanam xaqb. Hoo kaato, papo gon ngam betam maanum; noqg naleq-baceqnamv ngoqg tapanam mam laabo yaapa ku.

⁷‍Xinam jaqkv noqg nywxw tulungv! Xinam jaqkv noqg nyera-paqn tulungv, hiyv noqg agaho daqtwl hoo noqg pumb-rwwl goonam mam tan bov!

⁸‍Xinam jaqkv noqg Pwnbo, At Sw, hiyv nam hemp mvnum hoo ngoqg Pwnbo At Sw nam mwwg pvlwho doom dvb jin bov! Hoggab noqg Pwnbov Israelam nwrba xaqb aby dvn hoo bulam kuiyum xaqb doom tai, mwv nam lvpw at gob mvpa ku, ho nam jvqtwngam la lootwngam nyil swwg mvdwb.”

⁹‍Ho mwn lvpw atam hun 120 telent go, hoo vijaqg duiyub-dvgab pvla xinam wlwngam jinum. Lvpw at Solomonnvn Sebag vi-koory duiyub-dvgab jinam hvb nywywngam hiyvkam jika maanum.

¹⁰‍Hoq aoho, Hiram la Solomonwg nyera tulungv Opir gvda hoqgv hunam, tai svvdangam hoo xinam wlwngam baqa jinum.

¹¹‍Hoo lvpw atv At Swg namlongam la lvpw atwg nammam hoqg tai svvda hoqgv loqjum mvnum, hoq lvg-lvgab bemin benbo tulu gab rwwxw-gunggangam mvnum. Hoq hvb svvda aljaqn boam soolo godab Juda gvda ho kaaka maanum.

¹²‍Hoo Lvpw at Solomon Sebag vi-koorig mwwbynam hog mwlwngam jinum, Lvpw atwg jinam lvvg hoqgv hoggv xeq mwn mwam toxnum hog mwlwngam betamnum. Ho mwn mwnwg nyera-paqn tulug lvgab atwg gvdab wkur kunum.

¹³‍Vnyw nywkin ho Solomon gab hun haan bov 666 telent go,

¹⁴‍hoq lvvg ho nyook kaagaqbo tulu hoqgv hoo kwm-kor mvgaqbo tulu hoqgv baqa jinum. Hoo Arabiyag lvpw at tulu hoqgv hoo gvdag nyiit rad tulu hoqgv Solomonnvn hunv hoo rupv boqkum jinum.

¹⁵‍Lvpw at Solomon hun svtam koibo 200 go mvnum; svtam akin ho hunv 600 sikil go mwlwqnum.

¹⁶‍Hoo mwv hun svtam anyo boam 300 go mvnum; svtam akin ho hunv 300 sikil go mwlwqnum; hoo lvpw atv hoq tulu ham Lebanonwg Nyoro Namho apnum.

¹⁷‍Lvpw atv svt vx hoqgv pvlw dootam mam mvnum hoo hoq ham loodwrbo hun lvgab pioqlupnum.

¹⁸‍Pvlw dootam mam biakop ax go doonum, hoo hoqg lvpia datam mam hunv mwlwqnum, hoq tuluhv pvlw dootam ho mvtaq lwqnum, hoo pvlw dootam taqc-loosaq ho laqpo tunu koam mvpnum hoo laqpo tunu ko bviywrho sony nyot dornyi go daqdwb mwlwqnum,

¹⁹‍baakap kabxig kap-kapho tuur-tuusaqho sony nyot dorg-dorgwb daqdwb mwlwqnum, hoqho sony nyotv camleq dornyi go daqnum. Hoq hvb mvnam ham nywywngam hiyvg lvpw-haty ho mvka maanum.

²⁰‍Lvpw at Solomonwg twwnan ujuq pvtaq mwlwngv hun hoqgv mvnumv, hoo Lebanon Nyorog Namho dupum-dvrab doonbo mwlw hv loodwrbo hun hoqgv mvnumv. Solomonwg swwd aalho rupam hog hvvtw gob ximanum.

²¹‍Hoggab lvpw atwg iss jaajv Hiram nyera tulu lvgab Tarsisib wnum. Vnyw nywum kokw-kokwngam Tarsis hoqgv hunam, rupam, svt vxiam, nyiima sorxaqkam, hoo tvvi-taaxongam baqanum.

²²‍Soq sib Lvpw at Solomon swcw soqg lvpw at mwlwngam nyet bvla pumb-rwbin yaanam gob nyinum.

²³‍Hoo Pwnbov Solomonnvn mwwg pumb-rwnam mam, swcw soqg lvpw at mwlwngv Solomonwg dook ho haal mwwg mwwlaql nyijwq-nyegam gamnam mam tanum.

²⁴‍Nyiicwr-cwrxiv mwwg aky jisam rupam hoo hunam, vjam, mirram, duiyub-dvgab nannam, svpuram, hoo svdam tulungam vnyw-vnywngam vigo jinum.

²⁵‍Hoo Solomonwg ceriot la svpur tulug daqk nammv 4,000 go doonum hoo svpur xarg bo nyi tulungv 12,000 go doonum, hoq tulu ham mwv ceriot tulug dook bopam hoola lvpw at lvgab Jerusalemho doomnum.

²⁶‍Hoo Iupratas hoqgv Palistan gvda namgub hoo Ijipt gv door namgub mwlwg lvpw at tulungam pvvb bwwl doognum.

²⁷‍Hoo lvpw atv Jerusalemho wlwngam gooiyab mvnam hvbkalam rupam mvnum, hoo Sepelag taoq svvda tulu naleqnam hvbkalam sidar svvda mvnum.

²⁸‍Hoo Solomon Ijipt hoqgv la gvda mwlw hoqgv svpur tulungam boanum.

²⁹‍Solomonwg asaq nyinam mwlwngam, nyirab hoqgv nyitwr-nyinya namgub, nyiqry benbo Natanwg gon, hoo Silo nyi Ahijag nyiqry benam ho, hoo Nebatwg ko tuup Jeroboamwg pagoqkam nyiqry benbo Iddog nyiqry kaanam ho xeqp maap nvi yv?

³⁰‍Hoo Solomon Israel bumpwngam Jerusalemho vnyw campy go pvvb bwwl doognum.

³¹‍Hoo Solomon mwwg ab tulug sinam hvb siknum hoo mwwg ab Debidg bopam ho liiknum, hoo mwwg kwlib mwwg ko tuup Rehoboam pvvb bwwl doognum.