Read Nyishi IJRA 3 Bible Online

IJRA 3 - Nyishi bible

IJRA 3

¹Hwdlo pool kvnv haadwk ho Israelwg nyi tulungv bulv pamda ho doonum, ho nyi akin hvb nyiilungv Jerusalemho hookumnum.

²‍Ho Jojadak gv ko tuup Jesua mwwg nyub ajin tulu lvgab, hoo Sealtielwg ko tuup Jerubbabel mwwg imiq lwrw lvgab, hoo bulv Israelwg Pwnbog yugwngam mvdarnum, hoqho Pwnbog nyi Mojesg Pvvb xeqp ko jaqb boyuqnam akiam jinum.

³‍Bulv yugwngam hoqg nyook ho mvp kunum, hoggab gvdaho doonbo nyiilungam bulv bosnum, hoo bulv At Swn boyuqnam akiam ariyum-arwb jinum.

⁴‍Hoo xeqpnam hvb bulv Doogw Durum mam nyinum, hoo aal looxiam boyuqnam akiam pvvb xeqpko jaqb aal loocw-lootam nyidy sanam mam nyinum,

⁵‍hoo lwxiam boyuqnam aky jicw lvvg ho nit poolam At Swg xuqbwql apnum durum tulungam nyinum, hoo nyiicwr-cwrxiv at mwwlwqb At Swn aky jinum.

⁶‍Pool kvn deenwg otuq aal hoqgv bulv At Swn boyuqnam akiam jirab kunum. Hvbmabde At Swg dvrwq namlog gwwlam diirab maatanum.

⁷‍Hoqgab bulv simit mistri tulungam la svvtaq jem mvnbo tulungam twngkam jiknum, hoo Parsiya lvpw at Sairaswg tamlin kunam hvb, sidar svvdangam Lebanon hoqgv sa-svlo issib Joppa namgub baql mvdwb, Sidon la Taiyar nyiilungam dvsam, twwsam, hoo kutiam jinum.

⁸‍Pwnbog namlongam Jerusalemho haaknamv vnyw nywnyi gola pool bvrnyi deen kokw so Sealtiel ko tuup Jerubbabel la Jojadak gv ko tuup Jesua bulug imiq lwrw tulu lvgab, ho nyub tulu ngvla Lebi nyi tulungv nyumwb booknum hoggv Jerusalemb hookur kunbov lvkin gob bonam nyirab kunum. Bulv Lebi nyi tulungam vnyw camnyi hoggv naalayil hoq odum mam At Swg nammam kvvyw-tadal bonam nyig mvdwb xuqlinum.

⁹‍Hoo Jesua lvgab mwwg ko tuup tulungv la mwwg vbw-bor tulungv, hoo Judag ko tuup tulungv la Kadmiyel mwwg ko tuup tulungv lvkin gob Pwnbog nammam mvdar dvb bonam kvvyw-tadal nyignum, hoq lvgab Henadadg ko tuup tulungv la Lebi nyi tulungv bulug ko tuup tulug lvgab bulug vbw-bor tulungv bonam nyimin gvnum.

¹⁰‍Hoo hwdlo nam mvnbo tulungv At Swg dvrwq namlog gwwlam hiqrab yukho nyub tulungv bulug vjam kootwl tuuly miql hoq daiyab haanum, hoo Asapwg ko tuup Lebi nyi tulungv ludum pup tubal Israelwg lvpw at Debidg bek jaqb At Swn paqnum.

¹¹‍Hoo bulv lvkin gob jeiyab twqb bemin bel At Swn paqyalinco paqnum, “Hoggab mwv aldo, hoggab Israelam mwwg tumab abynamv nwrba gob dooyu dvn.” Hoo nyiilu mwlwngv vcjaqb goqr rol At Swn paqyalinco hvl paqnum, hoggab At Swg namlo gwwlam diigab kunum.

¹²‍Hvbmabde hwdlo hoq nam hoqg gwwlam diilwq yukho, otuqg nammam kaanbo nyub tulungv la Lebi nyi tulungv, ab dvpar hoqg nyibo tulungv, nyi axangv naleqgo vcjaqb sogoql xabnum, hvbmabde naleqgo hvraqb nyiingv hempwl sogoqnum,

¹³‍hoqgab nyiilungv bulug hempwl sogoqnam mam la nyiilug mwwdwql xabnam yalam tadar lak maanum, hoggab nyiilungv vc loodab sogoqnum, hoo bulug sogoqnam yalam aado kiyo hoqgv tapanum.