Read Nyishi IJRA 4 Bible Online

IJRA 4 - Nyishi bible

IJRA 4

¹Hwdlo ceebio tulungv Juda gvla Benjaminwg nyiilungv nyumwb booknum hoqgv hookur laikul Israelwg Pwnbo At Swg dvrwq namlongam mvdar dvk hvl tapa yin,

²‍bulv Jerubbabel nvla imiq-imiq hoqg peelo bo tulungam bulv benum, “Ngulam rub nulug lvgab nam mvmin gvm tvb, hoggab nulug Pwnboam nulv hoggub xumdwn hvb nulv xumdwn, hoo hwdlo Assiriyag lvpw at Esarhaddon ngulam so boolwq yik aal hoqgv jaq mwam ngulv pwr jidul doodwn.”

³‍Hvbmabde Jerubbabel, Jesua, hoo Israelwg ab tulug imiq dvpar tulug peelo bo tulungv bulam benum, “Ngulug Pwnbog nam mam mvdwb nulv ngulug lvgab hog nyis dooma; hvbmabde Israelwg Pwnbo At Sw gab ngulv vpwb nam sam mvtayin, Parsiyag lvpw at Sairas ngulam gaml jinam hvb ngulv nyitayin.”

⁴‍Ho gvda hoqg nyiilungv Judag nyiilungam hang hopaq dvb benum hoo bulam nam mvm mvma dvb bos belamnum

⁵‍hoo Parsiyag lvpw at Sairas mood hoqgv naalayil Parsiyag lvpw at Darius mood namgub, tomswr-hony bo tulungam nyuur-kam jitwl bulam ceekol hang hom dvb mvnum.

⁶‍Hoo Ahasueruswg mwwg pvvb bwwl swwrab gvi moodho, bulv Juda gvla Jerusalemho doonbo nyiilungam timbwl sorl xeqnum.

⁷‍Artaserseswg moodho Bislam la Mitredat hoo Tabeel hoo bulug ajin tulungv Parsiyag lvpw at Artasersesnvn pui pota xeqnum. Pui pota ham Aramaikwb xeqnum hoo ham xiqsil xeqlin kunum.

⁸‍Gaml jinbo Rehum hoo xeqn bo Simsai Jerusalem mam ceeko banv lvpw at Artasersesnvn soq pui pota sam xeqnum:

⁹‍Gaml jinbo Rehum, xeqn bo Simsai, hoo bulug ajin tulungv, nyegam tulungv, nyiit rad tulungv, saab tulungv, Parsiya nyi tulungv, Erek gv nyi tulungv, Bebilon nyi tulungv, Susa gv nyi tulungv, hoqhv Elam nyi tulungv,

¹⁰‍hoo nyob mwlwngv hiyam koibo la xinam Osnappar nyumwb boolayil hoo Samariyag bopam tulu hoola Pobu Kvdwg nyook tuluho doomnam nyi tulungv pota xeqg yin.

¹¹(Soq si bulug pota jilwqnum pui potangv.) “Lvpw at Artaserses: Pobu Kvtin ho doonbo, noqg nyera tulungv salam jilwq gviyin. Hoo sija

¹²‍lvpw at no cengto, Juhudi nyiv hiyv noqg hoqgv ngulug dookub Jerusalemb haanbo tulungv bulv taleq banv hoo nyic-nyia bo bopam mam mvdarl mudu do. Bulv gurum tulungam la gwwlam tulungam mvnya svv-twqb modu duku.

¹³‍Sija hoq sam lvpw at no cengmto, ho soq bopam sam la hoqg gurum mam mvdarl mvnya baloqkam, bulv gvda nyooga jinam mam, gvdag nyicw-mwcwngam, twngk jinam mam, hoo xinam lvpw atam nyooga jicwngam jikram.

¹⁴‍Sija hoggab ngulv lvpw-hatwg al dvdwn hoo ngulv lvpw atam xima dvb mvm nwma, hoqgab ngulv lvpw atam soq pui sam bepa gvi yin,

¹⁵‍noqg abwg xeql apnam kitap tulu hoqgv meegaq meelin mvdwb. No kitap xeql apnam ho kaapa tayin hoo soq bopam si taleqbo bopam gob cengtayin, lvpw atam la hoqg gvdangam vs-axaq dvb mvdwn, hoo otuq hoqgv hoqham pvvb munyiubl doog lamanum. Hoqgab soq bopam si soq sib ocu-aiya tvl doodwn.

¹⁶‍Hoqgab ngulv lvpw atam bepa gvi yin soq bopam sam la gurum sam mvdarl mvnya kuba loqkam, ho Pobu Kvtin gvdangv noqgab dookram.”

¹⁷‍Lvpw atv kanaml birwqnum: “Gaml jinbo Rehum la xeqn bo Simsai hoo bulug ajin tulu hiyv Samariya hoola Pobu Kvtin gonho doonbo mwlwngam salam. Hoo sija

¹⁸‍nulug ngulam pui pota jilwqnam mam dardar jaqb ngoqg agaho poory paku.

¹⁹‍Hoo ngo gaml ak mvnum, hoo meegaq mvkanum, hoo hoqham meepa kunamv soq bopam si otuq jaq hoqgv lvpw atam ceeko dvb daqrab tvba, hoo taleq bob nyil vs-axaq gob nyit kuba.

²⁰‍Hoo Jerusalem so atorbo lvpw at ak doot ba, hiyv soq Pobu Kvtinwg gvda mwlw sam pvvb bwwl doognum, ho hiyam xikum-poqkumnum, nyicw-mwcwngam la gvda nyoogangam jil doonum.

²¹‍Hoqgab soq nyi tulu sam bon nyima bvk hvl pvvb loq ak mvto, hoo hwdlo ngo gaml jima deedib soq bopam sam mvdar maabv.

²²‍Hoo bvrwq sam dengkib koocum to hoo tojam maabv. Hoggab lvpw atam vs-axaq mvdy boam swwrab mvtayin?”

²³‍Ho hwdlo Lvpw at Artaserseswg pui potangam gaml jinbo Rehum la xeqn bo Simsai hoo bulug ajin tulug agaho poory reekin kalam, bulv nyebia jaqb Juhudi nyi tulug dookub Jerusalemb wnum hoo bely lala gaml ator jil bulam bon nyim kumanum.

²⁴‍Ho Jerusalemho Pwnbog nammam mvdar kunam bonam mutum kunum, hoo hoqhv Parsiya lvpw at Darius vnyw nywnyi go pvvb bwwl doog namgub doonum.