Read Nyishi IJRA 5 Bible Online

IJRA 5 - Nyishi bible

IJRA 5

¹Hoq moodho Iddog ko tuup nyiqry benbo Haggai la Jakariya Juda gvla Jerusalemb Juhudi nyi tulu gab, Israelwg Pwnbog eminb nyiqry benum.

²‍Ho Sealtielwg ko tuup Jerubbabel la Jojadak gv ko tuup Jesua lokta daqrab gvbnv hoo Jerusalem hoqg Pwnbog nammam mvdar dvb nyinam, hoo Pwnbog nyiqry benbo tulungv bulug lvgab doobanum hoo tor-daanum.

³‍Hoq mood akinho Pobu Kvd gvla Seta-bojenai gvda hoqg nyiit rad Tattenai la bulug ajin tulungv bulam haal agam benum, “Nulam soq nam sam mvm dvb la nvmpwb mvnya mvdwb hiyv gaml jinum?”

⁴‍Bulv sam kam toxnum: “Soq nam sam mudu bo nyi tulug eminv hoggv?”

⁵‍Hvbmabde bulug Pwnbog vnyiqkv Juhudi nyi axa tulug aoho doonum, hoo bulv Darius dook ho puiyam jic tvl hoo hoqgv birwqnam pui potangv hookur maady deedib bulam bonam nyidul doonum.

⁶‍Pobu Kvd gvla Setar-bojenaig gvdag nyiit rad Tettanai la mwwg ajin nyiit rad tulungv lvpw at Dariusnvn soq pui pota sam jilwqnum.

⁷‍Bulv pui ak mwam jilwqnum, hoq xeqnamv soq tulu si: “Lvpw at Dariusnvn, swrsongv dooba nvka.

⁸‍Lvpw atam ngulv cengm nwwdo, ngulv koibo Pwnbog nam dook Juda gvdab wnum. Hoq nammam wlw pwt-pwt lvgab nam mudu do, hoo svvda svvtaqkv yubia twqdwb daml ap paku. Nyisam hingky jaqb bulug alaqkv hengka-hengkal nyidul doodo.

⁹‍Ho ngulv nyi axa tulungam toxnum hoo soq sib agam goonum, ‘Nulam soq nam sam mvm dvb la nvmpwb mvnya mvdwb hiyv gaml jinum?’

¹⁰‍Ngulv bulug nyigbo tulug emin tulungam xiqtu dvb, nam pui betam dvb ngulv bulug emin tulungam kam toxnum.

¹¹‍Hoo soq si ngulam bulug birwqnamv: ‘Ngulv swcw-nyodog Pwnbog nyera tulungv, hoo Israelwg koibo lvpw at ak kol vnyw viyig otuqho nam mvl mvnya kunam sam ngulv nammam mvdar dvn.

¹²‍Hvbmabde ngulug ab tulungv ao lvpwg Pwnbon hang lengdwb nyigam gab, mwv bulam Kaldiya nyi Bebilonwg lvpw at Nabukadnejjarg alaqho jilwqnum, hoo mwv soq nam sam mviyaqnum hoo nyiilungam Bebilonwb bool wgnum.

¹³‍Hvbsujaqkam Bebilonwg lvpw at Sairaswg swwt swwl vnyw ho, soq Pwnbog nam sam mvdar mvdkub lvpw at Sairas pvvb mvl gaml ak jilinum.

¹⁴‍Hoo Pwnbog nam hoqgv hunam la rup pwcw tulungam Nebukadnejjar Jerusalem dvrwq namlo hoqgv Bebilonwb baqa kunam ham lvpw at Sairas Bebilonwg xumk nam hoqgv naalin kunum, hoo hoq tulu ham mwwg nyiit rad gob mvnum Sesbajjar eminam alaqho jilwq kunum;

¹⁵‍hoo mwv mwam benum, “Soq pwcw tulu sam naalayil hoo wn hoo hoq tulu ham Jerusalemwg dvrwq namlo ho apta, hoo Pwnbog nammam mvk kedho nammam mvdar ta.”

¹⁶‍Ho soq Sesbajjar si haanum hoo Pwnbog nam gwwlam Jerusalemho diirabnum, hoo hoq mood jaq hoqgv sija godab nammam mudu dvn, hoo ham sija godab muiyum mata.’

¹⁷‍Hoqgab, soq si lvpw atam al mwwpa dvloqkam, lvpw at Sairas Jerusalemho Pwnbog nammam mvdar mvdwb gaml jin mviya ma jimanam, ham xinam Bebilonwg kolwg gon xeqnam pvvkuml apko ho meeka mvto. Hoo lvpw atam mwwg mwwlwqkam soq pagoq gab pui jilwq mvto.”