Read Nyishi IJRA 6 Bible Online

IJRA 6 - Nyishi bible

IJRA 6

¹Ho lvpw at Darius pvvb ak mvnam, hoo kolwg gon xeqnam mam ap pvvkum ko nammwg Bebilon ho meegaq mvdwb mvnum.

²‍Hoo Mediya gvdag, rvviyw Ekbatana ho, xeqnam tiqbu ak kaapanum hoo hoqho xeqpnamv soq si doonum: “Xiqtunam ak.

³‍Lvpw at Sairaswg otuq vnyw ho, lvpw at Sairas pvvb ak jinum: Jerusalemho Pwnbog nam pagoqkam, pwr tulungam jik nyook ho, nammam mvdar mvto, hoo hoqg gwwl diipko ho gwwlam diirab mvto. Hoqg aongam camx kiubit go hoo hoqg taqtam cam camx kiubit go,

⁴‍hoqg lvgab cwqcam wlw pwtbo hoqgv tommum go paaca tvl hoo svvtaq piuto. Soq korsam lvpwg xinam uddum hoqgv ywqmto.

⁵‍Hoo Pwnbog nam hoqgv hun-rup pwcw tulungam Nebukadnejjar Jerusalem dvrwq namlo hoqgv Bebilonwb baqa kunam ham, Jerusalemwg dvrwq namlob boqkurl hoqg at-atwg dookho ap mvto. Nulv hoq tulu ham Pwnbog namho vlwql aptayin.

⁶“Sija hoqgab, pobu kvd gvla Setar-bojenai gvda hoqg nyiit rad Tattenai, hoo Pobu Kvd gvdag noqg nyiit rad ajin tulu hoqgv aado to.

⁷‍Pwnbog nam mvnam rooxongam nyimto. Juhudi nyiit radam la Juhudi nyi axa tulungam Pwnbog nammam kolwg mvk akin ho mvdar mvto.

⁸‍Hoq aoho, Pwnbog nammam mvdar bo Juhudi nyi axa tulungam nulug nyis loq ak ngo pvvb mvtayin. Hoq nyi tulug koram jot dvb jito hoo lvpw xinam nyooga jikumnam hoqgv ham nyebia jaqb jito, Pobu Kvd gvdaho doonbo mwlwngv aky jikum to.

⁹‍Hoo Jerusalem hoqg nyub tulungv aal looxiam hoggv xeq nyin wn sanamv doodwn hoq tulu ham kvxaqmab jito—ao lvpwg Pwnboam boyuqnam aky jin mvdwb svv hvvbam, yaap tvmwram, ho sviyangam, dvsam, alam, roo alangam, ho kutiam,

¹⁰‍ho bulv ao lvpw Pwnboam xumt dvb pwr jitayin hoo lvpw atgab la mwwg ko tuup tulu gab swgw mvdwb jito.

¹¹‍Ngo soq pvvb sam rub mvg yin, hiyv ak gon soq pvvb sam tama baloqkam, mwwg nam hoqgv xaapongam seqlin tayin, hoo mwam hoq hoqgv nwqx tayin, hoo mwwg nammam kac-kanyiaq yoqkum koob mvtayin.

¹²‍Lvpw atv jaqkam ho nyiilu ngvjaqkam soqg pvvb sam mvdarl muk-mviya boam Jerusalem nyookam mwwg eminam doom dvb xuqn bo Pwnbov hoq tulu ham twrtayin. Darius, ngo soq pvvb ak sam mvgyin; Dvrwq namlongam dengky jaqb hog mwlwngam mvm to.”

¹³‍Ho lvpw at Dariuswg gomcwr bilwq kojaqb Pobu Kvd gvdag, Setar-bojenaig nyiit rad Tattenai, la bulug ajin tulungv lvpw at Dariuswg gaml jinam mam hingky jaqb hog mwlwngam nyiknum.

¹⁴‍Hoo nyiqry benbo Haggai la Iddog ko tuup Jakariyag nyiqry benam hvbjaq Juhudi nyi axa tulungv nammam mvknum hoo swwk-geeknum. Bulv nammam Israelwg Pwnbo la Parsiyag lvpw at Sairaswg hoo Darius hoo Artaserses pvvb gaml jik jaqb mvnya kunum;

¹⁵‍hoo lvpw at Darius vnyw nywx go swwl doodwk Adar poolwg aal loumho soq nam sam mvnya kunum.

¹⁶‍Hoo Israel nyiilungv, nyub tulungv hoo Lebi nyi tulungv, hoo nyuum hoqgv wkur kunbo nyi mwlwngv Pwnbog nammam hemp lvgab darxaq kunv soomin nyirminum.

¹⁷‍Bulv Pwnbog nammam darxaq dvk moodho svv hvvbv 100 go, yaap tvmwr 200 go, sviyangam 400 go aky jinum, hoo Israel nyob camleq vnyig nyic gab bulv sibin bimp camleq dornyi go aky jinum, Israelwg nyob vxiam dorg-dorgwb jinum.

¹⁸‍Hoo Mojesg Kitap ho xeqp kunam hvb bulv nyub tulungam la Lebi nyi tulungam Jerusalemb Pwnbog namho bon nyim dvb mvpin-mvral mwbwq kunum.

¹⁹‍Otuq poolwg aal camleq loopy ho nyumwb boonam hoqgv wkur kunbo tulungv Dvtv Durum dvnam ham nyiknum.

²⁰‍Hoggab nyub tulungv la Lebi nyi tulungv bulv lvkin gob at-atv paxy xeexaq sunum; bul mwlwngv dvrwq kunum. Ho bulv Dvtv Durum dvdy sanam sviyangam nyumwb boonam hoqgv wkur bo nyi mwlw gab la bulug nyub ajin tulu gab, hoo bulug at-atgab patab kunum.

²¹‍Nyumwb boonam hoqgv wkur kunbo Israel nyiilungv ham dvknum, hoo nyiicwr-cwrxiv bulug lvgab nyiba bo tulungv mwv at-atam gvdag hoqg dvrwq maanbo nyiilu hoqgv mwbwq layil Israelwg Pwnbo At Swn xumknum.

²²‍Hoo bulv Opap kiilwq maanam Durum dvnam ham aal kvn gob hwnyir-hvmarl sool doonum, hoggab At Sw bulam hwnyir-hvmar dvb mvknum hoo Israelwg Pwnbov, Pwnbog nammam mvdar yukho bulam svkal bonam nyim dvb, Assiriyag lvpw atwg hangam bulug daiyab mwwxam dvb mvnum.