Read Nyishi IJRA 7 Bible Online

IJRA 7 - Nyishi bible

IJRA 7

¹Sija soq kokw so, Parsiyag lvpw at Artaserses pvvb bwwl doognum, Seraiyag ko tuup Ijra, Ajariyag ko tuup, Hilkiyag ko tuup,

²‍Sallumwg ko tuup, Jadokg ko tuup, Ahitubwg ko tuup,

³‍Amariyag ko tuup, Ajariyag ko tuup, Meraiyotwg ko tuup,

⁴‍Jerahiya gv ko tuup, Ujji gv ko tuup, Bukki gv ko tuup,

⁵‍Abisua gv ko tuup, Pinehas gv ko tuup, Eleajar gv ko tuup, Aaron gv ko tuup hoqgv mwlwngam nyub but yaanbo—

⁶‍soq Ijra si Bebilon hoqgv caanum. Israelwg Pwnbo At Sw Mojesnvn pvvb jinam ham, mwv cingx bob nyinum, hoo lvpw atv mwwg hog mwlw konam mam jinum, hoggab mwwg Pwnbo At Swg alaqkv mwwg aoho doonum.

⁷‍Hoo lvpw at Artaserses vnyw kvn deen ho pvvb bwwl doog dvk moodho Israelwg nyiilu tuugin, la nyubv la Lebi nyi tuugin, ho bemin benbo tulu ngvla toggoqkam rvky bo tulungv, hoo dvrwq namlog nyera tulungv Jerusalemb caanum.

⁸‍Hoo lvpw atwg vnyw kvn dvb swwdu gviyikho mwv pool barg deen ho Jerusalem haanum.

⁹‍Hoggab otuq poolwg otuq aalho mwv Bebilon hoqgv wrab kunum, hoo pool barng otuq aalho mwv Jerusalemho hvvc kunum, hoggab mwwg Pwnbog albo alaqkv mwwg aoho doobanum.

¹⁰‍Hoggab Ijra mwwg hangam At Swg Pvvbam hingkib poory dvb, hoo ham nyil wdwb hoo mwwg gamlam la pvvb tulungam Israelam tomswr dvb mwwbwq kunum.

¹¹‍Lvpw at Artaserses, cingx bo nyub Ijra, hiyv nyi akv At Swg gaml pagoqkam hoo mwwg pvvbam cingxwq boam soq pui pota sam xeql jinum:

¹²“Artaserses, lvpw at mwlwg lvpw atv, ho ao lvpwg Pwnbog Pvvbam cingx bo nyub Ijranvn swrsongv dooba nvka. Hoo sija

¹³‍ngo pvvb ak mvg yin Israel nyiilungv ho bulug nyub tulungv ho Lebi nyi tulungv ngoqg lvpw-haty soqgv Jerusalemb mwwbwql wnw bov noqg lvgab wla tayin.

¹⁴‍Hoggab lvpw atv la mwwg tomswr-hony bo kvnnam kanam gvi yin Juda ngamla Jerusalem mam noqg alaqho bwwnam Pwnbog Pvvb hvbjaq hingkib pooiyeql kaaka ta,

¹⁵‍hoo Jerusalemho doonbo Israelwg Pwnbo gab lvpw atv la mwwg tomswr-hony bo tulungv at mwwlwqb aky jinam rupam la hunam kam bvqj ta,

¹⁶‍Bebilonwg gvda mwlwho rupam la hunam jikumnam mam no kaapa tayin, hoo nyiilu ngvla nyub tulug mwwlwqb aky jinam mam, Jerusalemho bulug Pwnbo nam gab dingrnam akiam kaapa tayin.

¹⁷‍Soq twngk lvgab no hingky jaqb svv hvvb tulungam yaap tvmwr tulungam, hoo sviya tulungam, hoq lvgab dvs aky tulungam hoo twws aky tulungam rvlayil, hoo hoq tulu ham no Jerusalemho doonbo noqg Pwnbog nam yugw ho aky jito.

¹⁸‍Nulug Pwnbog mwwlwqb no la noqg vbw-bor tulungv soq rup la hun lvgab hoggv al yindwn ham nyin to.

¹⁹‍Noqg Pwnbog namho bon nyin wn mvdwb nam pwcw-uddu jiknam tulu ham, no Jerusalemwg Pwnbog agaho gvqlwq jitayin.

²⁰‍Hoo noqg Pwnbog nammam mvn dvb hog vs-axaq baloqkam, ho nam lvpw atwg gumn uddum hoqgv ywqn mvdwb jitayin.

²¹“Hoo ngo, lvpw at Artaserses pvvb mvg yin Pobu Kvd gvdag lvpw atwg gumn uddum hoqg ywqn mvdwb jila ka: Hoggv xeq ao lvpw Pwnbog Pvvbam cingx bo nyub Ijra nul galoqkv kotayin, ham hingky jaqb hog mwlwngam nyim dvb jila ka,

²²‍rupv 100 telent namgub, wtw am mam 100 kor go, roo alangam 100 bat go, kutiv 100 bat go, hoo hwdgo hvl xiqbwq maadwb alam jinum.

²³‍Hog xeq ao lvpwg Pwnboam nyin-wn tadwn, ham bumpwb jot kvl dvb ao lvpwg Pwnbog namho nyin-wn mvto, hvb nyima baloqkam mwwg hang lingtwrnamv lvpw atam la mwwg ko tuup tulug aoho haata yi.

²⁴‍Ngulv sam kam nulam pui bepa gvi yin nyub tulungam, Lebi nyi tulungam, bemin benbo nyi tulungam, viyapho rvky bo nyi tulungam, dvrwq namlog nyera tulungam, ho soq Pwnbog nam soqg asaq nyera tulungam akiam, la gvda nyoogangam komabv.

²⁵“Hoo Ijra, no, noqg Pwnbog pumb rwnam hoqgv nyiilu mwlwngam nyig boam hoo nyegam tulungam, ho hiyv Pobu Kvd gvdangam nyegam gob kaal doog yindwn, ho noqg Pwnbog pvvb tulungam cengdwn ham xuqbwq lengto. Hoo hiyv ham cengma dvn, no ham tomswr tayin.

²⁶‍Hiyv lajaqkam noqg Pwnbog pvvbam hoo lvpw atwg pvvbam tama tayin, hoq tulu ham pw-hwwgab jinjinl hwwg dvl sid bvjaqkam, ho nyumwb boom dvb jaqkam, ho mwwg gumn-ranam naareq dvb jaqkam ho pvtwq uraho doom dvb jaqkam mwam mvtayin.”

²⁷‍Ngulug ab tulug Pwnbo At Sw xinam jaqkv, hiyv soq pagoq tulu sam lvpw atwg hang uraho jilwqnum, ho Jerusalem doonbo At Swg nammam kangam dvb guj mvnum,

²⁸‍hoo hiyv mwwg tumanam abiam lvpw at gvla mwwg tomswr-hony bo tulu gvla lvpw atwg saab koibo agaho anya kaapa dvb mvnum. Ngo haaknum hoggab ngoqg Pwnbo At Swg alaqkv ngoqg aoso doonum, hoo ngo Israel hoqgv peelo bo nyi tulungam lvkin gob ngoqg lvgab caaba mvdwb goqkumnum.