Read Nyishi IJRA 8 Bible Online

IJRA 8 - Nyishi bible

IJRA 8

¹Lvpw at Artaserses pvvb bwwl doog yuk moodho, soq tulu si hiyv ngoqg lvgab Bebilon hoqgv wmin gvkbo bulug ab dvpar imiq hoqg peelo bo nwdv:

²‍Pinehaswg ko tuup tulu gv Gersom. Itamarwg ko tuup tulu gv Daniyel. Debidg ko tuup tulu gv Hattus.

³‍Sekaniyag ko tuup tulu gv, hv Paroswg ko tuup tulu gv Jakariya, bulug lvgab nyiingv 150 go emin xiqlwq kunum.

⁴‍Pahat-moabg ko tuup tulu gv, Jerahiya gv ko tuupv Eliehoenai, mwwg lvgab nyiingv 200 go.

⁵‍Jattu gv ko tuup tulu gv, Jahajiyel gv ko tuupv Sekaniya, mwwg lvgab nyiingv 300 go.

⁶‍Adin gv ko tuup tulu gv, Jonatanwg ko tuupv Ebed, hoo mwwg lvgab nyiingv 50 go.

⁷‍Elam gv ko tuup tulu gv, Ataliya gv ko tuupv Jesaiya, hoo mwwg lvgab nyiingv 70 go.

⁸‍Sepatiya gv ko tuup tulu gv, Mikel gv ko tuupv Jebadiya, hoo mwwg lvgab nyiingv 80 go.

⁹‍Joab gv ko tuup tulu gv, Jehiel gv ko tuupv Obadiya, hoo mwwg lvgab nyiingv 218 go.

¹⁰‍Bani gv ko tuup tulu gv, Jospiya gv ko tuupv Selomit, hoo mwwg lvgab nyiingv 160 go.

¹¹‍Bebai gv ko tuup tulungv, Jakariya, Bebai gv ko tuupv, hoo mwwg lvgab nyiingv 28 go.

¹²‍Ajgadwg ko tuup tulu gv, Hakkatanwg ko tuupv Johanan, hoo mwwg lvgab nyiingv 110 go.

¹³‍Adonikam gv ko tuup tulu gv, hiyv kokw so haanum, bulug eminv Elipelet, Jeuyel, hoo Semaiya, hoo bulug lvgab nyiingv 60 go.

¹⁴‍Bigbai gv ko tuup tulu gv, Utai la Jakkur, hoo bulug lvgab nyiingv 70 go.

¹⁵‍Ahaba gvdab pobu tol wk ho ngo bulam goqkumnum, hoo hoqho aal loum go svmcw mvl doonum. Hwdlo ngo nyiilungam la nyub tulungam hoqho kaaka yikho, ngo Lebi ko tuup akkam kaapa maanum.

¹⁶‍Ho ngo Eliejer, Ariel, Semaiya, Elnatan, Jarib, Elnatan, Natan, Jakariya, hoo Mesul-lam nyigbo nyiilungam, hoo Joiarib la Elnatan bunyiv tomswr bob nyinbo tulungam kanamnum,

¹⁷‍hoo Kasipiya gvdag peelo bo nyi dookub, bulam Iddob kanamnum, ho bulam Iddo la mwwg vbw-bor tulungam hoo Kasipiya gvdag xumk nam hoqg nyera tulungam, hoqg nyimin tulu ham, ngulug Pwnbog namlo ho bon nyim dvb ngulam kanam tvb.

¹⁸‍Hoo ngulug Pwnbog alaqkv ngulug aoso doogam gab, bulv ngul gab nyi mwwlaqbo nyi tulungam boa jinum, Lebig ko tuup tulu gv Mahli, Israelwg ko tuupv, nyiminv, Serebiya la mwwg ko tuup tulu ngvla imiq lwrw nyiingv 18 go;

¹⁹‍Hasabiya kam, hoo mwwg lvgab Merarig ko tuup tulu gv Jesaiya, hoo mwwg imiq lwrw nyi tulungv hoo bulug ko tuup tulungv 20 go;

²⁰‍hoq lvvgho 220 go dvrwq namlog nyera tulungam, hiyam Debid la mwwg saab tulungv Lebi nyi tulungam svka mvdwb xuqbwq kunam mam boanum. Soq tulu eminam bepal ap pakun.

²¹‍Ho ngo Ahaba gvdab pobu tol wk ho dery reel xumdwb bibwqnum, ho ngulv ngulug Pwnbog agaho ngulv atv yan dvb, ho ngulug nyiody book lo ngulug ko tulungam, hoo ngulug hog mwlwngam alwb hoocum yaat bvk hvl ator kol swgwnum.

²²‍Hoggab ngo lvpw at hoqgv sipaiyam la svpur xarn bo nyi tulungam ngulug ceebio tulu hoqgv ngulug lamta ho ceetor mvdwb kosam hvnywnum, hoggab ngulv lvpw atam betamnum, “Ngulug Pwnbog alaqkv mwam meegaqbo mwlwg aoho algab doodwn, hoo mwwg hang lingtwrnam huqlwngv hiyv mwam ludum aoho haadwn.”

²³‍Hoqgab ngulv dery reel ngulug Pwnboam ngulam ywwt-goor ywwk dvb swgwl ator kotuj, hoo mwv ngulug swgwnam mam tatayin.

²⁴‍Ho ngo nyub but camleq vnyi go xuqbwq lengnum: Serebiya, Hasabiya, hoo bulug imiq lwrw nyi camg bulug lvgab xuqlinum.

²⁵‍Hoo bul gab ngo rupam la hunam hoo pwcw-uddu tulungam xilin jinum, ngulug Pwnbog namho aky jin mvdwb lvpw atv la mwwg tomswr-hony bo tulungv hoo bir at tulungv hoo Israel mwlwngv hoqho doonamv aky jiknum.

²⁶‍Ngo bulug alaqho rupam 650 telent go, hoo rup pwcw-uddungv 200 telent kor go, hunv 100 telent go xilin jinum,

²⁷‍hun pwcw tulungv 1,000 darik kor go, hoo hun hvbjaq xinam go hornbo tama pwcw-uddu cwwnyi go xilin jinum.

²⁸‍Hoo ngo bulam benum, “At Sw gab nulv dvrwqbov, hoo pwcw-uddu tulu si dvrwqbov, hoo rup si la hun si nulug ab tulug Pwnbo At Swn mwwbwql aky jinamv.

²⁹‍Soq tulu sam hingky jaqb koocum gvdwl hoo bulam pvvg dvl nulv nyub but gvla Lebi nyi tulug hoo Israelwg ab tulug imiq dvparam nyigbo agaho Jerusalemwg At Swg nam pwqlw tulu diigarho joopta.”

³⁰‍Hoqgab nyub tulu ngvla Lebi nyi tulungv xilin kunam rupam la hunam hoo pwcw-uddu tulungam, hoq tulu ham Jerusalemb ngulug Pwnbog namho bvqlwq dvb naaknum.

³¹‍Ho bulv pool bvryw leq bvrnyig otuq aalho Ahaba pobu hoqgv Jerusalemb wknum. Pwnbog alaqkv bulug aoho doonum, hoo mwv ngulam ceebio alaq hoqgv hoo ngulam lamta ho tooiya bo nyi tulu hoqgv ywwlinum.

³²‍Ngulv Jerusalemho haaknum hoo ngulv aal loum go doonum.

³³‍Loopy deen aalho ngulug Pwnbog nam diigarho, Uriyag ko tuup nyub Meremot alaqho rupam la hunam hoo pwcw-uddu tulungam gvqlwq kunum, hoo mwwg lvgab Pinehaswg ko tuup Eleajar doonum, hoo bulug lvgab Lebi nyi tulu hoqgv Jesuag ko tuup Jojabad hoo Binnui gv ko tuup Noadiya doonum.

³⁴‍Hog mwlwngam xikanum hoo jaakanum, hoo hog mwlw jaaka kunam mam xiqtul apnum.

³⁵‍Hoq moodho hiyv nyumwb boonam hoqgv wkur kunbov, Israelwg Pwnbon, svv hvvb camleq dornyi go Israel nyob mwlw gab, yaap tvmdwr camkiya leq dorx go, sviya camkvn leq kvn go boyuqnam akib jinum, hoo nyic aky gab sibin bimp camleq dornyi go aky jinum. Soq mwlw sam At Swn boyuqnam akib jinum.

³⁶‍Bulv lvpw atwg gaml jilwqnam mam la lvpw atwg pui potangam Pobu Kvd gvdag nyiit radam jiknum, hoo nyiilu ngamla Pwnbog nammam bulv svkanum.