Read Nyishi IJRA 9 Bible Online

IJRA 9 - Nyishi bible

IJRA 9

¹Soq tulu si nyixo kokw so, saab tulungv ngoqg dookub haal hoo benum, “Israel nyiilu ngvla nyub tulungv hoo Lebi nyi tulungv bulv atv-atam gvda soq doonbo nyiilug bulum-kac dvb nyinam lvgab Kanaan nyi tulu, Hittait nyi tulu, Perijj nyi tulu, Jebus nyi tulu, Ammon nyi tulu, Moab nyi tulu, Ijipt nyi tulu, hoo Amor nyi tulu hoqgv muxub mins ma.

²‍Hoggab bulug ko nyem tuugin bul gab la bulug ko tuup nywxwb bulv naapa ku, hoqgab nyiidar bo nyob hoolungv gvda soq doonbo nyiilug lvgab mviyo-mvco paku. Hoo soq sib mwwjw maadwb nyinam sam saab tulu ngvla nyi peelo bo tulungv mwlwngam nyibin yaapa ku.”

³‍Ngo soq sam tapa twqda kalam, ngoqg vjam la kamtam ngo puc sunum hoo ngoqg dum mam la nvm mam ngo pulin sunum hoo mooma-sasal tvl mwwdwql doonum.

⁴‍Ho Israelwg Pwnbog agam mam bosnum, hoggab nyumwb boonam hoqgv wkur kunbov mwwjw kumab nyiknum, hwdlo ngo ariyumg pwr jid namgub mooma-sasal tvl mwwdwql dooikam, nyiingv ngam hookuml hwwiyumnum.

⁵‍Hoo ariyumg pwr jid moodho ngoqg dery reenam hoqgv ngoqg puceqnam vjam la kamtam kootwl ngo gorab kunum, hoo ngo lwbw kumbw tvl hoo ngoqg alaqkam ngoqg Pwnbo At Swn yamga tvl xuml,

⁶‍begamv: “Ngoqg Pwnboa, ngoqg nyuqmv nam nywrabl kaadwb ngo hvnyw moolw har-moosa kunum, ngoqg Pwnboam ngulug nyixiaqnamv ngulug dumpongam ao sviya ku, hoo ngulug nyimurnamv doa aongam cvvc paku.

⁷‍Ngulug ab tulu aal jaq hoqgv soolo godab ngulv naleqgo nyimur nyipa ku. Hoo ngulug nyimur ko-gab ngulug lvpw at tulungam, la ngulug nyub tulungam gvdag lvpw at tulug alaqho jilwq paku, lyoqr orioq niqtuqb wwm paku, nyumwb boopa ku, hog mwlwngam hubyiql naareq paku, hoo soolo soq sib ngulam vc loodab hvnyw dvb mvpa ku.

⁸‍Hvbmabde anyo mood go ngulug Pwnbo At Sw mwwsw paku, ngulam boum mvdwb jipa hoo mwwg dvrwqbo nyook uraho ngulam doogw mvdwb jipa, ho ngulug Pwnbov ngulug vnyiqkam huto mvi nvpv hoo ngulam raasur-nvsurb swwnam hoqgv anyo go nitib swwdar mvpa ku.

⁹‍Hoggab ngulv raasur-nvsurv. Hvbsujaqkam ngulug Pwnbov ngulam nyera-paqn swwdu ko ho ludum ma, hvbmabde ngulam mwwg tumab abynam mam Parsiya lvpw at tulug agaho kaakin paku, ho ngulug Pwnbog nammam mvdar mvdwb, hoqg yaqpia-yaqya tvl doon boam mvdar mvdwb, hoo ngulam Juda hoola Jerusalemho ceetor mvdwb ngulam tolin paku.

¹⁰“Hoo sija, ngulug Pwnboa, hoggv ngulv soq kokwb beta yukun? Hoggab ngulv noqg gaml tulungam ludum paku,

¹¹‍hogloq ham noqg nyera nyiqry benbo tulungam gaml jil begamv, ‘Noqg hogloq gvda ho haal, hoqham otu gob naata gvdwn gvda hv kacbo nyiilug kacdvb mvnam gvdangv, bulug bulum-kac dvb bon nyinam lvgab kacv gvda cuukiq gon hoqgv cuukiq gon namgub bwrtvl doodo.

¹²‍Hoqgab nulug ko nyem mam bulug ko tuupam jimabv, ho bulug ko nyem mam nulug ko tuup gab naamabv, hoo nywywngam bulug swrsongam la swwnam-geenam mam meemabv, ho nulv ator tayin hoo gvdag albo dvsam kaapa tayin hoo ham nulug ko tulungam nwrba gob otu jisiq tayin.’

¹³‍Hoo betwr-wtwr tvl ngulug almab la koi jaqb ngulug nyixiaq ko-gab hoqg mwlwhv, ngulug ao lo haapa ku, hoo no sam kaato, ngulug Pwnbo, ngulug nyixiaq kunam hoqgv ngulam anyo yaag laqm-baqnam paku hoo ngulam soq sib boumnam akwb jipa ku,

¹⁴‍ngulv lokta noqg gaml tulu sam mvpia tai kun yv hoo bulum-kac dvb bon nyinbo nyiilug lvgab guuc nyem naak bvi yv? No ngulam twryum maady deedib noqg haaxaqkv ngulug lvgab xaqram yv, ho akkam boumnam dookram, ho akkam keleqbo dookram yv?

¹⁵‍Israelwg Pwnbo At Swa, no jvqtw dvn, hoggab soolo soq sib ngulv boumnam akwb nyil keleq paku. Kaato, ngulug nyimur ko-gab ngulv noqg agaho daqdwn, hoggab soq pagoq gab hiyv jijaqkam noqg agaho daqnyi ram.”