Read Nyishi NEXEMIYA 1 Bible Online

NEXEMIYA 1 - Nyishi bible

NEXEMIYA 1

¹Hakaliya gv ko tuup Nexemiyag gomcwrv. Vnyw camnyig Kislebwg pool ho ngo Susa rvviyw ho doonum,

²‍ho Juda hoqgv ngoqg vbw-bor Hanani la asaq nyi ata go mwwg lvgab haanum. Hoo ngo bulam nyumwb booknam hoqgv Jerusalemb wkur kunbo Juhudi nyi tulug pagoq gab toxnum.

³‍Hoo bulv ngam betamnum, “Gvda hoqg boumnam tulungv vc loodab vs-axaql hoo hvnywl doode. Jerusalemwg bvliv yaqpia paku, hoo hoqg toggoq tulungam wm tolwq guiyum mvpa ku.”

⁴‍Ham ngo tapa twqda kalam ngo doal vc jaqb xabnum hoo aal vigo nyix-riil doonum, hoo ngo ao lvpwg Pwnbog agaho dery reel swgwl doonum.

⁵‍Hoo ngo benum, “Ao lvpwg Pwnbo At Swa, hiyv swrdorxeqb koibo Pwnbov pvvb birnam mam pvvdwn hoo mwam aby boam mwv tumab aby dvn hoo mwwg gaml tulungam pvvn bov,

⁶‍noqg nyurungam ruucw kwrgab yaatbv hoo noqg vnyiqkv nyiqbio yaatbv, noqg nyera akwg aal-aiyib Israelwg nyiilu gab noqg agaho swgwnam sam. Ngo beporl xaqlin dvn ngulv, Israelwg nyiilungv nam ceekol nyic nyipa ku. Ngo la ngoqg abwg nombungv nyic nyipa ku.

⁷‍Ngulv vc loodab nam ceekol nyiwq-nyitol nyiknum hoo noqg nyera Mojesnvn noqg gaml jinum gamlam, nyicw-mwcwngam, hoo pvvb tulungam tagab kumanum.

⁸‍Noqg nyera Mojesnvn gaml jiknam gomcwr ham mwwpa to, begamv, ‘Nulv dengky mabaloqkam, ngo nulam nyiilug pengko ho cwrsaq-twqb mvtayin,

⁹‍hvbmabde nulv ngoqg dookub hookur kuba lo hoo ngoqg gamlam tal ham nyiba loqkam, nulv doa nvg ywwtwrho doos jaqkam, ngo hoq hoqgv nulam ngoqg daalin ko nyook ho bookum tayin, hoo ngoqg eminam hoqho doom dvb mvtayin.’

¹⁰‍Bulv noqg nyera tulungv hoo noqg nyiilungv, hiyam noqg koibo huqlw hoqgv la noqg atorbo alaq hoqgv pvlyw pakun.

¹¹‍At Swa, noqg nyera akwg swgwnam sam, hoo noqg nyera akwg noqg eminam bosil swgwnam sam, noqg nyurungv ruucw kwrgab yaatbv, hoo noqg nyerangam soolo niqtuq lengm dvb jitbv, hoo soq nyiig vnyiq kaaga so mwam aya mwwpa dvb kaapa mvtbv.” Sija ngo lvpw atwg twwsam bwa jiya bov.