Read Nyishi NEXEMIYA 11 Bible Online

NEXEMIYA 11 - Nyishi bible

NEXEMIYA 11

¹Jerusalem ho nyigbo nyiilungv doonum. Hoo nyiilug imiq dvpar hoqgv dvrwqbo Jerusalem bopam ho ak akwb doom dvb tak cingkanum, wyw hoqgv kiya gon asaq pamda ho doodub nyinum.

²‍Hoo Jerusalemho atv mwwsul doodwb mwwnbo nyiilungam lvqc cil paqnum.

³‍Soq peelo bo tulu si Jerusalemho gvdaho doonum; hvbmabde Israelv, nyub tulungv, Lebi tulungv, dvrwq namlog nyera tulungv, hoo Solomonwg nyera tulug hosiqkv: bulug pamdag Juda gvdaho nyiicwr-cwrxiv mwwg gumnam doonum.

⁴‍Hoo Jerusalemho Judag gvla Benjamin gv ko tuup tulu gon doonum. Juda gv ko tuupv: Ujjiya gv ko tuup Ataiya, Jakariya gv ko tuupv, Amariya gv ko tuupv, Sepatiya gv ko tuupv Mahalalel gv ko tuupv Perej gv ko tuup tulungv;

⁵‍hoo Baruki gv ko tuup Maaseiya, Kol-hoje gv ko tuupv, Hajaia ko tuupv Adaiya gv ko tuupv Joiarib gv ko tuupv, Jakariya gv ko tuupv Silon nyi gv ko tuupv doonum.

⁶‍Vc jaqb nyob palaqbo Perej gv ko tuupv 468 go Jerusalemho doonum.

⁷‍Hoo soq tulu si Benjamin gv ko tuupv: Mesullam gv ko tuup Sallu, Joyed gv ko tuupv, Pedaia gv ko tuupv, Kolaiya gv ko tuupv, Maaseiya gv ko tuupv, Itiyel gv ko tuupv, Jesaiya gv ko tuupv,

⁸‍hoo mwwg haakam bo vbw-borv 928.1 go doonum

⁹‍Jikri gv ko tuup Joyel bulug nyiilo gob nyinum; hoo Has-senuag ko tuup Juda pamdag dvqsin gob nyinum.

¹⁰‍Nyub tulu hoqgv: Joiarib gvla Jakinwg ko tuupv Jedaiya,

¹¹‍Hilkiyag ko tuup Seraiya, Mesullamwg ko tuupv, Jadokg ko tuupv, Meraiyotwg ko tuupv, Ahitubwg ko tuupv, Pwnbog namlongam pvvb mvvl doognum,

¹²‍hoo bulug vbw-borv namlo ho bon nyinbov 822 go doonum; hoo Jerohamwg ko tuup Adaiya, Pelaliyag ko tuupv, Amjig ko tuupv, Jakariyag ko tuupv, Pashur gv ko tuupv, Malkija gv ko tuupv,

¹³‍hoo mwwg vbw-bor abwg imiq dvpar hoqgv 242 go doonum; hoo Amassai, Ajarelwg ko tuupv, Ajaiyag ko tuupv, Mesillemotwg ko tuupv, Immerg ko tuupv,

¹⁴‍hoo bulug haakam bo vbw-borv 128 go doonum; Haggedolim gv ko tuup Jabdiel bulug nyiilo gob nyinum.

¹⁵‍Hoo Lebi nyi tulu hoqgv: Hassubwg ko tuup Semaiya, Ajrikamwg ko tuupv, Hasabiyag ko tuupv, Bunnig ko tuupv;

¹⁶‍hoo Sabbetai la Jojabad Lebi nyi tulug pengko ho peelo gob nyinum, bulv Pwnbog dvrwq namlog lvvg hoqg bonam kvvyw-tadanum;

¹⁷‍hoo Mikag ko tuup Mattaniya, Jabdig ko tuupv, Asapwg ko tuupv, paqyalinco paqnam mam la xumnam mam nyigbo nyiilo gob nyinum, hoo Bakbukiya mwwg vbw-bor pengko hoqgv dvqsin gob nyinum; hoo Sammuag ko tuup Abda, Galalwg ko tuupv, Jedutun gv ko tuupv nyibanum.

¹⁸‍Dvrwqbo bopam ho Lebi nyi doon bo mwlwngv 284 go doonum.

¹⁹‍Toggoq rvkybo tulungv, Akkub, Talmon hoo bulug vbw-borv, hiyv toggoq tulungam rvky yaan bov 172 go doonum.

²⁰‍Hoo Israel lvla nyub tulungv hoo Lebi tulungv Judag pamda mwlwho doonum, nyiicwr-cwrxiv mwwg gumn nvvsiq deenam mam naanum.

²¹‍Hvbmabde dvrwq namlog nyera tulungv Opel ho doonum; hoo Jiha la Gispa dvrwq namlog nyera tulungam kvvyw-tadal nyignum.

²²‍Jerusalemho Lebi nyiilungam nyigbo tulungv Banig ko tuup Ujji, Hasabiyag ko tuupv, Mattaniyag ko tuupv, Mikag ko tuupv, Asapwg ko tuup tulungv, bemin belaqbov, Pwnbog dvrwq namlo ho bon nyil doonum.

²³‍Hoggab lvpw at hoqgv bulug pagoq gab gaml jilinum, hoo bemin begbo tulu gab aal looxiam dvs-twwsam jim dvb birwl apnum.

²⁴‍Hoo Mesejabelwg ko tuup Petahiya, Judag nyob hoolug Jerag ko tuup tulungv nyiilug pagoq gab lvpw atwg bviywrho pagoq goqxy gab daqyanum.

²⁵‍Hoo nampamv bulug rongo lvgab doonum, Judag nyiilu tuuginv Kiriat-arba la hoqg nampam tuluho doonum, hoo Dibon la hoqg nampam tuluho doonum, hoo Jekabjeel la hoq nampam tuluho doonum,

²⁶‍hoo Jesua hoo Molada la Bet-pelet ho,

²⁷‍Hajar-sualho, ho Beerseba hoola hoqg nampam tuluho,

²⁸‍Jiklag ho, ho Mekona gvla hoqg nampam tuluho,

²⁹‍En-rimmon ho, ho Jora ho, ho Jarmut ho,

³⁰‍Janoa ho, Adullam ho, hoo bulug nampam tuluho, Lakis la hoqg rongo tuluho, hoo Ajeka la hoqg nampam tuluho doonum. Hoqgab bulv Beerseba hoqgv Hinnom lywpa nagub svmcw mvl doonum.

³¹‍Benjaminwg nyiilu ngvkam Geba hoqgv doorab layil Mikmas, Aija, Betel hoo hoqg nampam tuluho,

³²‍Anatot, Nob, Ananiya,

³³‍Hajor, Rama, Gittaim,

³⁴‍Hadid, Jeboim, Neballat,

³⁵‍Lod, hoo Ono lywpa hoqgv jem mvlaqbo nyi tulungv.

³⁶‍Hoo Juda hoqg Lebi nyiilu gon Benjamin ho doom dvb mvpin-mvranum.