Read Nyishi NEXEMIYA 12 Bible Online

NEXEMIYA 12 - Nyishi bible

NEXEMIYA 12

¹Soq nyub tulu si la Lebi nyi tulu si Sealtielwg ko tuup Jerubbabel, la Jesuag lvgab hookur kunbov: Seraiya, Jerimiya, Ijra,

²‍Amariya, Malluk, Hattus,

³‍Seka-nia, Rehum, Meremot,

⁴‍Iddo, Ginnetoi, Abija,

⁵‍Mijamin, Maadiya, Bilga,

⁶‍Semaiya, Joiarib, Jedaiya,

⁷‍Sallu, Amok, Hilkiya, Jedaiya. Soq tulu si nyub tulug pengko ho peelo gob nyil bulug vbw-bor Jesuag aalho doonum.

⁸‍Hoo Lebi nyi tulu hoqgv: Jesua, Binnui, Kadmiyel, Serebiya, Juda, hoo Mattaniya, mwwg vbw-bor tulu lvgab bemin bel paqyalinco paqgbo gob nyinum.

⁹‍Hoo Bakbukiya la Unni la bulug vbw-bor tulungv bon nyik ho bulug taqcgon ho daqnum.

¹⁰‍Hoo Jesua Joiakimwg abv, Joiakim Eliyasibwg abv, Eliyasib Joiadag abv,

¹¹‍Joiada Jonatanwg abv, hoo Jonatan Jaddua gv abv.

¹²‍Joiakimwg nyubwb swwd aalho soq tulu si ab tulug imiq dvpar hoqg peelob nyinum: Seraiya gv, Meraiya; Jerimiya gv, Hanania;

¹³‍Ejra gv, Mesullam; Amariya gv, Jehohanan;

¹⁴‍Malluki gv, Jonatan; Sebaniya gv, Josap;

¹⁵‍Harim gv, Adna; Meraiyot gv, Helkai;

¹⁶‍Iddo gv, Jakariya; Ginneton gv, Mesullam;

¹⁷‍Abija gv, Jikri; Miniamin gv, Moadiya gv, Piltai;

¹⁸‍Bilga gv, Sammua; Semaiya gv, Jehonatan;

¹⁹‍Joiarib gv, Mattenai; Jedaiya gv, Ujji;

²⁰‍Sallai gv, Kallai; Amok gv Eber;

²¹‍Hilkiya gv, Hasabiya; Jedaiya gv, Netanel.

²²‍Eliyasib gv, Joiada gv, Johanan gv, hoo Jaddua gv aalho Lebi nyi tulungam ab dvpar peelo boam xeqpnum; hoq lvga-lvgab soq nyub tulu samkam Parsiyag nyi Darius gv pvvb bwdho xeqpnum.

²³‍Lebig ko tuup tulug ab imiq dvparam xiqtw kwlwl xeqpnam mam Eliyasibwg ko tuup Johananwg aalho xeqnya kunum.

²⁴‍Hoo Lebi nyi tulug peelo bo tulungv: Hasabiya, Serebiya, hoo Kadmiyel gv ko tuup Jesua, hoo mwwg vbw-bor tulungv taqcgon ho daqtwl Pwnbog nyi Debidg gaml jinam hvb mood moodam paqyalinco paql hoo paqnam mam jinum.

²⁵‍Mattaniya, Bakbukiya, Obadiya, Mesullam, Talmon, hoo Akkub bulv toggoq rvky bob nyil noosug toggoqkam rvkil doognum.

²⁶‍Soq tulu si Jojadak gv ko tuupwg Jesuag ko tuup Joiakimwg aalho, la Nexemiya nyiit radwb hoo Ijra nyub bvla xeqn bob nyil dooiyik aalho nyinum.

²⁷‍Hoo Jerusalemwg gurum mam darxaq tadwg moodho Lebi nyi tulungam bulug dook nyook mwlw hoqgv meegaqnum, bulam Jerusalemho boa tvl darxaqnam mam hwnyir-pwnyirl, ho paqyalinco paql, hoq lvgab bemin bel, ludum pup tubl, rwwxw, hoo gungga mvl soomin gvm dvb hvl goqnum.

²⁸‍Hoo bemin benbog ko tuup tulungv Jerusalemwg diis-paap hoqgv la Netopat nyi tulug nampam tulu hoqgv lvkin gob hookumnum;

²⁹‍Bet-gilgal hoqgv kam hoo Geba la Ajmabet dwaq hoqgv kam haanum, hoggab bemin belaqbo tulungv bulug nampam mam Jerusalemwg bviywr-bvcarho nampam paal doonum.

³⁰‍Hoo Nyub tulu ngvla Lebi nyi tulungv atv atam xeexaq sunum, hoo bulv nyiilu ngamla toggoq tulu ngamla gurum mam xeexaqnum.

³¹‍Hoo ngo Judag nyigbo tulungam gurumg aoho bocanum hoo paqyalinco paqm dvb koijaqb bemin benbo dvpar vnyi go xuqnum. Dvpar akwn hv Ikum-peera Toggoq nyooko daiyag gurumb wnum.

³²‍Hoo bulug kokwb Hosaiya la Judag nyigbo papo gon wnum,

³³‍hoo Ajariya, Ijra, Mesullam,

³⁴‍Juda, Benjamin, Semaiya, hoo Jerimiya,

³⁵‍hoo nyub tuuginwg ko tuup tulungv tuuly miqyanum: Jonatanwg ko tuup Jakariya, Semaiyag ko tuupv, Mattaniyag ko tuupv, Mikaiya gv ko tuupv, Jakkur gv ko tuupv, Asap gv ko tuupv;

³⁶‍hoo mwwg lvqry-laqso tulungv: Semaiya, Ajarel, Milalai, Gilalai, Maai, Netanel, Juda, hoo Hanani Pwnbog nyi Debidg rwwxw-gungga lvgab wnum. Hoo xeqn bo Ijra bulug otuqb wconum.

³⁷‍Subuq buqlinko Toggoq hoqgv bulv Debidg bopam wnbo vbiab cao banv Debidg nammam ao yaanbo dou-cagag Iss Toggoqg gurum aob wnum.

³⁸‍Bemin benbo dvpar akwn hv paqyalinco paql nyoodum daiyab wnum, hoo ngo la nyiilu papo gon bulug lvgab gurum aob Wtw boonu ko Soja aog Gurum Taqt koob wnum,

³⁹‍hoo hoqgv Iprayim Toggoq aob, hoo Yesana Toggoq hoqgv, hoo Ngui Toggoq hoqgv hoo Hananelwg Sojab hoo Lwwg Sojab, Sviya Toggoqb wnum; hoo bulv Rvky ko Toggoqho haal doonunum.

⁴⁰‍Hoo bemin benbo dvpar vnyi vnyiv Pwnbog namlo ho paqyalinco paql doonum, hoo ngo la ngoqg lvgab saab papo gon haanum;

⁴¹‍hoo nyub tulu hoqgv Eliyakim, Maaseiya, Miniamin, Mikaiya, Elioenai, Jakariya, hoo Hanania tuuly lvgab haanum;

⁴²‍hoo Maaseiya, Semaiya, Eleajar, Ujji, Jehohanan, Malkija, Elam, hoo Ejer. Hoo Jejrahia bulug peelo gob nyitwl bemin belaqbo tulungam bemin begnum.

⁴³‍Hoo bulv hoq aalho koi jaqb pwr jil hwnyir-hvmarnum, hoggab Pwnbov bulam hwnyir-hvmar lvgab hwnyir-cojor dvb mvknum; nyem tulu ngvla ko hury tulu ngvkam hwnyir-hvmarnum. Hoo Jerusalem hoqg hwnyir-cojornam mam aado kiyo hoqgv tapanum.

⁴⁴‍Hoq aalho noosungam, otuqb lengco bo aaxy jikumnam mam, hoo jibwqnam mam nyub tulu gab la Lebi nyi tulu gab atwg pamdag rongo hoqgv Pvvb bek jaqb jidwb nyinam mam jinam mam kaaya mvdwb nyiingv xuqlinum, hoggab Judangv nyub tulu ngvla Lebi nyi tulug bon nyinam mam hwnyir-hvmarnum.

⁴⁵‍Hoo Debid gvla mwwg ko tuup Solomonwg gaml jinam hvb bulv bulug Pwnbog bonam la xeexaqnam mam bemin belaqbo tulu ngvla toggoq rvky bo tulug nyinam hvb nyinum.

⁴⁶‍Kolwg Debid gvla Asap mood hoqgv beminam bel nyig bov doonum, hoo hoqho Pwnboam paqnam gvla paqyalinco paqnam beminv benum.

⁴⁷‍Hoo Jerubbabel gvla Nexemiyag moodho Israel nyi mwlwngv aal looxiam bemin belaqbo tulu gabla toggoq rvkybo tulu gab dvs-twwsam jinum; hoo bulv Lebi tulu gab jibwqnam mam mwbwql ap jinum; hoo Lebi nyi tulungv Aaron gv ko tuup tulu gab mwbwql ap jinum.