Read Nyishi NEXEMIYA 13 Bible Online

NEXEMIYA 13 - Nyishi bible

NEXEMIYA 13

¹Hoq aalho nyiilungv tapa dvb Mojesg Kitap hoqgv poorynum. Hoo hoqho kaapa kunamv Ammon nyiv la Moab nyiingv Pwnbog dookumko ho haala maadwn hvl kaapanum,

²‍hoggab bulv Israelwg nyiilu gab dvsam la issam jimanum, hvbmabde Balaamnvn bulam ceekol beem dvb ree goqnum-hvbsujaqkam ngulug Pwnbov beenam mam lvqc gob ya mukubnum.

³‍Nyiilungv pvvbam tapa twqda kalam, bulv Israel hoqgv nyoodo nyi hosiqkam muxub kunum.

⁴‍Soq otuqb, nyub Eliyasibnvn ngulug Pwnbog namlog pwqlwngam kvvyw-tada mvdwb xuqlinum, hoo mwv Tobiyag lvqry-laqsob nyinum,

⁵‍Tobiya gab koibo pwqlw ak mwx-mvaq tvl otuqho hoqho bulv am akiam, sulum sungam bo akiam, pwcw-uppum tulungam, hoo jibwqnam ammam, roo alangam hoo kutiam Lebi tulu gab, bemin belaqbo tulu gab, hoo toggoq rvkybo tulu gab, hoo nyub tulu gab jikum mvdwb gaml jinum.

⁶‍Soq sib nyidul doonum, ngo Jerusalemho doomanum, hoggab vnyw cammum leq nywnyi gob Bebilonwg lvpw at Artaserses lvpw atwg swwiyik ho ngo lvpw at dookub wnum. Hoo meeg kokw so lvpw at galoqkv ngo wde nvk hvl ator konum,

⁷‍hoo Jerusalemb haanum, hoo ngo Eliyasib Tobiya gab Pwnbog namlo baagho mwwg gab pwqlw ak mvp jil almab nyiknam mam kaapanum.

⁸‍Hoo ngo vc loodab haaxaqnum, hoo ngo Tobiyag pwqlw hoqg dupum-dvrab mwlwngam lvvgwb hurlinum.

⁹‍Hoo ngo gaml jinum, hoo bulv pwqlw tulungam mvxaqnum, hoo ngo am aky la sulum mwwnam aky lvgab Pwnbog namlog pwcw-uddu mam boqkurl baqa kunum.

¹⁰‍Ngo hvbkam kaapa kunum Lebi tulungam jibwqnam mam jimanam mam, hoqgab bonam nyinbo Lebi tulu ngvla bemin belaqbo tulungv vx-cirv atwg rongob wleqnum.

¹¹‍Hoqgab ngo saab tulungam haqyaq minsnum hoo benum, “Hoggab Pwnbog namlongam haqpaq pakun?” Hoo ngo bulam bulug dook ho doom dvb bulam lvkin gob hookum mvknum.

¹²‍Hoo Judag nyi mwlwngv jibwqnam ammam, roo alangam, hoo kutiam noosu tulu ho baqa kunum.

¹³‍Hoo ngo gumn noosungam kvvyw-tada mvdwb nyub Selemiyanvn, xeqn bo Jadoknvn, hoo Lebig Pedaianvn xuqlinum, hoo Jakkur ko tuup Hanannvn, Mattaniyag ko tuupam bulam svka mvdwb xuqnum, hoggab bulv hingw dvb nyinum, hoo bulug bon nyisv bulug vbw-bor tulungam horpin-hora mvdwb mvnum.

¹⁴‍Soq pagoq gab, ngoqg Pwnboa, ngam mwwpa tvb, ngoqg Pwnbog namlo gab la hoo mwwg gab ngoqg alwb bon nyiknam tulungam mvpaq maabv.

¹⁵‍Hoq moodho ngo Juda nyiilungam Doonu aalho roo ala heexor dvb, hoo am agaqkam baqa dvb hoo hoq tulu ham svdam aoho pvvlwq jidwb kaapanum, hoo roo alangam, roo aaxiam, taoq aaxiam, hoo hog mwlw luuxy baqnam mam Doonu aalho Jerusalem urab baqanum. Hoo hwdlo bulv dvsam hoq aalho puqyik ho ngo bulam beo-belamnum.

¹⁶‍Bopam uraho doonbo Taiyar nyi tulu ngvkam nguiyam la hog mwlw dvsam Doonu aalho Jerusalemwg Judag nyiilungam puqnum!

¹⁷‍Hoo ngo Judag xinam nyiilungam haqyaqminsul hoo bulam benum, “Doonu aalam kacdvb, nulug soq almab nyidu gvdwn si hoggv?

¹⁸‍Nulug ab tulungv soq nyinam sam nyimanam yv, hoo ngulug Pwnbov soq ciqcaq-bviyaq sam ngul gvla soq bopam so bvqlwq maap nvi yv? Sija nulv Doonu aalam kacdvb mvl Israelwg aoho hang lingtwrnam mam vi yaiya go hoodu mvdo.”

¹⁹‍Hoqho kanv purab kalam Doonu aalwg otuqb Jerusalemwg toggoq tulungam, hoo viyap tulungam ciqtum mvdwb ngo gaml jinum hoo Doonu aalv wiyum maady deedib ciqko mabwk hvl gaml jinum. Hoo hiyvkam Doonu aalam urab baqs baqa mvma dvb, ngoqg nyera tuugin ngo toggoq tuluho doomnum.

²⁰‍Hoqgab Jerusalemwg lvvg ho lok-lwnyi go hog luuxiam kwm-kor mvnbo ngvla puqn bov doonum.

²¹‍Hvbmabde ngo bulam beo-belaml hoo bulam benum, “Hoggub nulv gurum lvvg so doodwn? Nulv sam lokta nyib nyiloqkam, ngoqg alaqkv nulug aoho laqdaq tayin.” Hoq mood jaq hoqgv bulv Doonu aalam haak maanum.

²²‍Hoo ngo Lebi tulungam atv xeexaq sutwk hvl hoo Doonu aalam dvrwqb pvvdwb, haagab lengl toggoq tulungam rvky tvk hvl gaml jinum. Ngoqg Pwnboa, soq samkam ngam mwwswl mwwpa tvbv, hoo noqg koijaqb tumab abynam hoqgv ngam swwl doom tvbv.

²³‍Hoq moodho ngo Juhudi nyiingv Asdod, Ammon, hoo Moab nyem mam nyem naadwb kaapanum.

²⁴‍Bulug ko hury papo gon Asdodwg agam goangam goonum, hoo bulv Judag agam goangam goolaq maanum, hvbmabde nyiilu vxiv at-atwg agam mam gootwqnum.

²⁵‍Hoo ngo bulam ceekonum hoo bulam beenum hoo tuugin ngo jwwnum hoo bulug dummam bulinum. Hoo ngo bulam Pwnbog eminb dingm dvb mvnum, begamv, “Nulug nyem ko tulungam bulug nyega ko gab jimabv, ho nulug atgab la nulug ko tuup gab bulug nyem ko tulungam naamabv.

²⁶‍Israelwg lvpw at Solomon soq svkwg nyem pagoq so nyic nyimanam yv? Nyob asaqg pengko ho mwwg hvb nyinbo lvpw at doon mvi yv, hoo mwwg Pwnbov mwam abynum, hoo Pwnbov mwam Israelwg nyiilug aoho lvpw at gob mvnum. Hvbsujaqkam nyoodo nyem tulungv mwam nyic nyim dvb mvnum.

²⁷‍Ngulv nulug benam mam tal hoo soq koijaqb alman sam nyitayin yv hoo ngulug Pwnboam ceekol tvjwmab nyoodo nyem mam naab yv?”

²⁸‍Hoo nyub but Eliyasibwg ko tuup Jehoiadag ko tuup akwn hv Horon nyookwg Sanballatwg maqbwb nyinum. Hoqgab ngo mwam ngoqg dook hoqgv ruqpaqnum.

²⁹‍Ngoqg Pwnboa, bulam mwwpato, hoggab bulv nyub dvparam hoo nyub dvpar gvla Lebi tulug birnam mam kacdvb mvpa ku.

³⁰‍Soq sib hog mwlw luusaq boam ngo bulam dvrwq dvb mvnum, hoo nyub gvla Lebi tulug nyiicwr-cwrxig bonam, ngo mvp jiknum;

³¹‍hoo xik mood jaqho nyin mvdwb ngo wswngam la otuqb lengco bo aaxiam mwx-mvaq jinum. Ngoqg Pwnboa, alwb nyigam gab, ngam mwwpa tvb.