Read Nyishi NEXEMIYA 2 Bible Online

NEXEMIYA 2 - Nyishi bible

NEXEMIYA 2

¹Nisan poolwg, vnyw camnyi go Lvpw at Artaserses swwi yikho, hwdlo roo ala twwsv mwwg agaho dooikam, ngo roo ala twwsam naarabnv hoo ham lvpw atam jinum. Hoq moodho ngo mwwg agaho mwwdwq dvb kaapanum.

²‍Hoo lvpw atv ngam benum, “Kaanamv no vc maasu, hoggab noqg nyuqmv moosa-sasa dvn? Soq si hognvk kama hvbmabde hang hoqg mwwdwqnamv.” Ho ngo vc jaqb bosnum.

³‍Ngo lvpw atam benum, “Lvpw atv nwrba gob dooky nvka! Hwdlo ngoqg ab tulug nyubu dook bopamv ocu-aiya yin, hoo hoqg toggoq tulungam wm gupaq baloqkam, hoggub ngoqg nyuqmv mooma-sasa maab nyitayin?”

⁴‍Ho lvpw atv ngam benum, “No hog nvkam kodwn?” Hoqgab ngo ao lvpwg Pwnbon swgwnum.

⁵‍Hoo ngo lvpw atam benum, “Lvpw atv mwwlwq paloqkam, hoo noqg nyerangam no kvvlwq paloqkam, no ngam Judab kanam tvb, ngoqg ab tulug nyubu dook bopamb, ho ngo hoqham mvdar taden.”

⁶‍Hoo lvpw atv ngam benum (vi-kooriv mwwg bviywrho doonum), “No hog hwd mood gob wtayin, hoo no hwdlongam hookur tayin?” Ho hwdlo ngo moodam mwam betam yin, ho lvpw atv ngam kanam dvb mwwbwqnum.

⁷‍Hoo ngo lvpw atam benum, “Lvpw atv mwwlwq paloqkam, Pobu Kvd gvdag nyiit rad tulungam pui pota lo xeqt bv, ho ngam bulug gvdangam wpeq layil Juda namgub wc mvdwb,

⁸‍hoo lvpw atwg nyorongam kaal doog yaanbo Asapnvn pui pota taqg xeqmnum, ho dvrwq namlog toggoq tulungam, hoo bopamg bvliam, hoo ngoqg doogw tanam nammam mvn mvdwb mwam svvda svvtaqkam jim dvb xiqlwq mvnum.” Hoo hoggv ngo konum ham lvpw atv ngam jinum, hoggab ngoqg Pwnbog alaqkv ngoqg aoso doonum.

⁹‍Ho ngo Pobu Kvd gvdag nyiit rad tulug dookub lvpw atwg pui pota tulungam bvvlayil haanum. Ho lvpw atv ngoqg lvgab sipai saab tulungam la svpur xarn bo nyi tulungam kanamnum.

¹⁰‍Hvbmabde ham hwdlo Horon nyi Sanballat la Ammon gv nyera Tobiya sam tapa yin, hoqhv bulam vc jaqb hemp mwwpa mvmanum, hoggab Israel nyiilungam kvvyw-tada dvb nyi ak haagam gab.

¹¹‍Hoqgab ngo Jerusalemb wnum hoo hoqho aal loum go doonum.

¹²‍Ho ngo la ngoqg lvgab nyi anyo go, aiyam gorab layil wnum. Hoo Jerusalem gab Pwnbov ngoqg hang so hoggv nyim dvb jilwqnum ham nyi akkam betam maanum. Ngoqg lvgab svdin doomanum hvbmabde ngoqg svdam wn nan arro hv doonum.

¹³‍Ngo Lywpag Toggoq hoqgv Mucum lvvr-laanyi subuq buqlinko namgub hoo Ikum-peera Toggoq namgub ai wnum, hoo ngo Jerusalem bvly yaqpia bo mwlwngam hoo hoqg toggoq tulungam wm gunam mam gvqyiql kaanum.

¹⁴‍Ho Subuq buqlinko Toggoq hoo Lvpw atwg Sviyin namgub wnum, hvbmabde ngoqg lvgab svdin wnbov hoq lamta ho wpeqko doomanum.

¹⁵‍Ho ngo ai lywpab wnv hoo bvly tulungam gvqyiql kaanum, hoo ngo wkur kunv Lywpag Toggoqb hookur kunum.

¹⁶‍Hoo saab tulungv ngo hog loqb wnum ho hoggv ngo nyidu dvn ham cengmanum, hoo ngo Juhudi nyi tulungam, nyub tulungam, xinam nyi tulungam, saab tulungam, hoo bonam nyidy bo nyi tulungam betam maatanum.

¹⁷‍Ho ngo bulam benum, “Nulv kaato, ngulv vs-axaqdo, hwdlo Jerusalemwg toggoq tulungam wm guxia tvl ocu-aiya dooikam. Hoqgab haato, kuj ngulv Jerusalemwg bvly sam mvdar tukju, ho ngulv hvnyw nywl dookram.”

¹⁸‍Hoo ngo bulam ngoqg Pwnbog ngoqg aoso aya mwwpanam mam, hoo lvpw atwg ngam gomcwr benam tulu hamkam betam kunum. Hoo bulv benum, “Kuj ngulv gorabl mvdar tuj.” Hoqgab bulv alwb bonam nyidwb bulug alaqkam mwx-mvaqnum.

¹⁹‍Hvbmabde hwdlo Horon nyi Sanballat la Ammon nyera Tobiya hoo Arabwg Gesem ham tapa yukho, bulv ngulam nyirjnum hoo ngulam haqpaql benum, “Hoggv nulv soq sam nyidu dvn? Nulv lvpw atam taleql ceeko dvb nyidu do i?”

²⁰‍Ho ngo bulam birwqnum, “Ao lvpwg Pwnbov ngulam swwm-geem dvb mvtayin, hoo mwwg nyera tulu ngulv gorabl mvdar tayin, hvbmabde nulv Jerusalemho hog naas, ho naady sanam ho hog gaqs dooma dvn.”