Read Nyishi NEXEMIYA 4 Bible Online

NEXEMIYA 4 - Nyishi bible

NEXEMIYA 4

¹Hwdlo Sanballat ngulv bvliam mvdar dvk hvl tapa tvl, mwv hang lengl hoo vcjaqb haaxaqnum, hoo mwv Juhudi nyi tulungam bej-beparnum.

²‍Hoo mwv mwwg vbw-bor tulu ngvla Samariyag sipai tulug agaho benum, “Hoggv yu soq laanyi maanbo Juhudi nyi tulu si nyidu dvn? Bulv soq sam bulug atgab mvdar suta tad nvi yu? Bulv pwr jita yin yu? Bulv aal lookin ho mvnya tan yu? Bulv wm guknam wlw tulu pookumnam dooxa bo hoqgv mvdar tad nvi yu?”

³‍Ammon nyi Tobiya mwwg bviywrho daqnum, hoo mwv benum, “Vv jaqbo, hoggv yu bulv mvdar dordu dvn—siyalv hoq aoho cao baloqkam bulug bvly hoqg wlwngam caapia tayi!”

⁴‍Tato, ngulug Pwnboa, hoggab ngulam bej-bepar do. Bulug bej-beparnam mam bulug atwg dumpo aoho haam to hoo bulam nyumwb book gvdaho bulug hog mwlwngam naareql mvto.

⁵‍Bulug nyixiaqkam pulup maabv, hoo noqg kaaga hoqgv bulug nyicam mvpaq maabv, hoggab bulv nam hang lengdwb mvdarbo nyi tulug agaho hang biluq paku.

⁶‍Hoqgab ngulv bvliam mvdarnum. Hoo bvly mwlwg aongam papo dvb hiqca kunum, hoggab nyiilungv bonam nyidwb mwwnum.

⁷‍Hvbmabde Sanballat la Tobiya hoo Arab nyi tulungv la Ammon nyi tulungv hoo Asdod nyi tulungv Jerusalemwg bvliam mvdar dordunam mam tapanum hoo taqc-taqywl uko bo tulungam hiqtum tumrab kunum, bulv vcjaqb hang lengnum.

⁸‍Hoo bulv lvkin gob hookuml dookumnv hwwsil hwwbamnum hoo Jerusalem mam ceekol nyob pal adar-apar mvma dvb mvdwb mwwnum.

⁹‍Hoo ngulv ngulug Pwnboam swgwnum hoo aal-aiyib bulam ceekol mvtur mvdwb rvky boam xuqlinl apnum.

¹⁰‍Judaho soq sib benum, “Vgwngam baqn bov laanyi kumab nyidu duku. Hoqho vc loodab kac-tanyiaq kv doonum. Ngulv atv bvly sam mvdar darla kuram.”

¹¹‍Hoo ngulug ceebiongv benum, “Ngulv bulam haal mengl hoo bonam nyingin mvma baloq bulv hog cengram hoo kaapa ram.”

¹²‍Hoq moodho ogum ho doonbo Juhudi nyi tulungv taqg-loosaq mwlw hoqgv haanum hoo ngulam lwyw go benum, “Nulv hoggub nyijaqkam ngulam jikur tuku.”

¹³‍Hoqgab mwlwngam ako yaan bvly deelag langk ho, ngo nyiilungam bulug nyob-nyobam bulug lyoqr orioq lvgab, bulug nwwxo lvgab, hoo bulug illy-uppuq lvgab doomnum.

¹⁴‍Hoo ngo kaal hoo gorabnum hoo xinam nyi tulu ngamla saab tulungam hoo nyiilungam benum, “Bulam bos maabv. At Swn mwwgab to, hiyv koi bvla mwwc lama dvb nyidwn, hoo noqg vbw-bor tulu gab, noqg ko tuup tulu gab, noqg ko nyem tulu gab, noqg nywxw tulu gab, hoo noqg imiq gab nyob padwn.”

¹⁵‍Hwdlo ngulug ceebio tulungv bulug kvsil nyitanam mam ham ngulv cengyi kun hoo bulug mwwsil nyitanam mam Pwnbov niqtuq lengm kuma yin, ho ngulv nyiicwr-cwrxiv at-atwg bonam nyitab bvlyb wkurnum.

¹⁶‍Hoq aal jaq hoqgv ngoqg nyera papo gon bvly pwnam ho bonam nyinum, hoo papo gon nwwxo, svtam, illy, nyob pataqnan vjam kootwl doonum. Hoo nyigbo tulungv Judag nombungam langk hoggv torl-daal svkanum,

¹⁷‍hoq tuluhv bvliam pwdul doonam. Hiyv bvliam mvdar naadwb dupum-dvrab baqn bo tulu ngvkam nwwxo-svtam bwwtwl mwwg bonam bulv lvkin gob nyinum.

¹⁸‍Hoo bon nyinbo tulungv mwlwngv mwwg lyoqr orioqkam buqtwl mwwg bon nyik ho nyidunum. Nyemaqkv haaikam tuuly miqpa yaan bo tulungv ngoqg bviywrho doonum.

¹⁹‍Hoo ngo xinam nyiilungam la saab tulungam hoo nyiilu mwlwngam benum, “Bon nyisv koi pa hoo cwmmab nyisv doopa, hoo ngulv bvly taqg-loosaqb dootayi, ho akwn-akwn hoqgv aado mins tayi.

²⁰‍Hogloq nyook hoojaqkam nulv tuuly miqnanam tapa yin, ngulug dookub haato. Ngulug Pwnbov ngul gab nyob patayin.”

²¹‍Hoqgab ngulv bonam nyinum, hoo papo gon nwwxo-svtam bwwtwl dooko koar-komar yik hoqgv ariyum mam takarv buqlin namgub rvkil daqyanum.

²²‍Hoq mood hookam ngo nyiilungam benum, “Nyi vxiam la mwwg nyerangam Jerusalemho aiyam gaql yvm to, ho bulam ngulam aiyam rvkil doog mvto hoo aalam ngulv bon nyila tayin.”

²³‍Hoqgab ngo la ngoqg vbw-bor tulungv ho ngoqg nyera tulungv ho ngam wmin gvl rvkil doonbo nyiilungv, ngulv akkam ngulug vjam pipaq maanum; nyiicwr-cwrxiv mwwg nwwxo-svtam mam mwwg lvqbwq alaqho bwwtwl doognum.