Read Nyishi NEXEMIYA 5 Bible Online

NEXEMIYA 5 - Nyishi bible

NEXEMIYA 5

¹Hoq moodho nyiilu ngvla bulug nywxw tulungv bulug Juhudi vbw-bor tulungam vcjaqb ceekol xabnum.

²‍Hoggab hoqho bulv benum, “Ngulug ko tuup tulu ngvla ngulug ko nyem tulungv, ngulv naleq paku. Hoqgab ngulam am dvs loq jitbv, ho ngulv dvtwl hoo swwl dooiyin do.”

³‍Hoqho tuugin hvraqb benum, “Ngulv ngulug rongo tulungam, roo boolungam, hoo ngulug nam tulungam dwr wggam gab am naadwb huta taal ap pakun.”

⁴‍Hoo hvraqb tuugin benum, “Ngulug rongo gab la roo boolu gab lvpw atam nyooga jidwb twngk ceepa kun.

⁵‍Sija ngulv ngulug vbw-bor tulug gv soodin akinv, ngulug ko huriv bulug ko hury hvb nyidwn. Hvbsujaqkam ngulv ngulug ko tuup tulungam la ngulug ko nyem tulungam raasur-nvsurb swwm dvb nyidu do, hoo ngulug ko nyem tuugin paqnwb swwxo lopa ku, hvbmabde hoqham ngulv svka dvb huqlw dookma, hoggab nyi asaqkv ngulug rongongam la roo boolungam doog paku.”

⁶‍Hwdlo ngo bulug sorl xabnam gomcwram tapa yin hoo ngo vcjaqb hang lengnum.

⁷‍Ngo atv atam tomswr-hony sunum, hoo ngo xinam nyiilungam la saab tulungam ceekol yolu ruql alma hvl benum. Ngo bulam benum, “Nulv vxy cwrv mwwg atwg vbw-bor tulungam nyijab-nyiyiql nyidu do.” Hoo ngo bulam ceeko dvb koi jaqb dookum ak doognum

⁸‍hoo bulam benum, “Ngulv hog hwdgo nyila dvn, hwdgo ngulv ngulug vbw-bor Juhudi nyi tulungam asaq nyob ho puqknam mam, rukur pakun, hvbmabde nulug vbw-bor tulungam nulv puqnam ho bulam ngulug lvgab puqsiq puqa mvnum!” Bulv agam gamg kam birwq sanam doomanum hoo cooikab doonum.

⁹‍Hoqgab ngo benum, “Nulug nyidunam pagoq tulu si alma. Nulv ngulug Pwnbog bekwb bosil nyil wdwb mwwma, hoggab ngulug ceebio tulug nyob asaqkv ngulam bej-bepar maai yv?

¹⁰‍Hoq aoho, ngo la ngoqg vbw-bor tulungv hoo ngoqg nyera tulungv bulam twngkam la am mam cwwrwqnum. Kuj ngulv soq leqbaql naanam pagoq sam apaq tukuj hvl benum.

¹¹‍Soolo aal so bulug rongo tulungam, bulug roo boolungam, bulug olib svvn boolungam, hoo bulug nam tulungam, hoo no bulug hoqgv leqbaql naadwb twngk nanam mam, am naanam mam, roo ala naanam, hoo kuty naanam mam bulam jikur tuku.”

¹²‍Ho bulv benum, “Ngulv soq tulu sam jikur taikun hoo bul galoqkv hog akkam nvvj kuram. Ngulv noqg bek jaqb nyitayin.” Hoo ngo nyub tulungam goqnum hoo bulug dingr ko jaqb bulam nyim dvb bulam dingr mvnum.

¹³‍Ngo kam ngoqg vj pussam mam toosuql twqdil benum, “Ngoqg Pwnbov nyiicwr-cwrxig nam hoqgv la mwwg bon nyinam hoqgv hiyv dingrnam mam pvvma boam mwwg hog mwlwngam toosuq lengm to. Hoqgab mwv hog mwlwngam toosuql hoo asar dvb mvnum.” Hoo dookum bo mwlwngv benum “Amen” hoo At Swn paqnum. Hoo nyiilungv bulug dingrnam hvb nyiknum.

¹⁴‍Hoq aoho, lvpw at Artaserses vnyw camnyi hoqgv vnyw cammum leq nywnyi go swwyikho, ngam Juda gvdag nyiit rad gob mvnum, vnyw camleq nywnyi go ngo la ngoqg vbw-bor tulungv nyiit rad gob swwikam dvm dvb dvs jinam mam dvmanum.

¹⁵‍Ngoqg otuqb nyiit rad swwnbo tuluhv nyiilungam vigo vgw baqmnum hoo bulug aal looxiam dvsam nyi tulu hoqgv rup sikil campy gogaqb naanum. Bulug nyera tulu ngvkam nyiilug aoho vgw baqmnum. Hvbmabde Pwnboam bos ko-gab, ngo ham nyimanum.

¹⁶‍Ngo kam soq bvly sam mvdar dvb hog mwlwngam pvvcuml apnum, hoo ngulv gvdangam naareq maanum, hoo ngoqg nyera mwlwngv hoqho bonam nyidwb hookum keenum.

¹⁷‍Hoq aoho, diis-paap hoqgv nyob nyi asaqkam hookum boam apaqtvl, ngoqg dvk tebol ho Juhudi nyi ngvla saab tulungv dvba bo nyiingv 150 go.

¹⁸‍Hoq moodho ngoqg tebol ho aal looxiam svv hvvb dorg la sviya dorx go hoo poroq roqtwngam mwx-mvaq dvb nyinum, hoo aal looyw-looywngam deedy luuxy roo ala twwsam naleqgo jidwb nyinum. Hvb soq mwlw sam dvs-twws jaqkam ngo nyiit rad gob swwk gab dvs jinam hoqgv komanum, hoggab hvb nyib nyiloqkam nyiilug aoho vigo vgwngv haatanum.

¹⁹‍Ngoqg Pwnboa, soq nyiilu gab ngoqg hog mwlw alwb nyiknam ham ngam mwwpa labka.