Read Nyishi NEXEMIYA 6 Bible Online

NEXEMIYA 6 - Nyishi bible

NEXEMIYA 6

¹Hoq moodho hwdlo ngo bvliam toggoq akkam doom mvmab mvnya yukho (toggoq tulug viyap tulungam mwlwq maatanam mam) Sanballat hoo Tobiya la Arab hoqgv Gesem hoo ngulug ceebio tulungv ham tapanum,

²‍Sanballat la Gesem ngam pui bilwql begamv, “Ono haapag Hakkepirim ho ngulv lvkin gob hookuml kvvrwq minstuj.” Hvbmabde bulv ngam mvdwb tuugabnum.

³‍Hoo ngo bulam pui bilwql begamv, “Ngo koi looda bo bonam nyidu dvn hoo ngo ila deema. Ngo nulug dookub il wleqyin hog gab bonam nyim mvma tayin?”

⁴‍Hoo bulv ngam soq sib lwpy go nyi roolwql pui bemnum, hoo ngo bulam birwqnam akinam birwqnum.

⁵‍Soq nyinam akin sam Sanballat mwwg nyera lvgab potangam mwwg alaqho jilwq tvl lvng dvb kanamnum.

⁶‍Hoqho soq sib xeqnum, “Nyob nyi pengko pui xwwtam do hoo Gesem mvkam soq sib bedo, no la Juhudi nyi tulungv bidu-bel tama dvb nyido hvl tapa do; hoqgab no bvliam mvdarl mudu do. Hoo bulug pui bicwb bebnyiloqkam no bulug lvpw atwb swwdwb mwwdo.

⁷‍Hoo ‘Judaho lvpw at ak doodo’ hvl noqg pagoqkam Jerusalemho bepa mvdwb nyiqry benbo tulu ngamkam no pvvpa. Hoo sija lvpw atv soq pui tulu sam tatayin. Hoggab soqb haato hoo ngulv lvkin gob hwwbam tuj.”

⁸‍Ho ngo mwam pui birwql kanaml begamv, “Noqg soq pagoq begdvn mwlw si besamv, hoggab soq benam mwlw si no atv mwwlwql benam go.”

⁹‍Hoggab bulv ngulam bos belam tvl, “Bulug alaqho bon nyingongam apaq mvdwb hoo hoqg bonam nyim mvma dvb mwwnum.” Hvbmabde, Pwnboa, sija ngoqg alaq sam ator dvb mvtbv.

¹⁰‍Hoq moodho hwdlo ngo Mehetabel ko hosiqg Delaia gv ko tuup Semaiyag nam urab haai yikho, mwwg nam uraho tumcuml apnum, ho mwv benum, “Kuj ngulv dvrwq namlog Pwnbog nam ura alo kvvrwq mins tuj. Kuj ngulv dvrwq namlog viyap tulungam ciqtum tuj, hoggab bulv nam mengta do. Bulv nam mengtab aiyam hoodul doodo.”

¹¹‍Hvbmabde ngo benum, “Ngoq hvb nyinbo nyiingv xaal keiyin dvn yv? Hoo ngoq svkwg nyiingv dvrwq namlo urab haal hoo hoggub swwtayin? Ngo hoq urab wram.”

¹²‍Hoo ngo cengknum hoo kaaknum mwam Pwnbov kanam maanum, hvbmabde mwv ngam ceeko dvb nyiqry benum hoggab mwam Tobiya la Sanballat hvb bem dvb ree goqnum.

¹³‍Soq pagoq gab mwam ree goqnum, ho ngam bos mvdwb hoo soq sib nyil nyic nyim dvb mwwnum, hoo bulv ngam alman bogub bedwb hoo ngam bej-bepar tanum.

¹⁴‍Ngoqg Pwnboa, mwwgab to, Tobiya la Sanballatnvn, ho bulug hog mwlw pagoq nyinam mam, hoo nyiqry benbo nyem Noadiya nvla nyiqry benbo tulungv ngam bos belam tanum.

¹⁵‍Hoqgab bvliam camng leq loonyi ura gv Elul poolwg camnyi leq loog aalho mvnya kunum.

¹⁶‍Hoo hwdlo ngulug ceebio mwlwngv ham tapa yukho, ngulug diis-paap nyob mwlwngv bosnum hoo bulv vcjaqb atv atam mwwcu-saqya kunum, hoggab bulv soq bon nyinam tulu sam Pwnbog svka hoqgv muiyum pakbo hvl cengknum.

¹⁷‍Hoq aoho, hoq moodho Judag xinam nyiilungv Tobiyanvn naleqgo pui potangv jilwqnum, hoo Tobiyag pui pota ngvkam bulug dookho naleqgo haanum.

¹⁸‍Hoggab Juda hoqg doonbo nyiingv naleqgo mwwg lvgab nyimin gvdwb hvl dingrnum, hoggab mwv Arag ko tuup Sekaniyag maqb gob nyinum: hoo mwwg ko tuup Jehohanan Berekiyag ko tuupwg Mesullamwg nyem koam mwwg nywxwb naanum.

¹⁹‍Ho bulv mwwg alwb bon nyinam tulu ngamkam ngoqg agaho agam goonum hoo mwwg dookub ngoqg gomcwr puiyam baqanum. Hoo Tobiya ngam bos mvdwb naleqgo pui potangv jilwqnum.