Read Nyishi NEXEMIYA 8 Bible Online

NEXEMIYA 8 - Nyishi bible

NEXEMIYA 8

¹Hoo nyiilu mwlwngv nyi akin hvb nyitwl Iss Toggoq agag deelaho lvkin gob hookumnum. Hoo At Sw Israelam gaml jiknam Mojesg Pvvb Kitap ham bulv nyub Ijranvn bwa tvk hvl benum.

²‍Hoo nyub Ijra Pvvbam hookumko agaho bwanum, pool kvnwg otuq aalho, nyem la nyegangv vnyi-vnyiv hoo bulug tanam ham talaqbo mwlwngv tanum.

³‍Hoo nyem nyegangv tatwl talaqbo tulug agaho, mwv Iss Toggoqg deelaho ham ar komc hoqgv al lvpa namgub poorynum. Hoo nyiilu mwlwngv Pvvb Kitap hoqgv poorynam mam haagab jaqb tanum.

⁴‍Hoo daqtam tvl rin mvdwb svvtaq hoqgv bulug mvnam aoho nyub Ijra daqtamnum. Hoo mwwg lvqbwq taqc ho Mattitiya, Sema, Anaia, Uriya, Hilkiya, hoo Maaseiya, hoo mwwg laqc taqc ho Pedaia, Misael, Malkija, Hasum, Hasbaddana, Jakariya, hoo Mesullam daqnum.

⁵‍Hoo Ijra nyiilu mwlwg kaagaho kitapam lwqkonum, hoggab mwv nyiilu mwlwg odumho daqnum, hoo mwv ham lwqko yin nyiilu mwlwngv daqrabnum.

⁶‍Hoo Ijra koibo Pwnbo, At Swn paqnum, hoo nyiilu mwlwngv bulug alaqkam irab banv birwqnum, “Amen, Amen.” Hoo bulug dumpongv pvxw banv nyuqm mam ked ho nywtin tvl At Swn xumnum.

⁷‍Hoo hwdlo nyiilungv bulug atwg daqk ho doqdu yuk ho, Lebi nyi tulungv Jesua, Bani, Serebiya, Jamin, Akkub, Sabbetai, Hodiya, Maaseiya, Kelita, Ajariya, Jojabad, Hanan, Pelaiya Pvvbam nyiilungam talaq mvdwb svkanum.

⁸‍Bulv Pwnbog Pvvb kitap hoqgv tadar pvla dvb poorynum, hoo hoq rinam tuluhv talaq dvb jinum, hoo nyiilungv rinam mam talaql cengnum.

⁹‍Hoo nyiit rad Nexemiya, la nyub Ijra, tomswr bov, hoo Lebi nyi tulungv nyiilungam tomswrl hoo nyiilu mwlwngam benum, “Soq aal si nulug Pwnbo At Sw gab dvrwqbov; hoqgab mool-rinl ho nyix-riimabv.” Hoggab Pvvb gomcwram nyiilu mwlwngv tapa tvl xabnum.

¹⁰‍Hoo mwv bulam benum, “Nulug lamtab wto. Oxam dvto hoo tiiswrbo alangam twwto hoo hiyv dooma dvn ham meeg jilwqto, hoggab soq aal si nulug At Sw gab dvrwqbov. Hoo mwwdwq maabv, hoggab At Swg hempnamv nulug atorv.”

¹¹‍Hoo Lebi nyi tulungv nyiilu mwlwngam swrsob doom dvb benum, “Cooikab dooto, hoggab soq aal si dvrwq aalv; mwwdwq maabv.”

¹²‍Hoo nyiilu mwlwngv bulv dvta twwtab at atwg lamtab wknum hoo koijaqb hwnyir-hvmarnum, hoggab bulam bibwql bekin kunam gomcwr tulungam bulv cengknum.

¹³‍Aal loonyi deen ho ab tulug imiq dvpar hoqg nyiilu lvgab nyub tulu ngvla Lebi nyi tulungv nyub Ijra dookub lvkin gob Pvvb gomcwram poory ritab haanum.

¹⁴‍Hoo pool kvnnam Israelwg nyiilungv doogw durum mam soom dvb Mojesnvn At Sw Pvvbam gaml jil xeqp kunam mam bulv kaapanum,

¹⁵‍hoo bulug pamda tulu hoola Jerusalemho soq pui sam bulv bekarl bekin dvb nyinum, “Hoqho xeql apnamv, yorn tulub caag dvl hoo olib haqb tulungam, nyoro olibam, swiywq nyam-nyambo okam, pvng haqbam, hoo asaq svvn haqb tulungam doogw cwwrwngam mvn dvb na-a to.”

¹⁶‍Hoqgab nyiilungv lvvgwb wnum hoo hoq haqb tulu ham na-a layil nyiicwr-cwrxiv mwwg nam aoho, hoo bulug nam baagho hoo Pwnbog nam haaga ho, hoo Iss Toggoqg deelaho hoo Iprayimg Toggoqg deelaho bulv atgab doogw cwwrwngam mvnum.

¹⁷‍Nyumwb boonam hoqgv hookur bo nyi mwlwngv doogw cwwrwngam mvtwl hoo doogw cwwrwho doonum, hoggab Nunwg ko tuup Jesuag aal hoqgv jaq hoq aal namgub Israel nyiilungv ham nyika kumanum. Hoo hoqho vc loodab hwnyir-hvmarv doonum.

¹⁸‍Hoo aal-aalam, otuq aal hoqgv jaq vtwr-anya aal namgub Pwnbog Pvvb Kitapam mwv poorynum. Bulv xilo soonam mam aal kvn go soonum, hoo pvvb bek jaqb, piin aalho mwlwngv piwr jwr-jwr dvb dookum ak doonum.