Read Nyishi NEXEMIYA 9 Bible Online

NEXEMIYA 9 - Nyishi bible

NEXEMIYA 9

¹Hoq poolwg camnyi leq loopy aalho Israelwg nyiilungv hookumnum, hoo bulug dumpo ho diimwram taaiyaq tvl tuila vjam kootwl dery reel doonum.

²‍Hoo Israelwg nyiilungv bulv atv nyoodo nyi tulu hoqgv vpwb doqxubnum hoo bulv daqtwl bulug nyicam la bulug ab tulug nyimurnam tulungam beporl xaqlinum.

³‍Hoo bulv bulug daqk nyook ho daqtwl hoo bulug Pwnbo At Swg Pvvb Kitap hoqgv swlw duur oum gob poorynum; hoggab duur oum gob bulv nyicam beporl xaqlinum hoo duur oum gon bulug Pwnbo At Swn xumnum.

⁴‍Lebi nyi tulug pamto hoqgv Jesua, Bani, Kadmiyel, Sebaniya, Bunni, Serebiya, Bani, hoo Kenani daqnum; hoo bulv bulug Pwnbo At Swn vcjaqb sogoql xabnum.

⁵‍Hoo Lebi nyi tulungv Jesua, Kadmiyel, Bani, Hasabneia, Serebiya, Hodiya, Sebaniya, hoo Pet-ahiya benum, “Daqrabto hoo noqg Pwnbo At Swn kuiyum hoqgv kuiyum nagub paqto. Noqg yuunam eminam paqto, hogloq hv mwlwngam yuubin yaam dvb paqdwb nyidwn.

⁶“At Sw, no aro twq At Swv. No doangam pwnum, hoq ao tol doonbo mwlwngam pwnum, swcwngam la hoq aoso doonbo mwlwngam pwnum, sa-svlongam la hoq uraho doonbo mwlwngam pwnum; hoo no hoq mwlw ham hoocuml apnum; hoo doa ao tol doon bov nam xumdwn.

⁷‍No At Swv, Abramnvn Kaldiya gvdag Ur hoqgv xuql boolin layil hoo mwam Abraham hvl emin jinbo Pwnbov.

⁸‍Noqg agaho mwwg hangam no dengky dvb kaapanum, hoo mwwg hosiqkam Kanaan nyi tulug, Hittait tulug, Amor tulug, Perijj tulug, Jebus tulug, hoo Girgas tulug gvdangam jitayin hvl mwam pvvb mvl birnum. Hoo noqg dingrnam mam no pvpa kun, hoggab no jvqtw bov.

⁹“Hoo Ijipt ho ngulug ab tulug hentwram no kaapanum hoo bulv Hilw Sa-svlo ho xabnam mam tapanum,

¹⁰‍hoo swrdorxeqkam nyinum hoo Paro nvla mwwg nyera tulungam hoo mwwg gvda nyiilu mwlwngam ceekol lomdwb bon nyinum, hoggab ngulug ab tulungam bulv vc loodab nyijab-nyiyiqnam mam no cengnum. Hoo soolo xaqb no atv noqg eminam doom dvb mvnum.

¹¹‍Hoo no bulug agaho sa-svlongam mwrpin sunum, hoqgab bulv sa-svlo ra lvpab ked pwtw ho wnam hvb wpeqnum, hoo bulam ruqmin gvnbo tulungam koibo issiv wlwngam lumlupnam hvb lumlupnum.

¹²‍Doomwq piuar lvgab aalam wgnum, hoo bulug wk lamtangam wm piuar lvgab huto huuj tvl bulam wwmnum.

¹³‍No Sinai Puutu ho ipoqnum hoo doa hoqgv bulam agam goonum hoo bulam jvqtwb nyidy sanam mam la pvvb tulungam, albo tomswrnam tulungam hoo gaml tulungam jinum,

¹⁴‍noqg dvrwqbo Doonu aalam no bulam cengm dvb jinum hoo bulam gaml tulungam la tomswrnam tulungam gaml jinum hoo noqg nyera Mojes pvvbam jinum.

¹⁵‍Bulv kano yuk ho no bulam doa hoqgv dvsam jinum hoo bulv hvngwr yuk ho wlw hoqgv issam tolin mvjnum, hoo bulam no jidwb dingr kunam gvdangam bulam wgdvl naatwk hvl betamnum.

¹⁶“Hvbmabde bulv la ngulug ab tulungv at mwwlwq bvla tamil hoo noqg gaml tulungam tamanum.

¹⁷‍Bulv tama dvb hvl haqpaqnum hoo bulug pengko ho noqg swrdorxeqb bon nyinam mam mwwpa kumanum, hvbmabde bulv tamanum hoo bulv Ijipt gvdaho wkurl rasorb swwdwb bulug nyigbo ak xuqnum. Hvbmabde no danyib apaq jinbo, anya bov hoo aya mwwpa bov, haaxaq xaqla maadwn hoo tumab naleqgo aby dvn, hoo bulam haqpaq maanum.

¹⁸‍Hwdlo bulv atgab hunam svv ko murtiam mvtwl hoo benum, ‘Soq si noqg Pwnbov hiyv nam Ijipt hoqgv boolinum,’ hoo bulv vc loodab Pwnboam nyinyi-nyianum,

¹⁹‍noqg aya mwwpa ko-gab no bulam deexa-raraho haqpaq maanum. Doomwq piuarv bulam apaqmab aalam wgnum, ho bulug lamta wdy koam wm piuarv aiyam bul gab huto huujnam.

²⁰‍Noqg albo Yalam bulam tomswr mvdwb jinum hoo noqg mannangam bulam dvmnum hoo bulug hvngwr yin issam jinum.

²¹‍Vnyw campy go no bulam deexa-raraho swwl doomnum, hoo bulv hog akkam pwwma-cimab nyimanum. Bulug vjv nyamanum hoo bulug lvpiangv gookam maanum.

²²“Hoo bulam lvpw tulungam hoo nyiilungam jinum hoo cuukiq-bvrw mwlwngam bulam jinum. Hoqgab bulv Hesbonwg lvpw at Sihonwg gvdangam hoo Basanwg lvpw at Ogwg gvdangam otub naaknum.

²³‍Bulug ko huriam doag takar tvvb mvqlw mvnum, hoo no bulug ab tulungam haal ho otu naam dvb betam kunam gvda urab bulam boanum.

²⁴‍Hoqgab hosiqkv hoqb wnum hoo gvdangam otub naaknum, hoo bulug agaho hoq gvdaho doonbo nyi tulungam, Kanaan nyi tulungam no mviyanum, hoo bulug gvda ngamla bulug lvpw at tulungam hoo gvda hoqg nyi tulungam bulug alaqho bulam jilwqnum, ho bulv bulam hoggub nyim nwwdwn hvb bulv nyimnum.

²⁵‍Hoo bulv gurum nwqtumnam bopam tulungam la diibuqbo gvdangam naareqnum, hoo nam tulungam albo dupum-dvrabpv bwwr dvb, sokum hengl apnam mam, roo boolungam, olib svvn tulungam hoo naleqgo aaxy xeenbo svvn tulungam otub nvvsiqnum. Ho bulv dwnwnam mam bwwr dvb dvnum hoo oxwl dortnum hoo bulv noqg al ko-gab atv-atv hempnum.

²⁶“Hvbsujaqkam, bulv tamanum hoo nam ceekol taleqnum hoo noqg pvvbam bulug langkwb hurpaqnum hoo hiyv bulam noqg dookub hookur mvdwb beo-belaml benbo noqg nyiqry benbo tulungam mengnum, hoo bulv vc loodab Pwnboam nyinyi-nyianum.

²⁷‍Hoqgab hiyv bulam hentwr dvb mvnbog, ceebio alaqho no bulam jinum. Hoo bulug hentwr moodho bulv nam sogoql xabnum hoo no bulam ao lvpw hoqgv tapanum, hoo noqg vcjaqb aya mwwpa hoqgv no bulam bulug ceebio tulug alaq hoqgv ywwlin mvdwb ywwlin boam jinum.

²⁸‍Hvbmabde bulv swrsob doot kul bulv lokta noqg agaho almanam mam nyiknum, hoo bulam no bulug ceebio tulug alaqho jipaqnum, hoqgab bulv bulam nyijab-nyiyiqnum. Hvbsujaqkam hwdlo bulv tobkurl hoo nam sogoq yin, no ao lvpw hoqgv tapanum, hoo noqg aya mwwpanam hoqgv mood lwxiam bulam ywwlinum.

²⁹‍Hoo bulam noqg pvvb uraho hookur mvdwb no bulam beo-belam benum. Hvbsujaqkam bulv at mwwkwb nyinum hoo noqg gaml tulungam tamanum, hvbmabde noqg pvvb tulungam nyiam ceekol nyinam hvb nyic nyinum, mwv hoq tulu ham nyil swwtayin, hoo tamynum hoo haqpaql tamanum.

³⁰‍Naleq vnyw go bulug lvgab cwqnum hoo noqg yal lvgab noqg nyiqry benbo tulug lvgab bulam beo-belamnum. Hvbsujaqkam bulv tamanum. Hoqgab no bulam gvdag nyiilug alaqho jilwqnum.

³¹‍Hvbsujaqkam, noqg vcjaqb aya mwwpanam hoqgv no bulam twryum mvmanum ho bulam haqpaq kamanum, hoggab no anya bvla aya mwwpa bo Pwnbov.

³²“Sija hoqgab ngulug Pwnbov koi dvn, ator dvn hoo swrdorxeqbo Pwnbov, hiyv dingrnam mam pvvdwn hoo tumab aby dvn, ho ngulug lvpw at tulug aoho, ngulug lvpw atwg ko tuup tulug aoho, ngulug nyub tulug aoho, ngulug nyiqry benbo tulug aoho, ngulug ab tulug aoho, hoo noqg nyiilug mwlw aoho hentwr haady bo ham anyo gob kaama bv, hoggab hvbnyiloqkam Assiriyag lvpw at tulug mood hoqgv soq aal namgub hentwr hendwn.

³³‍Hvbsujaqkam ngulug aoho haam kunam mwlw hv noqg nyidy sanam mam nyim kunum, hoggab no dengky jaqb nyinum hvbmabde ngulv nyic-nyiab nyiknum.

³⁴‍Noqg bulam beo-belam benam tulu ham ngulug lvpw at tulungv, ngulug lvpw atwg ko tuup tulungv, ngulug nyub tulungv, hoo ngulug ab tulungv noqg pvvbam pvvmanum ho noqg gaml tulungam ruucw kwrgab maanum.

³⁵‍Bulug lvpw-haty hookam, noqg vcjaqb aldvb bulam jinam mam, hoo koi dvb la diibuq dvb gvdangam bulug agaho noqg ap jinam mam bulv dvmin-twwminl doodo, hvbmabde bulv nam nyis tulungam nyij ma ho bulug nyic-nyia bonam nyinam hoqgv wkur kuma.

³⁶‍Kaato, ngulug ab tulungam gvda jinam hoqg aaxiam hoo hoqg albo lvqc tulungam kaapal swwm dvb jinum; hvbmabde soq aal namgub ngulv nyerab swwdwn, kaato ngulv nyerangv.

³⁷‍Hoo hoqg diibuq hoqgv mvlinam mam lvpw at tulungam jinum, ngulug nyic nyigam gab hoqham no ngulug aoho nyimnum. Bulug mwwlwqb bulv ngulam la ngulug tuun-mee tulu aoho pvvb bwwl doogdvn, hoo ngulv vc loodab mwwdwqnum.

³⁸“Hoqgab soq mwlw si nyigam gab ngulv xeql birnam mam biima dvb nyiknum; morxtubnam pota ho ngulug lvpw atwg ko tuup tulug eminam, ngulug Lebi nyi tulug eminam, hoo ngulug nyub tulug eminam xiqlwq tvl ap kunum.”