Read Nyishi ISTAR 2 Bible Online

ISTAR 2 - Nyishi bible

ISTAR 2

¹Soq tulu si nyixo kokw so, hwdlo Lvpw at Ahasuerus hang sunyum yukho, hoo hoggv mwnwn nyiknum hoo mwnwn alma hvl ceeko mvdwb pvvb pota mvlin kunam mam, mwv Bastinvn mwwpanum

²‍Ho mwam bon nyij bo yaapa tuluhv lvpw atam benum, “Kv mwam kangam bo mvvngambo tulu lo lvpw atgab meelin mvtuj.

³‍Hoo mwwg lvpw-haty nyook mwlw hoqgv kangam bo mvvngam nyijwr tulu lo rvviyw Susag harem nyook lo bookum mvdwb, nyem tulungam nyigbo, lvpw atwg nyiipium Hegaiywg uraho jilwqto. Ho bulam gv neelap nan tulungam jito.

⁴‍Hoo hogloq nyijwr ham lvpw atv kvvlwql dvn ham Basti kwlib vi-koory gob mvto.” Hoqham lvpw atv tvlwqnum, hoo mwv hvb nyinum.

⁵‍Hoq moodho Susa gurum nwqtumnam ho Mordekai hvl eminam Juhudi nyi ak doonum, Jair gv ko tuup, Simeig ko tuup, Kiswg ko tuup, mwv Benjamin nyiingv,

⁶‍mwam Judag lvpw at Jekoniyanvn hwdlo Bebilonwg lvpw at Nebukadnejjar Jerusalem hoqgv nyumwb bool wg yukho nyumwb bootaqnum.

⁷‍Mwv mwwg vbw hoqg nyem ko Hadassanvn sorabnum, hoqhv Istar, hoggab mwn ab gokam ho ann gokam doomanum. Nyijwr akwg gv piis-peeso tvl hoo kangam jaqnam, hoo hwdlo mwnwg abv la annv sileq yin, Mordekai mwnwn mwwg atwg ko nyem gob soknum.

⁸‍Hoqgab hwdlo lvpw atv gaml jinum hoo mwwg puiyam bvqmw kunum, hoo gurum nwqtumnam Susa ho Hegaiywg uraho naleqgo nyijwr tulungam bookum kunum, hoqho Istarnvn kam lvpw atwg namlo ho doomnum, hoo nyem tulungam nyigbo Hegaiywg uraho doomnum.

⁹‍Hoo Istar mwam kvvlwq dvb la mwwg mwwsw dvb nyiknum. Hoo mwnwn mwv nyebia jaqb gv neelap nan tulungam la mwnwg dvs-twwsam jinum, hoo lvpw atwg namlo ho doonbo nyijwr kvn go mwnwg lvgab jilwq tvl hoo mwnwn otuqb wco mvnum hoo nyem nyijwr tuluhv mwnwn harem uraho mwlwngam doongam yaanbo dookho doognum.

¹⁰‍Mordekai mwnwn bilwq ko-gab, Istar mwnwg nyiilu ngamla dvparwg pagoqkam bekinl betamanum.

¹¹‍Hoo aal looxiam Mordekai haremwg haaga deelaho, Istarwg pagoqkam la mwnwn hoggv nyidwn ham cengdwb wl yvnum.

¹²‍Hoq moodho nyem nyijwr tulu ham gv kangam dvb pool camleq bvrnyi gob gv neelap nan lvgab neel doom dvb nyinum, pool barx gob mirr lvgab neemnum hoo pool barx gon kuty la asaq neen nan lvgab nyem tulungam neemnum, hoq kokwb hwdlo moodv haai kun nyem nyijwr vxiam Lvpw at Ahasuerus agaho boa dvb nyinum—

¹³‍hwdlo harem hoqgv lvpw atwg namlo namgub nyem nyijwr wikam, mwn hognvkv xeq mwwbil naal wg dvb mwwdwn ham jidwn nyinum.

¹⁴‍Ariyum mam mwn hoqb urab haadwn, hoo aram lvpw atwg nyiipium Saasgajnvn, hiyv xwwbaq nywxw tulungam kaaya bo ham kaam dvb vnyi deen haremho wkur mvdwn. Lvpw atv mwnwn mwwbil hoo mwnwg eminam goqma deedib, mwn lokta lvpw atwg dookub wkur kuram.

¹⁵‍Hwdlo Abihailwg nyem ko Istarnvn mwnwg vbw Mordekai mwwg nyem ko hvb naal soknamv lvpw atwg dookub wdv haai kukam, mwn hog akkam bwwl wg dvb komanum, hvbmabde lvpw atwg nyiipium Hegai nyem tulungam nyig bov hoggv mwnwn tomswrnum ham mwwgab twqnum. Istarnvn kaanbo mwlwngv mwnwn mwwswl kvvlwqnum.

¹⁶‍Hoo hwdlo Istarnvn Lvpw at Ahasuerus mwwg xinam namlo dookub bool wg yukho, pool bvrywg, Tebet poolwg, vnyw kvn gob mwwg pvvb bwwl doog yukho haagnum,

¹⁷‍lvpw atv nyem mwlwg pengko hoqgv Istarnvn koi yaab abynum, hoo mwn ayanam mam la mwwswnam mam mwwg kaagaho mwlw mvvngam tulungam koiyab mviya kunum, hoqgab mwv xinam namlo hoqg ywr dumtupam mwnwg dumpo ho tulwq jinum hoo mwnwn Bastig kwlib vi-koory gob mvknum.

¹⁸‍Ho lvpw atv mwwg saab tulungam la nyera tulungam koibo durum ak dvg kunum; hoqhv Istarwg durumv. Ho mwv gvda mwlwho nyooga konam mam anyo dvb konum hoo haareq jaqb xinam akiam mwlwngam jinum.

¹⁹‍Hwdlo mvvngam nyem tuluhv lwnyi dvb dookum yukho, Mordekai lvpw atwg toggoqho doodunum.

²⁰‍Mordekai mwnwn gaml jik jaqb Istar mwnwg hoolu ngamla mwnwg nyiilungam betam maanum, hoggab Istar mwnwn sorabo Mordekaig benam mam tvjwnum.

²¹‍Mordekai lvpw atwg toggoqho doodu yukho hoq moodho, haagangam rvkybo, lvpw atwg nyiipium vnyi go, Bigtan la Teres bunyiv vcjaqb haaxaqnv hoo Lvpw at Ahasuerusnvn mengdwb hwwsnum.

²²‍Hoo hoqham Mordekai cengnum, hoo mwv ham Vi Koory Istarnvn betamnum, hoo Istar Mordekaig eminho lvpw atam betamnum.

²³‍Hwdlo hoq pagoqkam hwwdil kaakanamv jvqtw yin, nyi vnyiam daapo aoho pvqswr kunum. Hoo hoqham nwd xeqpko kitap ho lvpw atwg dookho xeqp kunum.