Read Nyishi ISTAR 3 Bible Online

ISTAR 3 - Nyishi bible

ISTAR 3

¹Soq kokw so Lvpw at Ahasuerus Agagwg ko hosiq Hammedatag ko tuup Hamannvn mwwg lvgab doonbo mwlwg saab tulungam koi yaadwb mwwg pvlw dootam mam mwam doom dvb jinum.

²‍Hoo lvpw atwg nyera mwlwngv hiyv lvpw atwg toggoqho doonbo mwlwngv Hamannvn modul dumpo pvxwl xumnum, hoggab lvpw atv mwwg pagoqkam hvb nyim dvb hvl gaml jinum. Hvbmabde Mordekai dumpo pvxwl ho xumanum.

³‍Hoo lvpw atwg toggoqho doonbo lvpw atwg nyera tulungv Mordekainvn benum, “Hoggub no lvpw atwg gamlam tvjw maab nyidwn?”

⁴‍Hoo mwam bulv aal looxiam agam goonum hvbmabde mwv bulam tamanum, hoggab mwv Juhudi nyiv hvl bulam mwv betamnum, hoo Mordekaig agam bekjaqb nyijaq ywbdwq mwwnv bulv Hamannvn betamnum,

⁵‍Hoo hwdlo Mordekai Hamannvn dumpo pvxwl ho modu maab nyinam mam Haman mwv kaapa yin, Haman vc loodab hang lingtwrnum.

⁶‍Hvbmabde mwv Mordekai aron laqm-baqm dvb mwwmanum. Hoqgab bulv mwam Mordekaig nyi tulungam cengm dvb mvnum, ho Haman Mordekaig nyi tulungam, Juhudi mwlwngam, Ahasueruswg lvpw-haty hoggv twryum dvb mwwnum.

⁷‍Lvpw at Ahasueruswg vnyw camleq nywnyi go swwiyik ho, otuq poolwg, Nisan pool ho, bulv aal looxiam Hamanwg agaho tak cingnum; hoo bulv takam pool-poolam cingnv pool camleq bvrnyi namgub cingnum, hoqhv Adar poolv.

⁸‍Hoo Lvpw at Ahasuerusnvn Haman benum, “Nyiilu ak nyook mwlwho cwrsaq-twqb mvnum hoo noqg pvvb bwwl doog ko lvpw-haty mwlwho bulv doodo. Bulug pvvbv nyiilu asaq hoqgv luusaq do, hoo bulv lvpw atwg pvvbam pvvl swwma do, hoqgab soq sam lvpw atv kvvmwl cwqb nyiloqkam hog niqtuq dooram.

⁹‍Hoqgab lvpw atv mwwlwq paloqkam bulam twryum to, hoo lvpw atwg kwm-koram mvgbo alaqho ngo rup 10,000 telent go jilwq tayin, hoqham bulv lvpw atwg gumn uddumho vlwq tayin.”

¹⁰‍Hoqgab lvpw atv mwwg alaq hoqg morx lvqcam naalinv hoo ham Agagwg ko hosiq Hammedatag ko tuup Hamannvn Juhudi nyi tulungam ceebio baqn mvdwb jinum.

¹¹‍Hoo lvpw atv Hamannvn benum, “Twngkam nam jigyin, nyiilu ngamkam, bulam noqg al mwwpa koob nyin to.”

¹²‍Hoo lvpw atwg pota xeqn bo tulungam otuq poolwg camleq loum aalho Haman goqkumnum, hoo lvpw atwg xiqcw jaqb mwlwngv Hamanwg gaml jik jaqb xeqnum hoo gvdag nyiit rad mwlw ngamla nyiilu mwlwg saab tulungam, bulug at xiqcwb bvla nyiilug at agamb xeqtwl jinum. Hoqham Lvpw at Ahasueruswg eminb xeqnum hoo ham lvpw atwg morx lvqc hoqgv morxtubnum.

¹³‍Pool camleq bvrnyig, Adar poolwg camleq loum ho Juhudi nyi mwlwngam, anyo ge axa ge, nyem ge ko ge mwlwngam aal lookin ho twryum tvl, hoo bulug gumn-ranam naareq dvb hvl lvpw atwg pvvb bwwl doogko gvda mwlwho pui pota tulungam nyebia jaqb baqm dvb jilwqnum.

¹⁴‍Hoq aalam nyiilu mwlwngam mwx-mvaql cengl doom dvb gvda mwlwho pui potangam jilwq kunum.

¹⁵‍Lvpw atwg gaml jigam gab pota baqnbov nyebia jaqb wnum, hoo hoq pvvb ham gurum nwqtumnam Susa hoqgv jilinum. Hoo lvpw atv la Haman bunyiv twwdwb doanum, hvbmabde Susa bopamv hur-marabl mwwdar-saqpar maab doonum.