Read Nyishi ISTAR 4 Bible Online

ISTAR 4 - Nyishi bible

ISTAR 4

¹Hwdlo hog mwlwngam nyiyum paku hvl Mordekai cengyik ho, Mordekai mwwg vjam pujwr sunum hoo mubam neetwl hoo tuila vjam kootwl, hoo mwv bopam pengkob wnum, hoo mwv vcjaqb kiir nool sogoql xabnum.

²‍Mwv lvpw atwg haagag toggoq namgub caanum, hoggab lvpw atwg toggoq lo tuila vj kootwl haan boam akkam haam mvmanum.

³‍Hoo lvpw atwg gamlv la mwwg pvvb mvnamv hogloq ho wc kunum, hoq gvda mwlwho Juhudi nyiilug pengko ho dery reel hoo mwwdwq dwql nyix-riinum, hoo bulv naleqgo mub neetwl hoo tuila vj koonum.

⁴‍Hwdlo Istarnvn bon nyij bo nyem nyijwr rvla mwnwg nyiipium tulungv mwnwn haal betam yikho, ho vi-kooriv vc loodab mwwdwqnum. Mwwg tuila vjam pipaq tvl mwam vj koom dvb, mwn Mordekai gab vjv jilwqnum, hvbmabde hoq tulu ham mwv loorwq maanum.

⁵‍Ho Istarnvn kaam dvb lvpw atwg nyiipium nyi ak xuqnam Hataknvn Istar goqnum, hoo mwam gaml jilwq tvl Mordekai dookub wl hoggv nyipan hoo hoggab soq sib nyidwn ham cengm dvb kanamnum.

⁶‍Bopamg lvpw atwg toggoq aga deelab Hatak Mordekai dookub wnum,

⁷‍hoo Mordekai mwam hog mwlw nyiknam mam mwam betamnum, hoo Juhudi nyiam twryum mvdwb Hamanwg lvpw atwg gumn uddumho twngk jilwq dvb dingr kunam ham kam betamnum.

⁸‍Bulam twryum dvb Susa hoqgv pvvb mvl pota xeql jilin kunam taqg Mordekai mwam jilwqnum, ho ham mwv Istarnvn kaakinl hoo hingkib pui betam kamyi nvpv mwwnum hoo mwnwn lvpw atwg dookub wl mwwg bid gabla mwnwg nyiilu kwlib bulam mwwsw mvdwb bet bvk hvl gaml jilwqnum.

⁹‍Hoo Hatak wknum hoo hoggv Mordekai benum ham Istarnvn betamnum.

¹⁰‍Ho Istar Hataknvn agam gool Mordekai dookub wgdvl soq agam sam betam taak hvl gaml jinum,

¹¹“Lvpw atwg pwqlw urab mwv goqmab nyega jaqkam hoo nyem jaqkam haab nyiloqkam lvpw atwg saab tulu ngvla nyiilungv cengnum, pvvb akin go dootwq dvn—hv sigv twq, hvbmabde lvpw atv hun beqnyiangv hiyvg aoho tvdaq tayin mwv swwtayin. Hvbmabde lvpw atv ngam soq aal cammum namgub haatwk hvl goqma ta.”

¹²‍Hoo Istar hoggv benum ham bulv Mordekainvn betamnum.

¹³‍Ho Mordekai Istarnvn pui bikurl bulam bilwqnum, “Juhudi nyiilu hoqgv no atv atam lvpw atwg pwqlw ho doogam gab cumciql doodwn hvl mwwmabv.

¹⁴‍Hoggab soq mood so no cooikab doom nyiloqkam, Juhudi nyi tulungam svka dvb la ywwlin bov asaq nyook hoqgv lengtayin, hvbmabde no la noqg imiq dvparv twrtayin. Hoo hiyv cengdwn noqg gab soq svk moodv lvpw-haty so haamab nyikam suico?”

¹⁵‍Ho Mordekainvn birwql betam mvdwb Istar bulam betaml bilwqnum,

¹⁶“Wn, Susa ho doonbo Juhudi mwlwngam wgdvl goqkum to, hoo aal loum gola ai yubum go hog akkam dvma-twwmab ngoqg kwlib dery reel dooto. Ngo la ngoqg nyem nyijwr tulu ngvkam nulug nyinam hvb dery reel dootayin. Ho hoqhv pvvb ho dooma sujaqkam, ngo lvpw atwg dookub wtayin, ngo sibnyiloqkam, ngo sis tayin.”

¹⁷‍Ho Mordekai wknv Istar mwam hog mwlw gaml jiknam mam nyinum.