Read Nyishi ISTAR 5 Bible Online

ISTAR 5 - Nyishi bible

ISTAR 5

¹Aal loum deen ho hwdlo lvpw atv xinam pvlw ramaq haaga taqcgonwg lvpw namlo ho doodu yukho, Istar mwnwg xinam vjam kootwl hoo lvpw namlog ura jaqg deelaho daqnum.

²‍Hoo hwdlo lvpw atv Vi Koory Istarnvn deelaho daqdunam mam kaapa yin, mwn mwwg kaagaho mwwsw dvb nyinum, hoo mwwg alaq hoqgv hun beqnyiangam Istarnvn hwjin jinum. Ho Istar hvvnwqnv beqnyia niqtuqkam idaqnum.

³‍Hoo lvpw atv mwnwn benum, “Vi Koory Istar, hognvk go? Noqg mvnyi-moiyul kody sanamv hog go? Ngoqg lvpw-haty papo gon jaqkam, nam jitayin.”

⁴‍Hoo Istar benum, “Lvpw atv mwwlwq paloqkam, lvpw atv la Haman nunyiv soolo ngoqg lvpw atgab durum mwx-mvaq apnam mam dvtab haat bv.”

⁵‍Ho lvpw atv benum, “Hamannvn nyebia jaqb boa to, ho ngulv Istarwg bekjaqb nyitayin.” Hoqgab lvpw atv la Haman bunyi Istarwg durum mwx-mvaqko ho haanum.

⁶‍Hoo bulv durum mam dvxo tvl twws twwdul doonam, ho lvpw atv Istarnvn benum, “Hognvkam no mwwby do? Nam ham jitayin. Hoo noqg mvnyi-moiyul kody sanamv hoggv? Ngoqg lvpw-haty papo gon kojaqkam, hoqham hvb nyim tayin.”

⁷‍Hoo Istar birwqnum, “Ngoqg mwwbynamv la ngoqg mvnyi-moiyunamv:

⁸‍lvpw atwg kaagaho ngam mwwswl kvvlwq paloqkam, hoo lvpw atv ngoqg mwwbynam mam la ngoqg mvnyi moiyul konam mam niqtuq lengm tvb, hv hvbnyiloqkam lvpw atgab la Haman gab ngo aram lokta durum ak mwx-mvaq tayin, ho nunyiv hvraqb haala bvka hvl benum.”

⁹‍Hoo hoq aalho Haman hwnyir-cojorl mwwngam alwb hangv mwwl wknum. Hvbmabde hwdlo Haman Mordekainvn lvpw atwg toggoqho kaapa yin, ho Mordekai daqrab kamanum, ho mwwg agaho tvmdwrl bos kamanum, hoqgab mwv Mordekainvn vc loodab hang lingtwr twryanum.

¹⁰‍Hvbsujaqkam, Haman mwv atv cwql nammwb wknum, hoo mwv mwwg ajin tulungam la mwwg nywxw Jeresnvn goqkumnum.

¹¹‍Hoo bulam Haman mwwg yuunam nyetam mam, mwwg ko tuupam, hoo lvpw atv mwam koiywb xidwb mvcanam mam, mwam lvpw atwg saab tulu gvla nyera tulug pengko ho otuqb mvca conam mam bekinnum.

¹²‍Ho Haman benum, “Vi Koory Istar lvpw atwg lvgab durum dvmin gvm dvb nyi asaqkam goqmab mwam aro mwwg lvgab goqtwqnum.” Hoo lvpw atwg lvgab mwn aram kam ngam durum dvmin gvm dvb goqpa.

¹³‍Hvbsujaqkam hwdlo namgub ngo Mordekainvn lvpw atwg toggoqho doodu dvb kaapa yukam, soq mwlw si ngoqgab hog niqtuq dooma.”

¹⁴‍Ho mwwg nywxw Jeres la mwwg ajin mwlwngv mwam benum, “Camng kiubit go ao dvb daapo ak mvtuj, hoo ar komcam lvpw atam Mordekainvn pvqswr to hvl beto.” Soq goonam sam Haman tvlwq jaqnum, hoo mwv pvqswrko daapongam mvnum.