Read Nyishi ISTAR 6 Bible Online

ISTAR 6 - Nyishi bible

ISTAR 6

¹Hoq aiho lvpw atv yubla kumab nyinum. Hoo mwwgab dvb xiqtw kwlwl nwd xeqpnam kitapam, bwa mvdwb mwv gaml jinum, hoo bulv ham lvpw atwg agaho poorynum.

²‍Hoo hoqho lvpw atwg nyiipium nyi vnyiv, Bigtana la Teres, deela toggoq rvky bov, bunyiv Lvpw at Ahasuerusnvn mengtanam mam hoggub Mordekai betam kunum ham kaapanum.

³‍Hoo lvpw atv benum, “Soq pagoq gab hoggv ngulv Mordekainvn xidwb lvqc ciknum?”

⁴‍Hoo lvpw atv benum, “Hiyv pwqlw so doodo?” Hoq moodho Haman Mordekainvn mwv daapo mwx-mvaqtvl pvqswr dvb mvpnam pagoqkam agam gootab lvpw atwg namlo lvvgwg toggoqho hoodul doonum.

⁵‍Hoo lvpw atwg yaapa tulungv mwam betamnum, “Haman si doodo, mwv pwqlw si daqdu do.” Hoo lvpw atv benum, “Mwam urab haam to.”

⁶‍Hoqgab Haman urab haanum, hoo lvpw atv mwam benum, “Lvpw atv nyi ak hempwl xidwb mvdy sanam ham hoggub mvtayin?” Hoo Haman mwv atv-atam besnum, “Hiyam yu lvpw atv ngam koi yaadwb xidwb mvta dvn?”

⁷‍Hoo Haman lvpw atam benum, “Hiyam lvpw atv hempwl xidwb mvtanam ham soq sib nyim to,

⁸‍lvpw atwg vj koonam hvk xinam vj lo bwa to, hoo lvpw atwg svpur wnam hvk lo boa to, hoo xinam ywr dumtupam dumpo ho tulwqto.

⁹‍Hoo xinam vjam la svpuram lvpw atwg mwlwngam xibin yaanam saab akwg alaqho gvqlwqto. Hoq tulu ham nyi ak ham lvpw atwg hempwl xinam gob koom to, hoo bopamg cuukiq-bvvrw mwlwho bulam mwam wg mvto, ho mwwg agaho soq pui sam bekar mvto: ‘Lvpw atv hempwl xidwb mvdynam nyi ak ham soq sib mvtayin.’ ”

¹⁰‍Ho lvpw atv Hamannvn benum, “Nyebia jaqb; xinam vjam la svpuram naata, ho lvpw atwg toggoq alo doonbo Juhudi Mordekainvn no hoggub bepa kun ham nyito. Noqg benam mwlw ham nyimab akkam nyimabv.”

¹¹‍Hoqgab Haman xinam vjam la svpuram naanum, hoo mwv Mordekainvn vj koomnum hoo mwam bopamg cuukiq-bvvrw mwwlw ho bool wgnum, ho mwwg agaho soq pui sam benum, “‘Lvpw atv hempwl xidwb mvdynam nyi ak ham soq sib mvtayin.”

¹²‍Ho Mordekai lvpw atwg toggoqb wkur kunum. Hvbmabde Haman mwwdwq kunv mwwg dumpongam tomlup tvl mwwg nammwb nyebia jaqb wknum.

¹³‍Hoo Haman mwwg nywxw ngamla mwwg ajin tulungam mwam hoggv xeq nyiknum ham hog mwlwngam betamnum. Ho mwwg pumb rwnam nyi tulu ngvla mwwg nywxw Jeres mwam benum, “Mordekai nyiloqkam, hiyvg agaho no yoql tadkun, hoqhv Juhudi nyiilungv, mwam no mwam mviya nyoram hvbmabde jvqtw jaqb mwwg agaho yoql tayin.”

¹⁴‍Bulv mwwg lvgab hvb agam goodu yikho, lvpw atwg nyiipium tulungv hvvcnum hoo Hamannvn Istarwg durum dvdwb mwx-mvaqko ho nyebia jaqb boanum.