Read Nyishi ISTAR 7 Bible Online

ISTAR 7 - Nyishi bible

ISTAR 7

¹Hoqgab lvpw atv la Haman Vi Koory Istarwg durum mam dvtab wnum.

²‍Hoo aal loonyi deenho, bulv durum mam dvxo tvl twws twwdul doonam, ho lokta lvpw atv Istarnvn benum, “Vi Koory Istar, hognvkam no mwwby do? Nam ham jitayin. Hoo noqg mvnyi-moiyul kody sanamv hoggv? Ngoqg lvpw-haty papo gon kojaqkam, hoqham hvb nyim tayin.”

³‍Hoo Vi Koory Istar birwqnum, “Lvpw ata, noqg kvvlwq koob mwwsw dvb nyip nyiloqkam, hoo hoqham lvpw atv hemp dvloqkam, ngoqg mwwbynamv ngoqg swwgam swwm dvb jitbv, hoo ngoqg mvnyi-moiyunamv ngoqg nyiilu gab.

⁴‍Hoggab twrm dvb, mengm dvb, hoo twrkiq-twrmal twrpaq dvb, ngam la ngoqg nyiilungam, ngulam puqpaq paku. Ngulam nyem-nyegangam, raasur bvla nvsurb swwm dvb puqtwq nyiloqkam, ngo cooikab doos paco, ho ngulam aya mwwpa tvbwk hvnam si lvpw atwg mood-moomangam doopaqnam sam hog twiyw-tvc sanam dooma.”

⁵‍Ho Lvpw at Ahasuerus Vi Koory Istarnvn benum, “Mwv hiyv, hoo mwv hoglo, hiyv ham haakamb nyita dvn?”

⁶‍Hoo Istar benum, “Ceebio akv la nyemaqkv! Soq nyic-nyia bo Haman si!” Ho Haman lvpw at gvla vi-koorig agaho vcjaqb bosnum.

⁷‍Hoo lvpw atv opo twwngo peel hang lingtwrl daqrabnum hoo lvpw atwg namlog boolub urab haanum, hvbmabde Haman Vi Koory Istarnvn mwwg swwg gab mvnyi-moiyul kol doonum, hoggab lvpw atv mwam ceekol laqm-baqm dukub mwwrnam mam mwv cengknum.

⁸‍Hoo lvpw atv lvpw atwg namlog boolu hoqgv opo twwkwb hookur kunum, ho Istar hogloq ho doogwnum hoqho Haman geqp tvl doonum. Hoo lvpw atv benum, “Ngoqg nam so, ngoqg kaaga so, mwv vi-kooriam kam soq si nyijab-nyiyiq tadwn i?” Lvpw atwg gomcwr lingyum kalam, bulv Hamanwg nyuqm mam pulupnum.

⁹‍Ho Harbona, nyiipium ak gon, lvpw atam kanam taiya bo benum, “Hiyvg gomcwr hoqgv lvpw atam ywwlin bo, Mordekai gab Haman daapongam mwx-mvaql ap paku, hoq aoho daapongam Hamanwg namho camng kiubit go ao dvb mvptvl doodo.”

¹⁰‍Hoo lvpw atv benum, “Hoqho mwam pvqswrto.” Hoqgab Mordekainvn pvqswr nadwb mwwg mvp kunam daapoho Hamannvn bulv pvqswr kunum. Ho lvpw atwg hang lingtwrnamv lingngin kunum.