Read Nyishi ISTAR 8 Bible Online

ISTAR 8 - Nyishi bible

ISTAR 8

¹Hoq aalho Lvpw at Ahasuerus, Juhudig ceebio Hamanwg nombungam, Vi Koory Istarnvn jinum. Hoo mwn gab mwv hiyv ham Istar betam ko-gab, Mordekai lvpw atwg agaho haanum.

²‍Hoo lvpw atv mwv Haman hoqgv morxtubnan lvqcam naaknum ham Mordekainvn ham jinum. Hoo Istar Mordekainvn Hamanwg nombungam naam dukub mvknum.

³‍Ho Istar lokta lvpw atam goonum. Mwn mwwg lvpia ho geqpnum hoo xabnum hoo Juhudi nyi tulungam ceekol twryum dvb Agag nyi Hamanwg almab bel apkunam ham mvdar tvbwk hvl mvnyi-moiyunum.

⁴‍Hwdlo lvpw atv hun beqnyiangam Istarnvn hwjin jiyikam,

⁵‍Istar gorabnum hoo lvpw atwg agaho daqnum. Hoo mwn benum, “Lvpw atv mwwlwq paloqkam, hoo ngo mwwg kaagaho mwwsw dvb kaapa paloqkam, hoo lvpw atwg agaho hog mwlwngv kvtaq paloqkam, hoo Agag Hammedatag ko tuup Haman gv, lvpw atwg gvda mwlwho Juhudi nyi tulungam twryum dvb pota xeqknam ham xeqdar mvdwb mwwg vnyiq kaagaho ngo mvnyi-moiyu dvn.

⁶‍Soq kvl-jeenam si ngoqg nyiilug aoho haab nyiloqkam, ngo hoggub cwql kaanyi tayin? Ho ngoqg tulu dvparam ocu-aiya mvtwl hoggub no cwql kaanyi tayin?”

⁷‍Ho Lvpw atv Vi Koory Istar nvla Juhudi Mordekainvn benum, “Kaato, ngo Hamanwg nombungam Istarnvn jipa kun, hoo bulv mwam daapo aoho pvqswrnum, hoggab mwv Juhudi nyiilug aoho alaq idaq dvb tuugab jinjinum.

⁸‍Hvbmabde lvpw atwg eminb Juhudi pagoq gab noqg mwwlwq koob no xeqto, hoo ham lvpw atwg morxtubnan lvqc lvgab tubto, hoggab lvpw atwg eminho xeqtwl lvpw atwg morxtubnan lvqc lvgab morxtubnam ham kwly dvb nyila kuram.”

⁹‍Pool borumg, Siban poolwg camnyi leq loum aalho lvpw atwg pota xeqn bo saab tulungam goqkumnum. Hoo Juhudi pagoq gab Mordekaig gaml jik jaqb potangam xeqdar kunum, ho ham nyig-wgbo tulungam hoo nyiit rad tulungam hoo saab tulungam, 127 gvda haqb mwlwngam, Indiya hoqgv Itiopiya gvda namgub, at atwg gvda hoqg xiqcwb hoo nyiicwr-cwrxig atwg agam goangam, hoo Juhudi nyi tulungam Juhudi xiqcwb bulug agamb xeqtwl jiknum.

¹⁰‍Hoo Lvpw at Ahasueruswg eminb mwv ham xeqtwl hoo ham lvpw atwg morxtubnan lvqc lvgab morxtubnum. Ho lvpw atgab bon nyinnan xinam svpur tuluho pota xeqnam ham mwv nyebia jaqb xarnbo svpur ho pvvlwq tvl gvda mwlwb kanamnum,

¹¹‍begamv lvpw atv, bopam pvmx ho Juhudi nyi doon bov lvkin gob hookuml bulam twryum tanboam, mengta boam, hoo twrkiq-twrmal twryum tanboam, hiyvg nyiilu ngvjaqkam ho gvda ngvjaqkam koam la nyem mam nyob pal, hoo bulug dupum-dvrab pam naareq tanboam bulv ceetor dvb nyitayin,

¹²‍camleq pool bvrnyig, Adar poolwg camleq loum aalam Lvpw at Ahasueruswg gvda mwlwho hoq aal lo jaqho nyitanam ham ceetor tayin.

¹³‍Pvvb gob xeqtwl gvda mwlwho jilwq tvl, nyiilu mwlwngv tapa kunam ham, Juhudi nyi tulungv bulug ceebiongam ree daqdwb mwx-mvaqnum.

¹⁴‍Lvpw atv nyebia jaqb gaml jitwl, lvpw atgab bon nyinnan nyebiab xarnbo svpur tulu lvgab puiyam kanam kunum. Hoo pvvb sam gurum nwqtumnam Susa hoqgv jilin kunum.

¹⁵‍Ho lvpw atwg dook hoqgv Mordekai xinam vj yajbo ngamla puulu bo kamtam kootwl, koibo hun ywr dumtup lvgab topum vjam la lwwsa-lwwma bo vj kamtam kootwl wknum, hoo Susa bopamv goqr rol hoo hwnyir-hvmarnum.

¹⁶‍Juhudi nyi tulungv hutongam hoo mwwngam nammam hoo hwnyir-hvmaram hoo xinam mam naaknum.

¹⁷‍Hoo gvda mwlwho hoo bopam vx-cwrho lvpw atwg gaml jil pvvb mvdar kunamv wc kunum, Juhudi nyiilug pengko ho durum dvminl hoo doonul mwwngamnamv la hwnyir-cojornamv dooknum. Hoo gvda hoqg nyiilungv naleqgo bulv atv Juhudi nyiingv hvl bibwqnum, hoggab Juhudi nyiilungam bos kunamv bulug aoho haanum.