Read Nyishi ISTAR 9 Bible Online

ISTAR 9 - Nyishi bible

ISTAR 9

¹Ho pool camleq bvrnyi deenho, hoqhv Adar poolwg camleq loum aalho hwdlo lvpw atwg gamlam la pvvb xeqnam mam nyirab tayin, hoq aal jaqho Juhudi nyiilug ceebiongv bulug aoho at gob nyil swwd kub mwwgwnum, hvbmabde hv likub kunum: Juhudi yaangv bulam ceebio bo aoho atwb nyil swwknum.

²‍Lvpw at Ahasueruswg gvda mwlwho bulam mengta boam ceetor dvb Juhudi nyi tulungv bulug bopam tuluho hookumnum. Hoo hiyvkam bulam ceekol dvqrwq nyomanum, hoggab bulam bosnamv nyiilu mwlwg aoho haanum.

³‍Gvda hoqg saab mwlwngv hoo nyig-wgbo mwlwngv hoo nyiit rad tulungv hoo xinam nyiilungv Juhudi nyiilungam svkanum, hoggab Mordekainvn bos kunamv bulug aoho haanum.

⁴‍Hoggab Mordekai lvpw atwg nombu ho koi gob swwnum, hoo mwwg yuunamv gvda mwlwho yuupynum, hoggab soq Mordekai nyi ak si koi-koi yaab atorl swwknum.

⁵‍Juhudi nyiilungv bulug ceebio tulungam lyoqr orioq hoqgv patabnum, hoo bulam mengl twrdul doonum, hoo bulam ceebio boam bulug mwwlwqb mvnum.

⁶‍Gurum nwqtumnam Susa ura daqho Juhudi tulungv mengnum hoo nyiingv 500 go twrnum,

⁷‍hoo Parsandata hoo Dalpon hoo Aspatanvn

⁸‍hoo Porata hoo Adaliya hoo Aridata

⁹‍hoo Parmasta hoo Arisai hoo Aridai hoo Baijata nvkam mengnum,

¹⁰‍Juhudi nyiilug ceebio, Hammedatag ko tuup Hamanwg ko tuup wywngam mengnum, hvbmabde bulv dupum-dvrab naareqnam mam idaq maanum.

¹¹‍Hoq aalho gurum nwqtumnam Susa ho hog hwdgo nyi mengknam mam lvpw atam pui betamnum.

¹²‍Hoo lvpw atv Vi Koory Istarnvn benum, “Gurum nwqtumnam Susa ho Juhudi tulungv mengnum hoo nyiingv 500 go twrnum hoo Hamanwg ko tuup wywngam kam mengpa ku. Lvpw atwg gvda mwlwho hoggv xeq nyis pak yv! Sija noqg mwwbynam hoggv? Ham nam jitayin. Hoo hoqg aoho noqg mvnyi-moiyunamv hoggv? Hoqham hvb nyim tayin.”

¹³‍Hoo Istar benum, “Lvpw atv mwwlwq paloqkam Susa ho doonbo Juhudi tulungam soolog nyinam sib aaram mamrub nyim tvbv. Hoo Hamanwg ko tuup wyw ham daapo aoho pvqswr mvtbv.”

¹⁴‍Hoqgab lvpw atv gaml jitwl hoqham nyimnum. Pvvb ak Susa ho jilinum, hoo Hamanwg ko tuup wywngam pvqswrnum.

¹⁵‍Adar poolwg camleq loopy aalho Susa ho doonbo Juhudi tulungv hookumnum hoo bulv Susa ho nyi 300 go mengnum, hvbmabde bulv dupum-dvrab naareqnam mam alaq idaqmanum.

¹⁶‍Lvpw atwg gvda mwlwho Juhudi tulungv bulug swwgam ceetor dvb lvkin gob hookumnum, hoo bulug ceebio tulu hoqgv saqsor kunum hoo bulam oyum bo tulungam 75,000 go mengnum, hvbmabde bulv dupum-dvrab naareqnam mam alaq idaqmanum.

¹⁷‍Hoq aal hv Adar poolwg camleq loom gob nyinum, hoo camleq loopy aalho bulv doonunum hoo hoq aalam dvmin-twwminl hoo hempnam aal gob mvknum.

¹⁸‍Hvbmabde Susa ho doonbo Juhudi tulungv camleq loom la camleq loopy aalho hookumnum hoo camleq loong aalho doonunum, hoq aalam dvmin-twwminl hempnam aal gob mvknum.

¹⁹‍Hoqgab nampam tuluho, hoo pamda tulu uraho doonbo Juhudi tulungv Adar poolwg camleq loopy aalam dvmin-twwminl hempwl doonu aal hvb mvknum, hoo hoq aalam bulug pengko ho dvs akiam jiko-jipeqnam aal gob mvknum.

²⁰‍Hoo Mordekai soq mwlw sam xiqtunum hoo pui pota tulungam Lvpw at Ahasueruswg gvda mwlwho ogum ge koc ge Juhudi nyi mwlwngam jilwqnum,

²¹‍bulam bilwqnv begamv vnyw-vnywngam Adar poolwg camleq loopiam la loong aalam mwwgabl sooky tvk hvl benum,

²²‍hoggab hoq aalho Juhudi tulungv bulug ceebio hoqgv saqsor kunum, hoo hoq poolho bulug mwwdwqkv hemp gob hoo nyix-riinamv dvrwq aal gob nyikub kunum; hoqgab hoq aal tulu ham bulv dvmin-twwminl hoo hempnam aal gob, hoo bulug pengko ho dvs akiam jiko-jipeqnam aal gob hoo jwwgw boam aky jid aal gob mvknum.

²³‍Hoqgab Mordekai bulam hoggv xeqnum, ham bulv nyirab dvb hvl Juhudi tulungv looknum.

²⁴‍Agag nyi Hammedatag ko tuup Haman Juhudi nyiilug ceebiob nyinum, hoo Juhudi tulungam ceebio baql bulam twryum dvb ceekonum hoo bulam mingtwr twryum xaadwb hvl, Pur cingkanum (hvgdvn si tak cingkanum).

²⁵‍Hvbmabde hwdlo hoqhv lvpw atwg agaho haaikam, Hamanwg Juhudi tulungam ceekol almab nyidwb mwonam mam, mwwg atwg dumpo ho hookub mvdwb, mwv gaml jitwl xeqdar mvnum, hoo mwam la mwwg ko tuup tulungam daapo aoho pvqswrnum.

²⁶‍Hoqgab bulv hoq aalam Pur ham emin minyw-mingcnv Purim hvl eminum. Hoo bulv soq pagoq so hoggv hengpa kunum, hoo hoggv bulam nyiknum, hoqgab soq pagoq tulu gab pui potangam xeqnum.

²⁷‍Juhudi tulungv bulv la bulug ko hosiq kvla hoo bulam nyiba bo tulungv xeqp kunum aal loonyiam vnyw-vnywngam kvxaqmab xuqlin kunum moodho soodwb nyikynum,

²⁸‍hotam vxiv, nyob luuxiv, gvda mwlwngv, hoo bopam pvmxiv soq aal sam mwwpal pvvdwb nyidwn, hoo Juhudi nyiilug pengko lo Purim aalam, ho ham mwwpal soonam mam bulug hotam lo nyiim mvmabv.

²⁹‍Ho Abihail nyem ko Vi Koory Istar nvla Juhudi Mordekainvn gamr-atoram xeql dvb jiknum, ho Purim pagoqkam pwbw mvdvb hoq pota hv lwnyi dvb jinum.

³⁰‍Ahasueruswg lvpw-haty 127 gvda mwlwho gomcwr swrsongam la jvqtwngam Juhudi nyiilu gab potangam jilwq kunum,

³¹‍Juhudi Mordekai la Vi Koory Istar bulam tomswrnum xuqlinl ap kunam Puirm aalam soodwb nyiky kunum, hoo bulv atv la bulug ko hosiqkv bulug dvma-twwmab vrr rwl hoo mwwdwq dwqnam mam nyidwb nyikynum.

³²‍Vi Koory Istarwg gaml jinam mam pwbw kunv soq Purim xilo sam soodwn, hoo hoqham xeqnam ho xiqtul ap pakun.