Read Nyishi DOOGIN 10 Bible Online

DOOGIN 10 - Nyishi bible

DOOGIN 10

¹Ho At Sw Mojesnvn benum, “Paro dookub wno, hoggab ngo mwwg hangam la mwwg nyera tulug hangam kamtwr dvb mvpan, ho ngo bulug pengko ho ngoqg soq swrdorxeq tulu sam kaakin dvb nyitayin,

²‍hoo noqg ko tulungam hoo noqg koog ko siqdangam ngo Ijipt nyiilungam bulam hoggub hentwr-kaas looda dvb mvnam ham hoo ngo hoggv swrdorxeq dvb bulug pengko ho nyinum, ngo At Swv hvl nulam cengm dvb nyiam ham bulam no bekin tayin.”

³‍Ho Mojes la Aaron Paro dookub wnum hoo mwam benum, “Soq sib Hibrug Pwnbo, At Sw bedo, ‘Hog hwd oyu go no atv ngoqg agaho yan maab haqpaql dootayin? Ngoqg nyiilungam tolin tuku, ho bulv ngam xumtayin.

⁴‍Hoggab no ngoqg nyiilungam tolin mabnyiloqkam, kaato, aaram ngo noqg gvda so komar takam mam haam tayin,

⁵‍hoo hoq tuluhv gvdangam pumlup tayin, ho gvdangam nyi akkam kaapa kuram. Hoo hoq tuluhv nyodo taag mengongam dvtayin, hoo hoq tuluhv nulug rongo ho swwrabo svvn nwwcw-nwwtam dvtayin,

⁶‍hoo hoq tuluhv noqg nammwb hoo noqg nyera tulug nammwb hoo Ijipt nyi tulug namho pumlup tayin, ho noqg ab tulungv ho noqg abwg ab tulungv soq swcw so bulug swwca hoqgv soolo godab svkwg kaaka ram.” ’ ” Ho mwv Parog hoqgv tobkurl wknum.

⁷‍Ho Parog nyera tulungv mwam benum, “Hog hwd oyu go soq nyi ak si ngul gab pwd-poto gob nyitayin? Nyi tulungam wmto, ho bulv bulug Pwnbo, At Swn xumtayin. No sija godab ijipt gv ocu-aiyanam mam cengma ta i?”

⁸‍Ho Mojes nvla Aaronnvn Parog dook ho bookur kunum. Hoo mwv bulam benum, “Wgdvl nulug Pwnbo At Swn xumta. Hvbmabde hiyv xeq wtayin?”

⁹‍Mojes benum, “Ngulv anyo-akam mwlwngv ngulv wtayin. Ngulug nyem-nyega ko tulungam hoo ngulug sviya pvtwngam ho sibin-svvngam wgtayin, hoggab ngulv At Swn durum ak dvg dvb nyiky dvn.”

¹⁰‍Hvbmabde bulam benum, “Ngo nulam la nulug ko tulug lvgab wwm baloqkam, At Sw nulug lvgab dooba nvka! Kaato, nulv alman ak mwwtwl soq sam nyidwb mwwdo.

¹¹‍Mwlwngv wmabv, nyega tulu arongv nulug pengko hoqgv wn, hoo At Swn xumta, hoggab soq sam nulv koodul doonam.” Hoo bulam Parog dook hoqgv lvvgwb ruqlin kunum.

¹²‍Ho At Sw Mojesnvn benum, “Noqg alaqkv Ijipt gvdaho komar takam mam haam dvb ijinl ilinto, ho hoq tuluhv Ijipt gvda aoho haatayin hoo nyodo taag mingtu-mengo svvn tulu ham bulv dvtayin.”

¹³‍Ho Mojes mwwg beqnyiangam Ijipt gvda aoho ijinl hwlinum, hoo At Sw aal-aiyib dou-cagag dooiyam gvda aoho haamnum. Hwdlo ar yukho dou-cagag dooiyv komar takam mam bvqlwq kunum.

¹⁴‍Komar takamv Ijipt gvda mwlwho haaknum hoo Ijipt gvda mwlwho komar takamv doonum, komar takamv kan twdwq muqya apo gob jarl yvnum, hoqhvb nywywngam otuqho nyika, ho nywywngam lokta nyik ram.

¹⁵‍Bulv gvda mwlwngam pumlupnum, ho gvdangv kan kunum, hoo nyodo taag mingtu-mengongam bulv gvda hoqgv nwmw-nwsin hoo aaxy xeenbo svvn mwlwngam dvknum. Ijipt gvda nyoro mwlwho svvn gokam hoo nwmw-nwsin gokam jeenbo akkam dook maanum.

¹⁶‍Ho Paro nyebia jaqb Mojes nvla Aaronnvn goqanv hoo benum, “Nulug Pwnbo At Sw nvla nulam ngo ceekol nyic nyipa ku.

¹⁷‍Hoqgab sija aro soq sam, ngoqg nyic sam apaq tukbv, hoo nulug Pwnbo At Swn soq sig sam ngoqg goloqkv naapaq mvdwb xumt bv.”

¹⁸‍Ho mwv Paro dook hoqgv lvvgwb lengnv At Swn xumnum.

¹⁹‍Hoo At Sw dooiyam dou-haaga daiyab vcjaqb ywmnum, hoq hv komar takam mam nuulayil Swlw Sa-svlob nuulwq kunum. Ijipt gvdaho komar takam cigkam dook maanum.

²⁰‍Hvbmabde At Sw Parog hangam kamtwr mvnum, hoo mwv Israel nyiilungam tolin kumanum.

²¹‍Ho At Sw Mojesnvn benum, “Noqg alaqkam doa aob ica to, ho Ijipt gvdaho kan pumto, hoo kan punam ham hempa mvto.”

²²‍Ho Mojes mwwg alaqkam doa aob icanum, hoo Ijipt gvdaho aal loum gob kanv pulup tvl doonum.

²³‍Bulv akwn-akwn kaapa mins maanum, ho hiyvkam mwwg dook hoqgv aal loum gob biima-tamab doonum, hvbmabde Israel nyiilug dooka hvnam ho hutongv doonum.

²⁴‍Ho Paro Mojesnvn goqa nv hoo benum, “Wgdvl, At Swn xumta; nulug ko anyo tulu hvvkam nulug lvgab wg gvn; hvbmabde nulug sviya pvtwngam la nulug sibin-svv tulu ham doom peel wn.”

²⁵‍Hvbmabde Mojes benum, “No ngulam hoggub nyijaqkam pwr jinam mam la boyuqnam akiam jim dvb nyiky tayin, ho ngulug Pwnbo At Swn ngulv pwr jitayin.

²⁶‍Ngulug tuun-mee tulu ngvkam ngulug lvgab wdwb nyido; dorg kam apaqdvb nyima, hoggab ngulug Pwnbo At Swnvn xumdwb ngulv bulam bool wg dvb nyido, hoo ngulv tolo hvvc maady deedib hoggv At Swn xumn tayin ham ngulv cengma do.”

²⁷‍Hvbmabde At Sw Parog hangam kamtwr mvnum, hoo mwv bulam wwm mvmanum.

²⁸‍Ho Paro mwam benum, “Ngoqg soqgv aadob wnku; ngoqg nyuqm mam nywywngam lokta kaapa dvb mwwmabv, hoggab no hwdlo aalam ngoqg nyuqm mam kaapa tayin no sitayin.”

²⁹‍Mojes benum, “Noqg benam hvb nyim to! Ngo noqg nyuqm mam lokta kaapa kuram.”