Read Nyishi DOOGIN 11 Bible Online

DOOGIN 11 - Nyishi bible

DOOGIN 11

¹At Sw Mojesnvn benum, “Hvbsujaqkam ngo swlin-mominam tuup kvl-jeenamv Paro gvla Ijipt aoho haam tayin. Hoq kokwngam mwv nulam soqgv wwm taikun. Hwdlo mwv nulam tolin yin, mwv nulam twrkub mwlwngam wwm taikun.

²‍Sija nyiilu sam tapa dvb agam gooto, ho bulam betam to, nyem-nyega vxiv bulug door-doopw hoqgv rupam la hun guj loq kotwk hvl beto.”

³‍Hoo Ijipt nyi tulug vnyiq kaagaho nyiilungam mwwswl jim dvb At Sw jinum. Hoq aoho, Mojes Ijipt gvdaho, ho Parog nyera tulu gvla nyi tulug vnyiq kaagaho xinam nyi koibo akgob nyinum.

⁴‍Ho Mojes benum, “Soq sib At Sw bedo: Soi nywyw ra-ngam ngo Ijipt nyi tulug pengko ho gaql yvtayin,

⁵‍hoo Ijipt gvdaho otuqcob ko bwwnam mwlwngv sitayin, hiyv pwqlwho doonbo, Parog otuqcob ko bwwnam hoqgv naarab layil paqn-nvsur dux-xul dooiya bog otuqcob ko bwwnam xaqb, hoo tuun-mee hoqgv otuqcob ko bwwnam mam sim tayin.

⁶‍Ho Ijipt gvda mwlwho vcjaqb sogoql xabtayin, hoqhvb nywywngam nyika ma, ho hv nywywngam lokta nyikram.

⁷‍Hvbmabde ikiv Israel nyiilungam, nyiingam jaqkam ho svdinam jaqkam pwram, ho At Sw Ijipt nyiingam la Israel nyiingam mvpinl mwbwqnam mam nulv cengtayin.

⁸‍Hoo noqg soq nyera tulu si ngoqg dookub haatayin hoo ngam dumpo pvxwl xuml betayin, ‘No la hoo nam wmin gvnbo nyiilu mwlwngv, Wtku.’ Hoo hoq kokwb ngo wtayin.” Hoo mwv vcjaqb haaxaq kunv Paro dook hoqgv lengknum.

⁹‍Ho At Sw Mojesnvn benum, “Paro nulam tvjw ram, ho ngam Ijipt gvdaho naleqgo swrdorxeqkam nyim dvb mwwdo.”

¹⁰‍Mojes la Aaron Parog kaagaho soq swrdorxeq tulu sam nyiknum, hoo At Sw Parog hangam kamtwr mvnum hoo mwv Israel nyiilungam mwwg gvda hoqgv wwm dvb tolin maanum.