Read Nyishi DOOGIN 12 Bible Online

DOOGIN 12 - Nyishi bible

DOOGIN 12

¹At Sw Mojes nvla Aaronnvn Ijipt gvdaho benum,

²“Soq pool si nulgab nyirabko pool gob nyitayin. Nulgab soq sam vnywg otuqcob pool gob nyitayin.

³‍Soq poolwg looyw aalam nyi vxiv bulug ab tulug nam-nam mam, imiq dvpar par-parv sviya ko loq dorg-dorgub naatayin hvl Israelwg nyob hoolungam betam to.

⁴‍Hoo imiq dvpar gab sviya ko hv anyo baloqkam, ho mwv la mwwg ogum hoq door-doopw nyiingam xika gvdwl naato; ho hog hwdgo nyi akinv dvla dvn hvb nulv sviya koam xika gvdwl naato.

⁵‍Sviya ko nywg akam tvl un-tar gvma boloq nulv xuqlin to. Nulv ham sviya maalo sibin tulu hoqgv naato,

⁶‍hoo nulv ham soq poolwg camleq loopynam gob rwwl apto, ho Israelwg nyob hoolu mwlwngv lvkin gob hookum layil camleq loopig ariyum mam bulug sviya tulungam patab tayin.

⁷“Ho bulv ui tuugin naalayil ham viyap swwrw dvvnyi hoola nammwg viyap poobam tiyaq tayin hoo bulv vdinam dvtayin.

⁸‍Bulv aiyab vdinam wmho boonul dvtayin, hoq lvgab opap kiilwq maanam wtwngam la hor oongam dvto.

⁹‍Hoq vdinam leelaqb hoo iss lvgab xeel dvma bv, hvbmabde ham boonu gvdwl dvto, hoqg dumpongam, hoqg lvpiangam hoo hoqg haarag vdinam boonul dvto.

¹⁰‍Hoo nulv hoq vdinam vcwr gokam arnamgub doorab mvk yo; ar namgob dook boam nulv wm ramxa to.

¹¹‍Soq sib nyigdvl nulv ham dvto: nulug soruqkam kvrlwq tvl, nulug samtaqnan nulug lvpiaho gvtwl, hoo nulug beqnyiangam nulug alaqho bwwtwl dvto. Hoo nulv ham nyebia jaqb dvtayin. Soq si At Swg Dvtv Durumv.

¹²‍Hoggab ngo hoq aiyam Ijipt gvdab wpeq tayin, hoo Ijipt gvdaho ko bwwconam, nyiam la svdinam vnyi-vnyiam mwlwngam ngo jwwtab tayin; hoo Ijipt hoqg pwnbo mwlwngam ngo pw-hwwl laqm-baqm tayin: Ngo jaq At Swv.

¹³‍Nulug doogw nam tuluho ui si nulam kaacin dvb muxtayin. Hoo hwdlo ngo uiyam kaapa yin, ngo nulam wbol wleq tayin, hoo swlin-mominamv nulam twrtab haaram, hwdlo ngo Ijipt gvdangam laqm-baqm yin.

¹⁴“Soq aal si nulgab mwwgab de aalv, hoo nulv sam At Sw gab durum dvdwb pvvto; ho nulug hotam-hotam xaqb, hoo nwrba xaqb hoqham pvvb gob pvvto, hoo hoq aalam durum dvl xilo soomin to.

¹⁵‍Aal kvn go nulv opap kiilwq maanum wtwngam dvtayin. Otuq aalam opap kiilwqnam wtwngam nulug nam hoqgv mvpaqto, hoggab hiyv lajaqkam opap kiilwqnam ham otuq aal hoqgv kvn aal namgub dvbnyiloqkam, hoq nyi ham Israel hoolub xikram.

¹⁶‍Otuq aalam nulv dvrwqbo dookum ak dootayin, hoo kvn deen aalam dvrwqbo dookum ak dootayin. Hoq aal tulungam bonam nyimabv. Hvbmabde nyi vxiv hoq dvs dvdy sanam mam, hoq aal looam nulv mwx-mvaqto.

¹⁷‍Hoo nulv wtwngam opap kiilwq maab Durum dvnam mam nyil dootayin, hoggab soq aal so ngo nulug nyobam Ijipt gvda hoqgv boolin kunum. Hoqgab nulv soq aal sam nulug hotam-hotam xaqb pvvb akgob nwrba gob mwwgabl nyil doola ka.

¹⁸‍Otuq poolwg camleq loopy aalwg ariyum hoqgv nulv opap kiilwq maanam wtwngam dvlayil camnyi leq lookin aalwg ariyum namgub dvtayin.

¹⁹‍Aal kvn gob nulug namho opap kiilwqnam wtwngam kaapa mvmabv. Hiyv akgon opap kiilwqnam mam dvbnyiloqkam, hoqg nyi ham Israelwg hoolu gob xikram, mwv nyoodo nyi sujaqkam ho gvdag nyiidu nyi sujaqkam.

²⁰‍Nulv opap kiilwqnam akkam dvmabv; nulug doogw mwlwho nulv opap kiilwq maanam wtwngam dvtayin.”

²¹‍Ho Mojes Israelwg axa tulu mwlwngam goqnv hoo bulam benum, “Dvtv Durum dvdwb nulug nyob hoolu gab nulv atv wgdvl hoo sviya tulungam xuqg dvl patabl dvto.

²²‍Hissop nvnw gvqrwqgo naagdvl hoo ham pukaqho doonbo uiho nwqbam tvl nam viyap yabtam mam hoo viyapg swwrw dvvnyi ho tiyaqto. Nulv hiyvkam mwwg nam hoqgv ar namgob lvvgwb lengmabv.

²³‍Ho At Sw Ijipt nyi tulungam wpeql jwwtab tayin, hoo hwdlo nam yabtam gvla viyap swwrw dvvnyi ho uiyam kaapa yukam, At Sw viyap pam korbol wleq tayin hoo twrnbo tulu ham nulug nam tuluho nulam jwwtab haamram.

²⁴‍Nulv soq guunam sam nulgab pvvb akgob pvvla ka hoo nulug ko tuup tulu gab nwrba gob doom laka.

²⁵‍Hoo At Sw nulam jitayin, mwwg dingr kunam mam hwdlo nulv gvdaho haaikun, nulv soq sam guunam nyis akwb pvvtayin.

²⁶‍Hoo hwdlo nulug ko tulungv nulam toxul beikam, ‘Soq guunam nyis si nulgab hoggv?’

²⁷‍Nulv betayin, ‘Soq si At Swg pwr jil Dvtv Durumv, hwdlo mwv Ijipt nyi tulungam mengyikho, hoggab mwv Ijiptho Israel nyiilungam korbol wleqnum hoo ngulug nammam apaq jinum.’” Hoo nyiilungv bulug dumpongam pvxwl xumnum.

²⁸‍Ho Israel nyiilungv wknv hvb nyiknum; ho At Sw Mojes nvla Aaronnvn gaml jinum, ho bulv hvb nyiknum.

²⁹‍Ai nywyw ra ho At Sw Ijipt gvdag otuqcob ko bwwnam mwlwngam jwwtabnum, Parog pwqlwho doonbo ko vbw cociq hoqgv naalayil nyuum boal pvtwq uraho doonbo namgub, hoo tuun-mee mwlwg otuqcob ko bwwnam mam jwwtabnum.

³⁰‍Hoo Paro, mwv la mwwg nyera tulungv hoo Ijipt nyi tulungv ai gorabnum. Hoo Ijiptho sogoq-ywrlwl xabnum, hoggab namg jijaqkam si-hum doomanum.

³¹‍Ho mwv ai Mojes nvla Aaronnvn goqnum hoo benum, “Wn ku, ngoqg nyiilu pengko soqgv, nulv la Israel nyiilungv lengn ku; hoo nulug benum hvb wgdvl, At Swn xumta.

³²‍Nulug sviya pvtwngam la nulug sibin-svv tulungam boolayil nulug bekjaqb wn ku, hoo ngam kam lvqc cipeb!”

³³‍Ijipt nyi tulungv nyiilungam modul benv bulam gvda hoqgv nyebia jaqb wleq tvk hvl benum. Hoggab bulv benum, “Ngul mwlwngv sita yuk.”

³⁴‍Ho nyiilungv bulug wtw mvnam mam mvnya maatab bulv bulug pwcwngam bulug vjho pusum tvl bulug gorbw ho baql wgnum.

³⁵‍Israel nyiilungv bulam Mojesg benam hvbkalam nyiknum, bulv Ijipt nyi tulu hoqgv rup-hun gujam la vjam konum.

³⁶‍Hoo At Sw Ijipt nyi tulug vnyiq kaagaho nyiilungam mwwswl jim dvb jinum, ho bulv hoggv konum bulam bulv jinum. Soq sib bulv Ijipt nyi tulu hoqgv hupyiql wg kunum.

³⁷‍Hoo Israel nyiilungv Rameses hoqgv Sukkot namgub, nyem mam la ko tulungam bepa maab, nyi nyega arongv lwwyw lwwx gob nyinum.

³⁸‍Bulug lvgab nyi asaqkvkam naleqgo wmin gvknum, hoo tuun-meengv, sviya pvtwngv la sibin-svv tulungam wgkunum.

³⁹‍Hoo bulv opap kiilwq maanum wtwngam bulv Ijipt hoqgv baql wgnum, hoggab hoqham opap kiilwq maanum, hoggab bulam Ijipt hoqgv nyebia jaqb ruqlin ko-gab bulv atgab dvs-twws mwx-mvaq kumanum.

⁴⁰‍Israel nyiilungv Ijiptho swwl doonamv vnyw 430 gob nyinum.

⁴¹430 vnywg vtwr-anya moodwg, hoq aal jaqho, At Swg nyiilungv Ijipt gvda hoqgv lengl wknum.

⁴²‍Hoq aiho At Sw bulam Ijipt gvda hoqgv boolin dvb kaaya yaal doonum; ho hoqhvb At Sw nyinam aiham, Israel nyiilungv bulug hotam-hotam gob At Swn kaaya yaal doodwb pvvknum.

⁴³‍Hoo At Sw Mojes nvla Aaronnvn benum, “Soq si Dvtv Durum dvnam pvvbv: nyoodo nyiingv ham dvdwb nyiram,

⁴⁴‍hvbmabde raasur ram twngk hoqgv rvnam ham pepaql-mux mvxo kokwngam dvtayin.

⁴⁵‍Nyoodo nyi ngvla ree goqnam nyerangv ham dvdwb nyiram.

⁴⁶‍Ham nam namkin golo dvtayin; nulv vdinam nam hoqgv lvvgwb bwwlin maabv, hoo nulv hoqg alongam soogkam mwtwr maabv.

⁴⁷‍Israelwg nyob dvpar mwlwngv sam nyitayin.

⁴⁸‍Nyoodo nyiingv nulug lvgab doobal hoo At Sw Dvtv Durum mam nyib nyiloqkam, mwwg nyega ko mwlwngam pepaql-mux mvmto. Ho mwv ogumb haal hoo ham nyila tayin; mwv gvda hoqg nyiidu hvb nyitayin. Hvbmabde pepaql-mux mvmanam nyiingv ham dvdwb nyiram.

⁴⁹‍Hoqham dvdwb nulug pengko ho nyiidu nyi gab la nyiogy giabo nyoodo nyi gab pvvbv luukin tayin.”

⁵⁰‍At Sw hoggub Mojes nvla Aaronnvn gaml jiknum hvbjaq Israelwg nyiilu mwlwngv nyiknum.

⁵¹‍Hoo hoq aal jaqho bulug sipai tulu lvgab At Sw Israel nyiilungam Ijipt gvda hoqgv boolin kunum.